ନୂଆଦିଲ୍ଲୀ: ରଙ୍ଗର ପର୍ବ ହୋଲିକୁ ନେଇ ଗାଁଠୁ ସହର ସବୁଠି ଉତ୍ସବର ପରିବେଶ । ଏହାରି ଭିତରେ ବିଭିନ୍ନ ରାଜ୍ୟ ମଦ୍ୟପାନକୁ ନେଇ ବିଭିନ୍ନ ମାର୍ଗଦର୍ଶିକା ଜାରି କରିଛନ୍ତି । ଓଡ଼ିଶାରେ ମଦ୍ୟପାନ କରି ହୋଲି ଖେଳିବା ଉପରେ ରୋକ୍ ଲାଗିଛି । ଦେଶରେ ଅନ୍ୟ ସ୍ଥାନରେ ମଧ୍ୟ ସେହି ଦିନ ମଦ୍ୟପାନ ଉପରେ କଟକଣା ଜାରି କରାଯାଇଛି । ସେହିଭଳି ମହାରାଷ୍ଟ୍ରରେ ହୋଲି ଦିନ ମଦ ଦୋକାନ ଅଧିକ ଦେଢ଼ ଘଣ୍ଟା ଖୋଲିବାକୁ ସରକାର ନିର୍ଦ୍ଦେଶ ଦେଇଛନ୍ତି । ମଦକୁ ନେଇ ଭିନ୍ନ ଭିନ୍ନ ଆଇନ୍ ଆସୁଥିବା ବେଳେ ଆସନ୍ତୁ ଜାଣିବା ଭାରତରେ ମଦର ଚାହିଦା କେମିତି ରହିଛି । ଦେଶରେ ବିୟର, ହ୍ବିସ୍କି, ବ୍ରାଣ୍ଡି, ରମ୍...ଇତ୍ୟାଦି ମଧ୍ୟରୁ ଅଧିକ କେଉଁ ମଦକୁ ଲୋକେ ପସନ୍ଦ କରୁଛନ୍ତି ।
୨୦୨୩ର ତଥ୍ୟକୁ ଦେଖିଲେ, ଦେଶରେ ସେହିବର୍ଷ ୩୦୦ କୋଟି ଲିଟର ପିଇଛନ୍ତି ଲୋକେ । କିନ୍ତୁ ଏହା ସତ୍ତ୍ବେ ବିୟର ପିଇବା ମାମଲାରେ ବିଶ୍ବରେ ୧୦୧ ନମ୍ବର ସ୍ଥାନରେ ରହିଛି ଭାରତ । ବିଶେଷ କରି ଆଲକହଲିକ୍ ଡ୍ରିଙ୍କ କ୍ଷେତ୍ରରେ ଭାରତୀୟ ବିୟର ପିଇବାକୁ ବେଶୀ ପସନ୍ଦ କରୁଛନ୍ତି । ଟେକ୍ନୋପାକ୍ ଆଡଭାଇଜର୍ସର ଏକ ରିପୋର୍ଟ ଅନୁଯାୟୀ, ଭାରତରେ ମଦ ବଜାର (ଯାହା ବିଭିନ୍ନ ପ୍ରକାରର ମଦ ଅନ୍ତର୍ଭୁକ୍ତ) ପ୍ରାୟ ୩ ଲକ୍ଷ ୧୫ ହଜାର କୋଟି ଟଙ୍କା ମୂଲ୍ୟର ଥିଲା । ଭାରତୀୟ ମଦ୍ୟପାନ ବଜାରରେ ବିୟରର ୪୫ ପ୍ରତିଶତ ଅଂଶ ରହିଛି ।
ସେହିଭଳି ହ୍ୱିସ୍କିର ଅଂଶ ୩୪ ପ୍ରତିଶତ, ବ୍ରାଣ୍ଡିର ଅଂଶ ପ୍ରାୟ ୧୧ ପ୍ରତିଶତ ଏବଂ ରମର ଭାଗିଦାରୀ ପ୍ରାୟ ୬.୫ ପ୍ରତିଶତ ରହିଛି । ଜାପାନୀ ବିୟର କମ୍ପାନୀ କିରିନ୍ ହୋଲ୍ଡିଂସ୍ ଅନୁଯାୟୀ, ଭାରତର ଲୋକମାନେ ୨୦୨୩ରେ ୩୦୦ କୋଟି ଲିଟର ବିୟର ପିଇଛନ୍ତି । ଫଳସ୍ୱରୂପ, ଭାରତ ଚଳିତ ବର୍ଷ ସାରା ବିଶ୍ୱରେ ୧୩ ତମ ସ୍ଥାନରେ ରହିଛି। କିନ୍ତୁ ଯଦି ଆମେ ମୁଣ୍ଡପିଛା ମଦ୍ୟପାନ ବିଷୟରେ କହିବା, ତେବେ ଭାରତ ୧୦୧ତମ ସ୍ଥାନରେ ରହିଛି ।
କିରିନ୍ ହୋଲ୍ଡିଂସ୍ ଅନୁଯାୟୀ, ଭାରତରେ ଜଣେ ବ୍ୟକ୍ତି ବାର୍ଷିକ ହାରାହାରି ୨.୧ ଲିଟର ବିୟର ପିଅନ୍ତି। ଏହି ତାଲିକାର ଶୀର୍ଷରେ ଚେକ୍ ଗଣରାଜ୍ୟ ଅଛି ଯେଉଁଠାରେ ପ୍ରତିବର୍ଷ ଜଣେ ବ୍ୟକ୍ତି ୧୫୨ ଲିଟର ବିୟର ପିଉଛନ୍ତି । ଏହା ପରେ ଆଉ ଏକ ୟୁରୋପୀୟ ଦେଶ ଅଷ୍ଟ୍ରିଆ ରହିଛି । ସେଠାରେ ପ୍ରତି ବ୍ୟକ୍ତି ବାର୍ଷିକ ହାରାହାରି ୧୦୬.୫ ଲିଟର ପିଉଛନ୍ତି । ଲିଥୁଆନିଆ ତୃତୀୟ ସ୍ଥାନରେ ଅଛି । ସେଠାରେ ପ୍ରତି ବ୍ୟକ୍ତି ବାର୍ଷିକ ୧୦୩.୩ ଲିଟର ବିୟର ପିଉଥିବା ରିପୋର୍ଟରୁ ଜଣାପଡ଼ିଛି ।
ଏହି ରାଙ୍କିଂରେ ଆମେରିକା ୨୭ତମ ସ୍ଥାନରେ ଥିବା ବେଳେ ବ୍ରିଟେନ୍ ୨୫ ତମ ସ୍ଥାନରେ ଏବଂ ରୁଷ ୩୧ତମ ସ୍ଥାନରେ ରହିଛି । ଆମେରିକାରେ ପ୍ରତିବର୍ଷ ଜଣେ ବ୍ୟକ୍ତି ପ୍ରାୟ ୬୧.୧ ଲିଟର ବିୟର ପିଉଛନ୍ତି । ୟୁକେରେ ଜଣେ ବ୍ୟକ୍ତି ବାର୍ଷିକ ହାରାହାରି ୬୫.୫ ଲିଟର ଏବଂ ରୁଷରେ ୬୦.୪ ଲିଟର ବିୟର ପିଉଛନ୍ତି । ଏହି ସବୁ ଦେଶ ତୁଳନାରେ ଭାରତରେ ବିୟର ପିଇବା ପରିମାଣ ଖୁବ କମ । ଏହା ପଛରେ ସାମାଜିକ, ସାଂସ୍କୃତିକ ଏବଂ ଅର୍ଥନୈତିକ କାରଣ ରହିଛି ବୋଲି ରିପୋର୍ଟରେ ଦର୍ଶାଯାଇଛି ।
