ନୂଆଦିଲ୍ଲୀ : ରୁଷ୍କୁ ରୋକଠୋକ୍ କହିଲା ଭାରତ। ରୁଷୀୟ ସେନାରେ ସେବାରତ ଥିବା ଭାରତୀୟଙ୍କୁ ଶୀଘ୍ର ଛାଡ଼। ଭାରତ ମଙ୍ଗଳବାର ରୁଷ୍କୁ ଦୃଢ ଦାବି ପୂର୍ବକ କହିଛି, ରୁଷୀୟ ସେନାରେ ସେବା ଦେଉଥିବା ସବୁ ଭାରତୀୟ ନାଗରିକଙ୍କୁ ତୁରନ୍ତ ମୁକ୍ତ କର। ଏହି ଦାବି ଏହି ସମୟରେ ଉଠିଛି , ଯେତେବେଳେ ୟୁକ୍ରେନ ସହ ସଂଘର୍ଷରେ ଆଉ ଜଣେ ଭାରତୀୟ ନାଗରିକଙ୍କ ମୃତ୍ୟୁ ହୋଇଛି। ସୂଚନା ଆଧାରରେ , ଏହି ଯୁଦ୍ଧରେ ଏବେସୁଦ୍ଧା ୧୦ ଭାରତୀୟଙ୍କ ଜୀବନ ଯାଇ ସାରିଛି।
ବିଦେଶ ମନ୍ତ୍ରାଳୟ କହିଛି ଯେ, କେରଳର ଜଣେ ଭାରତୀୟ ନାଗରିକ ବିନିଲ ବାବୁଙ୍କର (୩୧) ଯୁଦ୍ଧରେ ମୃତ୍ୟୁ ହୋଇଛି। ସେ ତ୍ରିଶୂର ଜିଲ୍ଲାର କୁଟ୍ଟନେଲୁରର ନିବାସୀ ଥିଲେ। ଏହି ରାଜ୍ୟର ଆଉ ଜଣେ ନାଗରିକ ଆହତ ହୋଇଛନ୍ତି, ଯିଏ ବର୍ତ୍ତମାନ ମସ୍କୋର ଏକ ହସ୍ପିଟାଲରେ ଚିକିତ୍ସିତ ହେଉଛନ୍ତି। ମନ୍ତ୍ରଣାଳୟ ମୃତକଙ୍କ ପରିସ୍ଥିତି ନେଇ ବିସ୍ତୃତ ସୂଚନା ଦେଇ ନାହିଁ।
ଭାରତ ସରକାର ରୁଷ୍ର ସେନା ଦଳରେ ସହାୟକ ଷ୍ଟାଫ୍, ଯେମିତି କି ରୋଷେୟା ଓ ସହାୟକ ଭାବେ କାର୍ଯ୍ୟରତ ଭାରତୀୟ ନାଗରିକଙ୍କ ମୁକ୍ତିକୁ ନେଇ ପୂର୍ବରୁ ମଧ୍ୟ ଦାବି କରି ସାରିଛି। ଏହି ମାମଲା ଗତବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଦୁଇଟି ବୈଠକରେ ଉଠାଯାଇ ଥିଲା।
ବିଦେଶ ମନ୍ତ୍ରଣାଳୟର ପ୍ରବକ୍ତା ରଣଧୀର ଜୟସୱାଲ କହିଛନ୍ତି, ଆମେ କେରଳର ଜଣେ ଭାରତୀୟ ନାଗରିକଙ୍କ ଦୁର୍ଭାଗ୍ୟପୂର୍ଣ୍ଣ ମୃତ୍ୟୁ ବିଷୟରେ ସୂଚନା ପାଇଛୁ, ଯାହାଙ୍କୁ କି ରୁଷୀୟ ସେନାରେ ଭର୍ତ୍ତି କରାଯାଇ ଥିଲା। ଆଉ ଜଣେ ନାଗରିକ ଆହତ ହୋଇଛନ୍ତି ଏବଂ ତାଙ୍କର ମସ୍କୋ ହସ୍ପିଟାଲରେ ଚିକିତ୍ସା ଚାଲୁ ରହିଛି। ଏହି ମାମଲାକୁ ମସ୍କୋରେ ରୁଷୀୟ ଅଧିକାରୀମାନେ ଓ ନୂଆ ଦିଲ୍ଲୀରେ ରୁଷୀୟ ଦୂତାବାସର ସମ୍ମୁଖରେ ଦୃଢ ଭାବେ ଉଠାଯାଇଛି। ଜୟସୱାଲ କହିଛନ୍ତି କି , ମୃତକଙ୍କ ପାର୍ଥିବ ଶରୀରକୁ ଭାରତ ଆଣିବାର ପ୍ରକ୍ରିୟା ଜାରି ରହିଛି ଏବଂ ଆହତ ବ୍ୟକ୍ତିଙ୍କର ଖୁବ୍ ଶୀଘ୍ର ମୁକ୍ତ ଓ ସ୍ୱଦେଶ ଫେରିବା ପାଇଁ ରୁଷ୍କୁ ଅନୁରୋଧ କରାଯାଇଛି।
ଭାରତ ଏହା ମଧ୍ୟ ଦାବି କରିଛି କି, ଅନେକ ଭାରତୀୟ ନାଗରିକଙ୍କୁ ଠକି ବା ଭୁଲ ଉପାୟରେ ନିଯୁକ୍ତି କରି ଏଜେଣ୍ଟଙ୍କ ଦ୍ୱାରା ରୁଷୀୟ ସେନାରେ ସାମିଲ କରାଯାଇଛି। ଏହି ସମ୍ୱନ୍ଧରେ ଗତ ବର୍ଷ କେନ୍ଦ୍ରୀୟ ଯାଞ୍ଚ ବ୍ୟୁରୋ (ସିବିଆଇ) ୧୯ ଜଣ ବ୍ୟକ୍ତି ଓ ଏଜେନ୍ସିଙ୍କ ବିରୋଧରେ ମାମଲା ରୁଜୁ କରି ଅନେକ ଗିରଫଦାରୀ କରି ଥିଲା। ରୁଷୀୟ ଦୂତାବାସ ଗତ ବର୍ଷ ସୂଚନା ଦେଇଥିଲା ଯେ, ଭାରତୀୟ ନାଗରିକଙ୍କ ନିଯୁକ୍ତି ଅପ୍ରେଲ ୨୦୨୪ପରେ ରୋକି ଦିଆ ଯାଇଛି ଏବଂ ବର୍ତ୍ତମାନ ତାଙ୍କର ଖୁବ୍ ଶୀଘ୍ର ମୁକ୍ତି ସୁନିଶ୍ଚିତ କରିବାର ପ୍ରୟାସ କରାଯାଉଛି।
