ମେଲବର୍ଣ୍ଣ, ୩୧/୧୦: ଆଜି ଘରୋଇ ଅଷ୍ଟ୍ରେଲିଆ ଓ ଭାରତ ମଧ୍ୟରେ ଖେଳାଯିବ ଦ୍ୱିତୀୟ ଟି-ଟ୍ୱେଣ୍ଟି । କାନବେରା ଭଳି ମେଲବର୍ଣ୍ଣରେ ମଧ୍ୟ ବର୍ଷାର ପ୍ରଭାବ ଦେଖିବାକୁ ମିଳିବ । ତଥାପି ସମ୍ପୂର୍ଣ୍ଣ ମ୍ୟାଚ ଖେଳାଯାଇପାରିବ ବୋଲି ପାଣିପାଗ ସୂତ୍ରରୁ ଜଣା ପଡ଼ିଛି । ପ୍ରଥମ ମ୍ୟାଚ୍ ବର୍ଷା ଧୋଇ ନେବା ପରେ ଉଭୟ ଦଳ ଏବେ ବିଜୟ ପାଇଁ ବ୍ୟାକୁଳ । ଐତିହାସିକ ମେଲବର୍ଣ୍ଣ କ୍ରିକେଟ୍ ଗ୍ରାଉଣ୍ଡରେ ଏହି ମ୍ୟାଚ୍ ଖେଳାଯାଉଥିବାରୁ ପାଖା ପାଖି ୯୦,୦୦୦ ଦର୍ଶକ ଷ୍ଟାଡ଼ିୟମ୍ରେ ପହଞ୍ଚିବେ । ଫଳରେ ଆଜି ସଂଘଷପୂର୍ଣ୍ଣ ମୁକାବିଲା ଦେଖିବାକୁ ମିଳିବ ।
ଆସନ୍ତା ବର୍ଷ ହେବାକୁ ଥିବା ଟି-ଟ୍ୱେଣ୍ଟି ବିଶ୍ୱକପ୍ ପାଇଁ ଉଭୟ ଦଳ ଏହି ସିରିଜ ଜରିଆରେ ପ୍ରସ୍ତୁତି ଆରମ୍ଭ କରିଛନ୍ତି । ତେଣୁ ସମୟ ପୂର୍ବରୁ ନିଜ ନିଜର ଦୋଷ ଦୁର୍ବଳତାକୁ ସୁଧାରିବା ପାଇଁ ଉଭୟ ଦଳ ପ୍ରୟାସ କରିବେ । କାନବେରାରେ ଅନୁଷ୍ଠିତ ପ୍ରଥମ ମ୍ୟାଚ୍ରେ ମାତ୍ର ୯.୪ ଓଭର ଖେଳ ସମ୍ଭବ ହୋଇଥିଲା । ଏହାପରେ ବର୍ଷା ହେବାରୁ ମ୍ୟାଚ ବାତିଲ କରାଯାଇଥିଲା । ଏହି ସୀମିତ ସମୟ ମଧ୍ୟରେ ଭାରତୀୟ ଟପ ଅର୍ଡର ବ୍ୟାଟର ମନୋଭାବ ସ୍ପଷ୍ଟ କରି ଦେଇଥିଲେ । ବିଶ୍ୱର ଯେକୌଣସି ଗ୍ରାଉଣ୍ଡ୍ରେ ମଧ୍ୟ ଦଳ ନିର୍ଭୟରେ ବିସ୍ଫୋରକ ବ୍ୟାଟିଂ କରିବାକୁ ପ୍ରସ୍ତୁତ ରହିଛି । ତେଣୁ ଅଭିଷେକ ଶର୍ମା, ଶୁଭମନ ଗିଲ, ସୂର୍ଯ୍ୟକୁମାର ଯାଦବ, ତିଳକ ବର୍ମା ପ୍ରମୁଖ ମେଲବର୍ଣ୍ଣରେ ଧୂଆଁଧାର ବ୍ୟାଟିଂ କରିବାକୁ ଲକ୍ଷ୍ୟ ରଖିଛନ୍ତି ।
ନାଥାନ ଏଲିସ, ଟିମ ଡେଭିଡଙ୍କ ଭଳି ଅଷ୍ଟ୍ରେଲିଆ ଦଳର କିଛି ଖେଳାଳି ଏହି ଗ୍ରାଉଣ୍ଡରେ କୌଣସି ଅନ୍ତର୍ଜାତୀୟ ମ୍ୟାଚ୍ ଖେଳି ନାହାନ୍ତି । ତେଣୁ ଏମାନେ ଆଜିର ମ୍ୟାଚ୍କୁ ନେଇ ଉତ୍ସାହିତ ରହିଛନ୍ତି । ଟି-ଟ୍ୱେଣ୍ଟି ବୋଲିଂ ମାନ୍ୟତା ତାଲିକା ଶୀର୍ଷରେ ରହିଥିବା ବରୁଣ ଚକ୍ରବର୍ତ୍ତୀ ଏପର୍ଯ୍ୟନ୍ତ କୌଣସି ଅନ୍ତର୍ଜାତୀୟ ଟି-ଟ୍ୱେଣ୍ଟିରେ ଅଷ୍ଟ୍ରେଲିଆ ବ୍ୟାଟରଙ୍କୁ ବୋଲିଂ କରି ନାହାନ୍ତି । ଏହି ଖେଳାଳିମାନଙ୍କ ପାଇଁ ମେଲବର୍ଣ୍ଣ ସ୍ମରଣୀୟ ରହିବ ।
ଭାରତ ମେଲବର୍ଣ୍ଣରେ ୬ଟି ଟି-ଟ୍ୱେଣ୍ଟି ଖେଳିଛି ଓ ୪ଟିରେ ବିଜୟୀ ହୋଇଛି । ଆଜି ଆଉ ଏକ ବିଜୟ ଫର୍ଦ୍ଦ ଯୋଡ଼ିବାକୁ ଦଳ ଲକ୍ଷ୍ୟ ରଖିଛି । ଅଷ୍ଟ୍ରେଲିଆ ଅଧିନାୟକ ମିଚେଲ ମାର୍ଶ ଆଉ ୪ ରନ କଲେ ଟି-ଟ୍ୱେଣ୍ଟିରେ ୨୦୦୦ ରନ ପୂରଣ କରିବେ । ସେହିପରି ସଞ୍ଜୁ ସାମସନ ୭ ରନ ଓ ତିଳକ ବର୍ମା ୩୮ ରନ କଲେ ଟି-ଟ୍ୱେଣ୍ଟିରେ ୧୦୦୦ ରନ ଲେଖାଏଁ ସମ୍ପୂର୍ଣ୍ଣ କରିବେ । ଯଶପ୍ରୀତ ବୁମରା ୪ଟି ୱିକେଟ୍ ନେଲେ ୧୦୦ ଟି-ଟ୍ୱେଣ୍ଟି ୱିକେଟ୍ କ୍ଲବ୍ରେ ସ୍ଥାନ ପାଇବେ ।
ମେଲବର୍ଣ୍ଣ କ୍ରିକେଟ୍ ଗ୍ରାଉଣ୍ଡର ପିଚ୍ ବ୍ୟାଟିଂ ପାଇଁ ଅନୁକୂଳ ରହିବ । ଗତ ବିଗ ବାସ ଲିଗ୍ରେ ଇନିଂସ ପିଛା ହାରି ହାରି ରନ ୧୮୦ରୁ ଊଦ୍ଧ୍ୱର୍ ରହିଥିଲା । ଟସ ସେଭଳି ପ୍ରଭାବ ପକାଇବ ନାହିଁ । ତଥାପି ଟସ ବିଜୟୀ ଦଳ କୋହଲା ପାଗର ଫାଇଦା ଉଠାଇବା ପାଇଁ ଫିଲ୍ଡିଂ ନିଷ୍ପତ୍ତି ନେଇ ପାରନ୍ତି ।
ସମ୍ଭାବ୍ୟ ଦଳ
ଭାରତ: ଅଭିଷେକ ଶର୍ମା, ଶୁଭମନ ଗିଲ୍, ସୂର୍ଯ୍ୟକୁମାର ଯାଦବ (ଅଧିନାୟକ), ତିଳକ ବର୍ମା, ସଞ୍ଜୁ ସାମସନ, ଶିବମ ଦୁବେ, ଅକ୍ଷର ପଟେଲ,ହର୍ଷିତ ରାଣା, କୁଲଦୀପ ଯାଦବ, ବରୁଣ ଚକ୍ରବର୍ତ୍ତୀ, ଯଶପ୍ରୀତ ବୁମରା ।
ଅଷ୍ଟ୍ରେଲିଆ: ମିଚେଲ ମାର୍ଶ (ଅଧିନାୟକ), ଟ୍ରେଭିସ୍ ହେଡ୍, ଜୋସ ଇଂଲିଶ, ଟିମ ଡେଭିଡ୍, ମିଚେଲ ଓଏନ, ମାର୍କସ ଷ୍ଟଇନିସ, ଜୋସ ଫିଲିପ, ଜାଭିୟର ବାର୍ଟଲେଟ୍, ନାଥାନ ଏଲିସ, ମାଟ କୁହ୍ନେମନ, ଜୋସ ହାଜେଲଉଡ ।
