ଘର ବାହୁଡ଼ିବେ ହେମା! ରାହୁଲଙ୍କ ସହ ଆଲୋଚନା ପାଇଁ ଦିଲ୍ଲୀରେ ଡେରା

କୋରାପୁଟ,୯ା୨(ଆପ୍ର): ପୂର୍ବତନ ସାଂସଦ ହେମା ଗମାଙ୍ଗ ପୁଣି କଂଗ୍ରେସକୁ ଫେରିବାର ସମ୍ଭାବନା ରହିଛି । ଏଥିଲାଗି ୨ ଦିନ ହେଲା ଦିଲ୍ଲୀରେ ଡେରା ପକାଇଛନ୍ତି । ଏଆଇସିସିର କେତେକ ନେତାଙ୍କ ସହ ଆଲୋଚନା ମଧ୍ୟ କରିଛନ୍ତି । ଏଆଇସିସି ଅଧ୍ୟକ୍ଷ ରାହୁଲ ଗାନ୍ଧୀ ଏବଂ ସୋନିଆ ଗାନ୍ଧୀଙ୍କୁ ଭେଟିବା ପରେ ଯାହା କିଛି ସ୍ପଷ୍ଟ ହେବ ବୋଲି ସେ କହିଛନ୍ତି ।
ହେମା କହିଛନ୍ତି ‘କଂଗ୍ରେସର ଓଡ଼ିଶା ପ୍ରଭାରୀ ଜିତେନ୍ଦ୍ର ସିଂଙ୍କ ସହିତ ଏ ସଂପର୍କରେ କଥା ହୋଇଛି । କିନ୍ତୁ ଏପର୍ଯ୍ୟନ୍ତ ସୋନିଆ କିମ୍ବା ରାହୁଲଙ୍କ ସହ ଆଲୋଚନା କରିପାରିନି । ଆଲୋଚନା ପାଇଁ ଓଡ଼ିଶାରୁ ଦୁଇ ଦିନ ତଳେ ଦିଲ୍ଲୀ ଆସିଛି । ଦିଲ୍ଲୀରେ କଂଗ୍ରେସର କେତେକ ସାଙ୍ଗଠନିକ ନେତାଙ୍କ ସହ କଥାବାର୍ତ୍ତା କରିଛି । କଂଗ୍ରେସକୁ ଫେରିବା ପାଇଁ ଓଡ଼ିଶା ପ୍ରଭାରୀ ଯାହା ପରାମର୍ଶ ଦେଇଛନ୍ତି ତାହା ଦିଲ୍ଲୀରେ ରହି କରୁଛି । ଆଜି ଦଳର ମୁଖ୍ୟଙ୍କୁ ଭେଟିବାର ଥିଲା । କିନ୍ତୁ ଶେଷ ମୁହୂର୍ତ୍ତରେ ଗୁରୁତ୍ୱପୂର୍ଣ୍ଣ ବୈଠକରେ ଅଧ୍ୟକ୍ଷ ରାହୁଲଜୀ ଯୋଗଦେବାକୁ ଚାଲିଯିବାରୁ ତାହା ସମ୍ଭବ ହୋଇନି । ଆଜି ଏହି କଥା ପ୍ରମେୟକୁ କହିଛନ୍ତି ହେମା ।
ସୂଚନାଥାଉକି, କୋରାପୁଟ ଲୋକସଭା ଆସନରେ ହେମା ୧୯୯୯ରେ କଂଗ୍ରେସରୁ ଲଢ଼ି ବିଜୟଲାଭ କରିଥିଲେ । ୨୦୦୪ରେ ଏହି ଆସନରେ ତାଙ୍କ ସ୍ୱାମୀ ଗିରିଧର ଗମାଙ୍ଗଙ୍କୁ କଂଗ୍ରେସ ଟିକେଟ ଦେବାପରେ ସେ ଗୁଣୁପୁର ବିଧାନସଭାରୁ ଲଢ଼ି ବିଜୟୀ ହୋଇଥିଲେ । ୨୦୦୯ ନିର୍ବାଚନରେ କୋରାପୁଟ ଲୋକସଭା ଆସନରୁ କଂଗ୍ରେସ ପ୍ରାର୍ଥୀ ହେବାକୁ ଜୋରଦାର ଉଦ୍ୟମ କରିଥିଲେ । କିନ୍ତୁ କଂଗ୍ରେସ ଗିରିଧରଙ୍କୁ ଏହି ଲୋକସଭା ଆସନରେ ପ୍ରାର୍ଥୀ କରି ହେମାଙ୍କୁ ଉପେକ୍ଷା କରିଥିଲା । ଟିକେଟ୍‌ ଦେଇଥିଲା ଲକ୍ଷ୍ମୀପୁର ବିଧାନସଭା ଆସନରେ । ହେଲେ ଏହି ନିର୍ବାଚନରେ ହେମା ବିଜେଡି ପ୍ରାର୍ଥୀ ଝିନ୍ନ ହିକକାଙ୍କଠାରୁ ପରାସ୍ତ ହୋଇଥିଲେ । ୨୦୧୪ ନିର୍ବାଚନରେ ହେମାଙ୍କୁ ପୁଣିଥରେ ଲକ୍ଷ୍ମୀପୁର ଆସନ ଦେବାକୁ ଦଳ ଚାହୁଁଥିବା ଜାଣିବା ପରେ କଂଗ୍ରେସ ସହ ସମ୍ପର୍କ ଛିନ୍ନ କରି ବିଜେଡିରେ ମିଶିଥିଲେ ହେମା । ଲକ୍ଷ୍ମୀପୁର ବିଧାନସଭା ଆସନରୁ ତାଙ୍କୁ ଟିକେଟ୍‌ ଦେଇଥିଲା ବିଜେଡି । କିନ୍ତୁ କଂଗ୍ରେସ ପ୍ରାର୍ଥୀ କୈଳାସ କୁଲିସିକାଙ୍କଠାରୁ ସେ ପରାସ୍ତ ହୋଇଥିଲେ । ଏହାପରେ ସେ ଗତବର୍ଷ ବିଜେଡି ଛାଡ଼ିଥିଲେ ।