ଭୁବନେଶ୍ୱର/ରାଉରକେଲା,୦୨/୦୧: ଶ୍ରାଚି ରାହ ବେଙ୍ଗଲ ଟାଇଗର୍ସ ଚମତ୍କାର ପ୍ରଦର୍ଶନ କରି ଚଳିତ ହକି ଇଣ୍ଡିଆ ଲିଗ୍ରେ (ଏଚ୍ଆଇଏଲ୍) କ୍ରମାନ୍ୱୟରେ ଦ୍ୱିତୀୟ ବିଜୟ ହାସଲ କରିଛି । ବୁଧବାର ଦଳ ୨-୧ ଗୋଲରେ ଗୋନାଶିକା ଦଳକୁ ପରାଜିତ କରି ସର୍ବାଧିକ ୬ ପଏଣ୍ଟ ସହ ଟେବୁଲରେ ଶୀର୍ଷ ସ୍ଥାନରେ ରହିଛି ।
ପ୍ରଥମ ମ୍ୟାଚ୍ରେ ବେଙ୍ଗଲ ଟାଇଗର୍ସ ୩-୨ ଗୋଲରେ ହାଇଦ୍ରାବାଦ ତୋଫାନକୁ ପରାଜିତ କରିଥିଲା । ପୂର୍ବଭଳି ବୁଧବାର ମଧ୍ୟ ଦଳ ଗୋନାଶିକା ବିପକ୍ଷରେ ଉନ୍ନତ ପ୍ରଦର୍ଶନ କରିଥିଲା । ପ୍ରଥମ ଦୁଇଟି କ୍ୱାର୍ଟର ଖେଳ ବେଶ ଚିତାକର୍ଷକ ଥିଲା । ଆକ୍ରମଣ ଓ ପ୍ରତିଆକ୍ରମଣ ମଧ୍ୟରେ ଖେଳ ଗୋଲ ଶୂନ୍ୟ ରହିଥିଲା । ଟାଇଗର୍ସର ଆକ୍ରମଣ ବେଶ କ୍ଷୀପ୍ର ରହିଥିଲା । ପ୍ରଥମାର୍ଦ୍ଧରେ ଦଳକୁ ୫ଟି ପେନାଲ୍ଟି କର୍ଣ୍ଣର ମିଳିଥିଲା । ଗୋନାଶିକାକୁ ମିଳିଥିଲା ୨ଟି ।
ଦ୍ୱିତୀୟାର୍ଦ୍ଧ ଆରମ୍ଭରୁ ୩୧ ମିନିଟରେ ଟାଇଗର୍ସକୁ ମିଳିଥିଲା ପେନାଲ୍ଟି କର୍ଣ୍ଣର (ପିସି) । ରୁପିନ୍ଦର ପାଲ ସିଂ ଏହାକୁ ଗୋଲ୍ରେ ପରିଣତ କରି ଦଳକୁ ୧-୦ରେ ଅଗ୍ରଣୀ କରାଇଥିଲେ । ଗୋଟିଏ ମିନିଟ ପରେ ମନପ୍ରୀତ ସିଂ ଆକର୍ଷଣୀୟ ଫିଲ୍ଡ ଗୋଲ୍ ସହ ସ୍ଥିତି ୧-୧ରେ ବରାବର କରିଥିଲେ । ତୃତୀୟ କ୍ୱାର୍ଟରରେ ୨ ଦଳ ଗୋଟିଏ ଲେଖାଏଁ ଗୋଲ୍ ଦେଇଥିଲେ ।
ଅନ୍ତିମ କ୍ୱାର୍ଟରରେ ଟାଇଗର୍ସ ପୁଣି ଏକ ପିସି ପାଇଥିଲା । ୪୮ ମିନିଟରେ ରୁପିନ୍ଦର ଏହାକୁ ଗୋଲରେ ରୂପାନ୍ତରିତ କରି ଦଳକୁ ୨-୧ରେ ଆଗୁଆ କରାଇଥିଲେ । ଶେଷ ୧୨ ମିନିଟ ଖେଳ ତୀବ୍ର ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ହୋଇଥିଲା । ମାତ୍ର ଗୋନାଶିକା ପ୍ରତ୍ୟାବର୍ତ୍ତନର ସୁଯୋଗ ନପାଇ ଶେଷରେ ଗୋଟିଏ ଗୋଲରେ ପରାଜିତ ହୋଇଥିଲା ।
ଗୋନାଶିକାର ଏହା ଦ୍ୱିତୀୟ ପରାଜୟ । ଉଦ୍ଘାଟନୀ ଦିବସରେ ଦଳ ୨-୨ (୨-୪) ଗୋଲରେ ଦିଲ୍ଲୀ ଏସ୍ଜି ପିପର୍ସ ଠାରୁ ପରାସ୍ତ ହୋଇଥିଲା । କଳିଙ୍ଗ ଲାନସର୍ସ ପ୍ରଥମ ମ୍ୟାଚ୍ରେ ପରାଜିତ ହୋଇଥିଲା । ପଏଣ୍ଟ ଟେବୁଲର ଶେଷ ସ୍ଥାନରେ ଲାନସର୍ସ ଏବଂ ସପ୍ତମ ସ୍ଥାନରେ ଗୋନାଶିକା ରହିଛି । ପ୍ରଥମ ମ୍ୟାଚ୍ଟି ନିର୍ଦ୍ଧାରିତ ସମୟରେ ଡ୍ର’ ରହିଥିବାରୁ ଗୋନାଶିକାକୁ ୧ ପଏଣ୍ଟ ମିଳିଥିଲା ।
