ଭୁବନେଶ୍ବର, ୮।୬ : ସୁପ୍ରିମ କୋର୍ଟ ଓକିଲ ତଥା ମାନବାଧିକାର କର୍ମୀ ରାଧାକାନ୍ତ ତ୍ରିପାଠୀଙ୍କର ଦେହାନ୍ତ। ଛାତିରେ ଯନ୍ତ୍ରଣା ହେବାରୁ ତାଙ୍କୁ ଦିଲ୍ଲୀ ଏମ୍ସରେ ଭର୍ତ୍ତି କରା ଯାଇଥିଲା। ଚିକିତ୍ସାଧୀନ ଥିବା ବେଳେ ତାଙ୍କର ଦେହାନ୍ତ ହୋଇଛି। ରାଧାକାନ୍ତ ତ୍ରିପାଠୀଙ୍କ ପୈତୃକ ଗ୍ରାମ ତିହିଡ଼ି ଥାନା ଅନ୍ତର୍ଗତ ତାଳଗୋପବିନ୍ଧା ଗ୍ରାମରେ ।
ପୀଡ଼ିତଙ୍କୁ ନ୍ୟାୟ ଦେବା ପାଇଁ ଜାତୀୟ ମାନବାଧିକାର ଆୟୋଗରେ ୧୬ ହଜାରରୁ ଊର୍ଦ୍ଧ୍ବ ମାମଲା ମାନବାଧିକାର କର୍ମୀ ତଥା ସୁପ୍ରିମକୋର୍ଟ ଓକିଲ ରାଧାକାନ୍ତ ତ୍ରିପାଠୀ ଦାଖଲ କରିଛନ୍ତି । ଏନଏଚଆରସିରେ ସର୍ବାଧିକ ସଂଖ୍ୟକ ମାନବାଧିକାର ମାମଲା ଦାଖଲ କରିବା ଏବଂ ପରବର୍ତ୍ତୀ ସମଯରେ ପୀଡ଼ିତଙ୍କୁ ନ୍ୟାୟ ଦେବା ପାଇଁ ପ୍ରତ୍ୟେକ ମାମଲାରେ ତାଙ୍କ ନିରବଚ୍ଛିନ୍ନ ଉଦ୍ୟମକୁ ଇଣ୍ଡିଆ ବୁକ ଅଫ ରେକର୍ଡ଼ସରେ ପ୍ରଶଂସା କରାଯାଇଛି। ଜାତୀୟ ମାନବାଧିକାର ଆୟୋଗ, ଜାତୀୟ ମହିଳା ଆୟୋଗ, ଜାତୀୟ ଅନସୂଚିତ ଜାତି ଆୟୋଗ, ଜାତୀୟ ଅନସୂଚିତ ଜନଜାତି ଆୟୋଗ ଏବଂ ଜାତୀୟ ଶିଶୁ ସୁରକ୍ଷା ଓ ଅଧିକାର ଆୟୋଗ ଭଳି ସଂସ୍ଥାରେ ମାନବାଧିକାର ଉଲ୍ଲଙ୍ଘନ ନେଇ ବିଗତ ଦିନରେ ବହୁ ଘଟଣାରେ ଆଡଭୋକେଟ ତ୍ରିପାଠୀ ଦୃଷ୍ଟି ଆକର୍ଷଣ କରିଛନ୍ତି। ହୀରାକୁଦ ନଦୀବନ୍ଧ ପ୍ରକଳ୍ପ, କାନପୁର ପ୍ରକଳ୍ପ, ଇନ୍ଦ୍ରାବତୀ ପ୍ରକଳ୍ପ, ସାଳନ୍ଦୀ ସଂସ୍କାର ପ୍ରକଳ୍ପ, ସୁକତେଲ ପ୍ରକଳ୍ପ ଆଦି ଜଳସେଚନ ପ୍ରକଳ୍ପରେ ବିସ୍ଥାପିତଙ୍କ ସମସ୍ୟା, ଗୁଣିଗାରେଡ଼ି ସନ୍ଦେହ, ସାଇକେଲ ପମ୍ପରେ ବନ୍ଧ୍ୟାକରଣ ଅସ୍ତ୍ରୋପଚାର ଆଦି ଘଟଣାରେ ପୀଡ଼ିତଙ୍କୁ ନ୍ୟାୟ ପ୍ରଦାନ ପାଇଁ ବିଗତ ଦିନରେ ଆଡ଼ଭୋକେଟ ତ୍ରିପାଠୀ ଜାତୀୟ ମାନବାଧିକାର ଆୟୋଗଙ୍କ ଦ୍ବାରସ୍ଥ ହୋଇଛନ୍ତି ।
୨୦୧୫ କୋରାପୁଟ ଓ କନ୍ଧମାଳ ଜିଲା ଆଶ୍ରମ ବିଦ୍ୟାଳୟରେ ଦଶମ ଓ ଷଷ୍ଠ ଶ୍ରେଣୀରେ ପଢ଼ୁଥିବା ଦୁଇଜଣ ଛାତ୍ରୀ ସନ୍ତାନ ପ୍ରସବ କରିବା ଘଟଣାରେ ଆଡଭୋକେଟ ତ୍ରିପାଠୀଙ୍କ ଉଦ୍ୟମକ୍ରମେ ପୀଡ଼ିତାଙ୍କୁ ରାଜ୍ୟ ସରକାର ଏକ ଲକ୍ଷ ଟଙ୍କା ଲେଖାଏଁ କ୍ଷତିପୂରଣ ରାଶି ପ୍ରଦାନ କରିଥିଲେ।
