ନୂଆଦିଲ୍ଲୀ,୧୨/୧୨: ବର୍ଡର-ଗାଭାସ୍କର ଟ୍ରଫି ୨୦୨୪ ରେ ଭାରତ ଏବଂ ଅଷ୍ଟ୍ରେଲିଆ ୧-୧ରେ ବରାବର ଅଛନ୍ତି। ତୃତୀୟ ଟେଷ୍ଟ ମ୍ୟାଚ୍ ୧୪ ଡିସେମ୍ବରରୁ ବ୍ରିସବେନ୍ରେ ଖେଳାଯିବ। ବିଶ୍ୱ ଟେଷ୍ଟ ଚାମ୍ପିଅନସିପ୍ ଫାଇନାଲ୍ ପାଇଁ ଦୌଡ଼ ଏକ ରୋମାଞ୍ଚକର ମୋଡ଼ରେ ଥିବାରୁ ଉଭୟ ଦଳ ଗାବାରେ ଏକ ବଡ଼ ବିଜୟ ହାସଲ କରିବାକୁ ଚାହିଁବେ। ପର୍ଥ ଟେଷ୍ଟରେ ଟିମ୍ ଇଣ୍ଡିଆ ୨୯୫ ରନ୍ରେ ଜିତିଥିବାବେଳେ ଆଡିଲେଡରେ ଖେଳାଯାଇଥିବା ଗୋଲାପୀ ବଲ୍ ଟେଷ୍ଟ ପାଇଁ ଭାରତୀୟ ଦଳ ଅନେକ ପରିବର୍ତ୍ତନ କରିଥିଲା। ଏଥର ବ୍ରିସବେନ ପିଚକୁ ନେଇ ପ୍ରଶ୍ନ ଉଠିଛି କି ସ୍ପିନରମାନଙ୍କ ପାଇଁ ଏହି ଗ୍ରାଉଣ୍ଡ ସହାୟକ ହେବ ନା ଦ୍ରୁତ ବୋଲରମାନେ ପୁଣିଥରେ ହଇରାଣ ହେବେ! ବ୍ରିସବେନରେ ଏପର୍ଯ୍ୟନ୍ତ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ମୋଟ ୭ ଟି ମ୍ୟାଚ୍ ଖେଳାଯାଇଛି, ସେଥିମଧ୍ୟରୁ ଭାରତ କେବଳ ଥରେ ଜିତିଛି, ଅଷ୍ଟ୍ରେଲିଆ ପାଞ୍ଚ ଥର ଜିତିଛି ଏବଂ ଗୋଟିଏ ମ୍ୟାଚ ଡ୍ର ରହିଥିଲା। କିନ୍ତୁ ଏହି ଗ୍ରାଉଣ୍ଡରେ ଖେଳାଯାଇଥିବା ଶେଷ ମ୍ୟାଚରେ ଭାରତ ଏକ ଐତିହାସିକ ବିଜୟ ହାସଲ କରିଥିଲା।
ବ୍ରିସବେନ୍ ପିଚ୍ ରିପୋର୍ଟ:
ବ୍ରିସବେନ୍ ସ୍ଥିତ ଗାବା ଗ୍ରାଉଣ୍ଡର ପିଚ୍କୁ ନେଇ କ୍ୟୁରେଟର ଡେଭିଡ ସାଣ୍ଡୁସ୍କି ସ୍ପଷ୍ଟ ଭାବରେ କହିଛନ୍ତି ଯେ ଦ୍ରୁତ ବୋଲିଂ ଦୃଷ୍ଟିରୁ ପିଚ୍ ସମ୍ପୁର୍ଣ୍ଣ ପ୍ରସ୍ତୁତ ଅଛି। ତାଙ୍କ କହିବାନୁସାରେ, ମ୍ୟାଚ୍ ଯେଉଁଭଳି ଭାବେ ଆଗକୁ ବଢ଼ିବ, ପିଚ୍ରେ ଫାଟ ଦେଖାଦେଇପାରେ। ସବୁଥର ପରି, ଗାବା ପିଚ୍ ଦ୍ରୁତ ଗତିରେ ଏବଂ ବାଉନ୍ସରେ ଦ୍ରୁତ ବୋଲରମାନଙ୍କୁ ସହାୟକ ହୋଇଛି। ଏହା ସ୍ପଷ୍ଟ କରୁଛି ଯେ ବ୍ୟାଟରମାନଙ୍କୁ ଏଠାରେ ଅଧିକ ରନ୍ ସ୍କୋର କରିବା ସହଜ ହେବ ନାହିଁ। ଇତିହାସ ଏହା ମଧ୍ୟ ଦର୍ଶାଏ ଯେ ବ୍ରିସବେନ୍ରେ ଦ୍ରୁତ ବୋଲରମାନେ ଆରମ୍ଭରୁ ହଇଚଇ ସୃଷ୍ଟି କରିଥାଆନ୍ତି, କିନ୍ତୁ ପିଚ୍ର ମିଜାଜ୍କୁ ଯେଉଁ ବ୍ୟାଟର ବୁଝିଛନ୍ତି, ସେମାନଙ୍କ ପାଇଁ ଏହି ପିଚ୍ରେ ଶତକ କରିବା ସହଜ ହେବ।
କିପରି ହୋଇପାରେ ସମ୍ଭାବିତ ଏକାଦଶ:
ଆଡିଲେଡ୍ ଟେଷ୍ଟରେ ଷଷ୍ଠ ସ୍ଥାନରେ ବିଫଳ ହୋଇଥିବା କ୍ୟାପଟେନ ରୋହିତ ଶର୍ମା ପୁଣି ଓପିନିଂ କରିପାରନ୍ତି। ତାଙ୍କୁ ମଧ୍ୟ ନେଟ୍ରେ ନୂଆ ବଲ୍ରେ ଅଭ୍ୟାସ କରୁଥିବା ଦେଖିବାକୁ ମିଳିଛି। ତାଙ୍କ ସହ ଯଶସ୍ବୀ ଜୟସୱାଲ ଓପନିଂ କରିପାରନ୍ତି, ସେପଟେ ଶୁଭମାନ ଗିଲ ଏବଂ ବିରାଟ କୋହଲି ତୃତୀୟ ଓ ଚତୁର୍ଥ ସ୍ଥାନରେ ବ୍ୟାଟିଂ କରିବାକୁ ଆସିପାରନ୍ତି। ପ୍ରଥମ ଦୁଇଟି ଟେଷ୍ଟ ମ୍ୟାଚ୍ରେ ଓପନିଂ କରିଥିବା କେ.ଏଲ୍ ରାହୁଲଙ୍କୁ ୫ ନମ୍ବରରେ ପଠାଯାଇପାରେ ଏବଂ ଋଷଭ ପନ୍ତଙ୍କୁ ୬ ନମ୍ବରରେ ବ୍ୟାଟିଂ କରିବାକୁ ପଠାଯାଇପାରେ।
ନୀତୀଶ କୁମାର ରେଡ୍ଡୀ ଏପର୍ଯ୍ୟନ୍ତ ସମସ୍ତ ଚାରି ଇନିଂସରେ ପ୍ରଭାବି ସାବ୍ୟସ୍ତ ହୋଇଛନ୍ତି ଏବଂ ଚାରିଥର ଅର୍ଦ୍ଧଶତକ ହାସଲ କରିଛନ୍ତି। ତାଙ୍କ ସ୍ଥାନ ପ୍ରାୟ ନିଶ୍ଚିତ ହୋଇଛି, କିନ୍ତୁ ସ୍ପିନରଙ୍କୁ ନେଇ ଏବେ ଟିମ୍ ଇଣ୍ଡିଆରେ ପ୍ରଶ୍ନବାଚୀ ସୃଷ୍ଟି ହୋଇଛି। ପର୍ଥ ଟେଷ୍ଟରେ ତାଙ୍କର ପ୍ରଦର୍ଶନ ଏବଂ ବର୍ତ୍ତମାନର ଫର୍ମକୁ ବିଚାରକୁ ନେଇ ୱାଶିଂଟନ୍ ସୁନ୍ଦରଙ୍କୁ ପୁଣି ଦଳରେ ସାମିଲ କରାଯାଇପାରେ। ଜସପ୍ରୀତ ବୁମ୍ରା ଏବଂ ମହମ୍ମଦ ସିରାଜ ଉଭୟ ନୂଆ ବଲ୍ ଦାୟିତ୍ୱ ତୁଲାଇବେ। କିନ୍ତୁ ଆଡିଲେଡ୍ ଟେଷ୍ଟରେ ୧୬ ଓଭରରେ ୮୬ ରନ୍ ଦେଇଥିବା ହର୍ଷିତ ରାଣା ବାଦ୍ ପଡ଼ିପାରନ୍ତି। ପ୍ରସିଦ୍ଧ କୃଷ୍ଣ ତାଙ୍କ ସ୍ଥାନରେ ଏକ ସୁଯୋଗ ପାଇପାରନ୍ତି।
ତୃତୀୟ ଟେଷ୍ଟ ପାଇଁ ସମ୍ଭାବିତ ଏକାଦଶ:
ରୋହିତ ଶର୍ମା, ଯଶସ୍ୱୀ ଜୟସୱାଲ, ଶୁଭମନ ଗିଲ, ବିରାଟ କୋହଲି, କେ.ଏଲ୍ ରାହୁଲ, ଋଷଭ ପନ୍ତ, ନୀତୀଶ କୁମାର ରେଡ୍ଡୀ, ୱାଶିଂଟନ୍ ସୁନ୍ଦର, ଜସପ୍ରୀତ ବୁମ୍ରା, ପ୍ରସିଦ୍ଧ କୃଷ୍ଣ, ମହମ୍ମଦ ସିରାଜ
