ରାଞ୍ଚି,୧୯/୦୧: ଚଳିତ ପୁରୁଷ ହକି ଇଣ୍ଡିଆ ଲିଗ୍ (ଏଚ୍ଆଇଏଲ୍)ରେ ହାଇଦ୍ରାବାଦ ତୋଫାନ୍ସ ଏବଂ ୟୁପି ରୁଦ୍ରସ ବିଜୟ ହାସଲ କରିଛନ୍ତି । ତୋଫାନ୍ସ ୪-୦ରେ ଟେବୁଲ ଟପ୍ପର ତାମିଲନାଡ଼ୁ ଡ୍ରାଗନ୍ସକୁ ପରାସ୍ତ କରିଥିଲା । ଏଥିସହ ଡ୍ରାଗନ୍ସର ବିଜୟଧାରାରେ ବ୍ରେକ୍ ଲାଗିଛି । ତଥାପି ଦଳ (୧୫ପଏଣ୍ଟ) ପଏଣ୍ଟ ତାଲିକାରେ ଶୀର୍ଷ ସ୍ଥାନ ବଜାୟ ରଖିଛି । ଅନ୍ୟ ଏକ ମ୍ୟାଚ୍ରେ ରୁଦ୍ରସ ୧-୦ ଗୋଲ୍ରେ ଗୋନାଶିକାକୁ ହରାଇଥିଲା ।
ତୋଫାନ୍ସ-ଡ୍ରାଗନ୍ସ: ଏହି ମ୍ୟାଚ୍ ଏକତରଫା ହୋଇଥିଲା । ୪ଟି ଯାକ କ୍ୱାର୍ଟରରେ ତୋଫାନ୍ସ ଆଧିପତ୍ୟ ବିସ୍ତାର କରି ଖେଳି ୪ଟି ଗୋଲ୍ ସ୍କୋର କରିଥିଲା । ଦଳ ପକ୍ଷରୁ ଗୋଞ୍ଜାଲୋ ପିଲାଟ ୨ଟି (୨୧, ୪୮ମିନିଟ୍) ଏବଂ ୩୧ମିନିଟ୍ରେ ଆର୍ଥର ଡି ସ୍ଲୋଭର ଓ ୩୩ମିନିଟ୍ରେ ଟିମ୍ ବ୍ରାଣ୍ଡ ଗୋଟିଏ ଲେଖାଏଁ ଗୋଲ୍ କରିଥିଲେ । ସିଜନରେ ଦଳ ପଞ୍ଚମ ବିଜୟ ସହ ପଏଣ୍ଟ ତାଲିକାରେ ଦ୍ୱିତୀୟ ସ୍ଥାନକୁ ଉନ୍ନୀତ ହୋଇଛି । ତୋଫାନ୍ସ ୭ଟି ମ୍ୟାଚ୍ ଖେଳି ମୋଟ ୧୩ ପଏଣ୍ଟ ପାଇଛି ।
ରୁଦ୍ରସ-ଗୋନାଶିକା: ମ୍ୟାଚ୍ ସଂଘର୍ଷପୂର୍ଣ୍ଣ ହୋଇଥିଲା । ପ୍ରଥମ କ୍ୱାର୍ଟରର ଅନ୍ତିମ ମିନିଟରେ ହାର୍ଦ୍ଦିକ ସିଂହଙ୍କ ଗୋଲ୍ ବଳରେ ରୁଦ୍ରସ ୧-୦ରେ ଅଗ୍ରଣୀ ହାସଲ କରିଥିଲା । ଏହାପରେ ବାକି ସମୟର ଖେଳରେ ଆଉ ଗୋଲ୍ ହୋଇନଥିଲା । ଏହି ବିଜୟ ସହ ରୁଦ୍ରସ ପଏଣ୍ଟ ତାଲିକାରେ ତୃତୀୟକୁ ଉଠିଛି । ଦଳ ୭ଟି ମ୍ୟାଚ୍ରୁ ୪ ବିଜୟ, ୩ ପରାଜୟ ସହ ମୋଟ ୧୨ ପଏଣ୍ଟ ପାଇଛି ।
