ନୂଆଦିଲ୍ଲୀ,୨୪/୧୦: ଭାରତ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ଚାଲିଥିବା ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ଦ୍ୱିତୀୟ ମ୍ୟାଚ୍ ଗୁରୁବାର ପୁଣେର ମହାରାଷ୍ଟ୍ର କ୍ରିକେଟ୍ ଆସୋସିଏସନ୍ ଷ୍ଟାଡିୟମରେ ଖେଳାଯାଇଛି। ପ୍ରଥମ ଦିନର ଖେଳ ଶେଷ ହେବା ସୁଦ୍ଧା ଭାରତ ଏହାର ପ୍ରଥମ ଇନିଂସରେ ଗୋଟିଏ ୱିକେଟ୍ ହରାଇ ୧୬ ରନ୍ କରିଛି। ଶୁଭମାନ ଗିଲ ୧୦ ଏବଂ ଯଶସ୍ବି ଜୟସୱାଲ ୬ ରନ କରି କ୍ରିଜ୍ରେ ଥିବା ବେଳେ ଖାତା ନ ଖୋଲି ପାରି ରୋହିତ ଶର୍ମା ଟିମ୍ ସାଉଥୀଙ୍କ ଦ୍ବାାରା ଆଉଟ୍ ହୋଇଥିଲେ। ଟିମ୍ ଇଣ୍ଡିଆ ବର୍ତ୍ତମାନ ପ୍ରଥମ ଇନିଂସରେ ୨୪୩ ରନ୍ ପଛରେ ରହିଛି। ପୁଣେ ଟେଷ୍ଟରେ ୱାଶିଂଟନ୍ ସୁନ୍ଦର ପ୍ରଥମ ଦିନର ଷ୍ଟାର୍ ପ୍ଳେୟର ଥିଲେ, ଯିଏକି କିୱି ଦଳର ୭ ଜଣ ବ୍ୟାଟରଙ୍କୁ ପାଭିଲିୟ ରାସ୍ତା ଦେଖାଇଥିଲେ। ଏହା ତାଙ୍କ କ୍ୟାରିୟରର ସର୍ବୋତ୍ତମ ପ୍ରଦର୍ଶନ ଥିଲା।
ଏହାପୂର୍ବରୁ ନ୍ୟୁଜିଲ୍ୟାଣ୍ଡ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। କିଓ୍ବି ଦଳ ପ୍ରଥମ ଇନିଂସ ଟି ବ୍ରେକ୍ ପରେ ୭୯.୧ ଓଭରରେ ୨୫୯ ରନ୍ କରି ସମସ୍ତ ଓ୍ବିକେଟ ହରାଇଥିଲେ। ଦଳର ଶେଷ ୱିକେଟ୍ ମାତ୍ର ୬୨ ରନ୍ ଭିତରେ ପଡ଼ିଥିଲା। କ୍ୟାପଟେନ ଲଥାମ ପୁଣି ଥରେ ଏକ ବଡ଼ ଇନିଂସ ଖେଳିବାରେ ବିଫଳ ହୋଇଥିଲେ। ଲାଥମଙ୍କୁ ୧୫ ରନ୍ରେ ଆଉଟ୍ କରିଥିଲେ ଅଶ୍ବିନୀ। ୱିଲ୍ ୟଙ୍ଗ୍ ମାତ୍ର ୧୮ ରନ୍ ସ୍କୋର କରିବା ପରେ ପାଭିଲିୟନକୁ ଫେରିଥିଲେ। କିନ୍ତୁ ଏହା ପରେ ଡିଭନ୍ କନୱେ ଏବଂ ରଚିନ୍ ରବିନ୍ଦ୍ରଙ୍କ ୬୨ ରନ୍ର ଭାଗିଦାରୀ କିୱି ଦଳକୁ ଏକ ଦୃଢ଼ ସ୍ଥିତିରେ ରଖିଥିଲା। କନୱେ ୭୬ ରନର ଅର୍ଦ୍ଧଶତକ ଏବଂ ରବିନ୍ଦ୍ର ୬୫ ରନର ଅର୍ଦ୍ଧଶତକୀୟ ପାଳି ଖେଳିଥିଲେ। ମିଚେଲ ସାଣ୍ଟନର୍ ୫୧ ବଲରେ ୩୩ ରନର ଦ୍ରୁତ ଇନିଂସ ଖେଳିଥିଲେ। ଏହି ତିନି ଜଣଙ୍କ ବ୍ୟତୀତ ତାଙ୍କର କୌଣସି ବ୍ୟାଟର ଭଲ ପ୍ରଦର୍ଶନ କରିପାରିନଥିଲେ।
