ରାଞ୍ଚି,୨୩/୦୧: ପୁରୁଷ ଏଚଆଇଏଲରେ ଦିଲ୍ଲୀ ଏସ୍ଜି ପିପର୍ସ ଏବଂ ସୁରମା ହକି କ୍ଲବ୍ ମ୍ୟାଚ୍ ରାଞ୍ଚିରେ ଖେଳାଯାଇଥିଲା । ସୁରମା ବେଶ ଉନ୍ନତ ପ୍ରଦର୍ଶନ କରି ୨-୧ ଗୋଲରେ ଦିଲ୍ଲୀକୁ ପରାଜିତ କରିଥିଲା । ଏଥିସହ ଦଳ ପଏଣ୍ଟ ଟେବୁଲର ତୃତୀୟ ସ୍ଥାନକୁ ଉନ୍ନୀତ ହୋଇଛି । ସିଜନରେ ଏ ପର୍ଯ୍ୟନ୍ତ ୮ଟି ମ୍ୟାଚ୍ରୁ ୩ଟି ବିଜୟ ସହ ୧୪ ପଏଣ୍ଟ ପାଇଛି ।
ସୁରମା ବୁଧବାର ପ୍ରଥମ ଓ ଦ୍ୱିତୀୟ କ୍ୱାର୍ଟରରେ ଗୋଟିଏ ଲେଖାଏଁ ଗୋଲ୍ ଦେଇ ଅଗ୍ରଣୀ ଲାଭ କରିଥିଲା । ନବମ ମିନିଟରେ ହର୍ଜିତ ସିଂ ଏବଂ ୧୭ ମିନିଟରେ ଗୁରଜନ୍ତ ସିଂ ଗୋଲ୍ ସ୍କୋର କରିଥିଲେ । ଦୁଇ ଦଳ ମଧ୍ୟରେ ପରବର୍ତ୍ତୀ ସମୟ ଖେଳ ପ୍ରବଳ ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ରହିଥିଲା । ଦିଲ୍ଲୀ ଗୋଲ ଖାତା ଖୋଲିବା ନେଇ ପ୍ରୟାସ ଜାରି ରଖିଥିବାବେଳେ ସୁରମା ଅଧିକ ଗୋଲ୍ ସ୍କୋର କରିବା ଲକ୍ଷ୍ୟରେ ରହିଥିଲା। ଶେଷରେ ୫୯ ମିନିଟରେ ଦିଲ୍ଲୀ ଖାତା ଖୋଲି ଗୋଟିଏ ଗୋଲ ପରିଶୋଧ କରିଥିଲା । ଗୋଟିଏ ଗୋଲରେ ଆଗୁଆ ରହି ସୁରମା ମ୍ୟାଚ୍ ବିଜୟୀ ହୋଇଥିଲ।।
