ୱିଙ୍ଗ କମାଣ୍ଡରଙ୍କୁ ଶୁକ୍ରବାର ଛଡାଯିବ ବୋଲି ପାକିସ୍ତାନ ସଂସଦରେ କହିଲେ ଇମ୍ରାନ୍

ନୁଆଦିଲ୍ଲୀ ୨୮/୨: ପାକିସ୍ତାନ ପିଏମ୍ ଇମ୍ରାନ୍ ଖାନ୍ ପାକ୍ ସଂସଦରେ ଘୋଷଣା କରିଛନ୍ତି ଯେ ଭାରତୀୟ ପାଇଲଟ ଅଭିନନ୍ଦନଙ୍କୁ ଶୁକ୍ରବାର ମୁକ୍ତ କରିଦିଆଯିବ ।

ପାକିସ୍ତାନକୁ ଡର ଥିଲା ଯେ ଭାରତ ଅଭିନନ୍ଦନଙ୍କ ମୁକ୍ତି ପାଇଁ କିଛି ବଡ ପଦକ୍ଷେପ ଉଠାଇପାରେ । ପିଏମ୍ ଇମ୍ରାନ୍ ଖାନ୍ ପାକିସ୍ତାନ ସଂସଦରେ କହିଛନ୍ତି, ‘ଭାରତ ଆମକୁ ଗତକାଲିଠାରୁ ସନ୍ଦେଶ ପଠାଇଛି । ଅନ୍ଯ ଦେଶମାନେ ମଧ୍ଯ ଆଲୋଚନା ମାଧ୍ଯମରେ ଏହି ତିକ୍ତତାକୁ କମ୍ କରିବାପାଇଁ କହିଛନ୍ତି ।’ ସେ ଏହା ମଧ୍ଯ କହିଛନ୍ତି, ‘ଆମେ ତିକ୍ତତାକୁ କମ୍ କରିବାକୁ ଚାହୁଁଛୁ । ଏଥିପାଇଁ ଆମେ ଭାରତୀୟ କମାଣ୍ଡରଙ୍କୁ ଫେରାଇଦେବାପାଇଁ ନିଷ୍ପତ୍ତି ନେଲୁ ।’

କହିରଖୁଛୁ ବୁଧବାର ନିୟନ୍ତ୍ରଣ ରେଖା ନିକଟରେ ଭାରତ ଓ ପାକିସ୍ତାନର ବାୟୁସେନା ମଧ୍ୟରେ ଭୀଷଣ ସଂଘର୍ଷ ସମୟରେ ଭାରତୀୟ ସେନାର ଏକ ମିଗ୍-୨୧ କ୍ରାଶ୍ ହେବା ଫଳରେ ଜଣେ ପାଇଲଟ୍ ସୀମା ସେପଟେ ଖସି ପଡିଥିଲେ । ଭାରତୀୟ ୱିଙ୍ଗ କମାଣ୍ଡର ଅଭିନନ୍ଦନଙ୍କୁ ସେହି ସମୟରେ ଗିରଫ କରିନେଇଥିଲା ପାକିସ୍ତାନୀ ସେନା ।