କୋଲକାତା,୨୬/୦୪: ଚଳିତ ଆଇପିଏଲ୍ର ୪୪ତମ ଲିଗ୍ ମୁକାବିଲାରେ ଡିଫେଣ୍ଡି ଚାମ୍ପିଅନ୍ କୋଲକାତା ନାଇଟ ରାଇଡର୍ସ ଘରୋଇ ଗ୍ରାଉଣ୍ଡ୍ରେ ପଞ୍ଜାବ କିଙ୍ଗ୍ସକୁ ଭେଟିବ । ପଞ୍ଜାବ କିଙ୍ଗ୍ସ ଏହି ମ୍ୟାଚ୍ ଜିତି ପଏଣ୍ଟ ତାଲିକାର ଚତୁର୍ଥ ସ୍ଥାନକୁ ଉଠିବାକୁ ପ୍ରୟାସ କରିବ। ନାଇଟ୍ ରାଇଡର୍ସ ପାଇଁ ଏହି ମ୍ୟାଚ୍ ‘କର ବା ମର’ ପରିସ୍ଥିତି ସୃଷ୍ଟି କରିଛି । ପ୍ଲେ- ଅଫ୍ରେ ପ୍ରବେଶ କରିବାକୁ ହେଲେ ଏଣିକି ପ୍ରତ୍ୟେକ ମ୍ୟାଚ୍ ଜିତିବାକୁ ପଡ଼ିବ । ତେଣୁ ଆଜି ନାଇଟ ରାଇଡର୍ସ ସବୁ ଶକ୍ତି ଲଗାଇ ଜିତିବାକୁ ପ୍ରୟାସ କରିବ । ଫଳରେ ମ୍ୟାଚ୍ଟି ତୀବ୍ର ସଂଘର୍ଷପୂର୍ଣ୍ଣ ହେବା ନିଶ୍ଚିତ ।
ପଞ୍ଜାବ କିଙ୍ଗ୍ସ ୧୦ ପଏଣ୍ଟ ସହ ପଞ୍ଚମ ସ୍ଥାନରେ ରହିଛି । ଶେଷ ୬ଟି ମ୍ୟାଚ୍ରୁ ଅତି କମ୍ରେ ୩ଟି ମ୍ୟାଚ୍ ଜିତିଲେ ଦଳ ସହଜରେ ପ୍ଲେ-ଅଫ୍ରେ ପ୍ରବେଶ କରିପାରିବ। ନାଇଟ୍ ରାଇଡର୍ସ ୮ଟି ମ୍ୟାଚ୍ ଖେଳି ମାତ୍ର ୩ଟି ବିଜୟ ସହ ୬ ପଏଣ୍ଟ ଅର୍ଜନ କରିଛି ଓ ସପ୍ତମ ସ୍ଥାନରେ ରହିଛି । ପ୍ଲେ-ଅଫ୍ରେ ପ୍ରବେଶ କରିବାକୁ ହେଲେ ନାଇଟ୍ ରାଇଡର୍ସକୁ ଅତି କମ୍ରେ ୫ଟି ମ୍ୟାଚ ଜିତିବାକୁ ପଡ଼ିବ ।
ଉଭୟ ଦଳ ମଧ୍ୟରେ ୧୦ଦିନ ତଳେ ଖେଳାଯାଇଥିବା ମ୍ୟାଚ୍କୁ ଦର୍ଶକ ଏପର୍ଯ୍ୟନ୍ତ ଭୁଲି ନାହାନ୍ତି । ଗତ ୧୫ ତାରିଖରେ ପ୍ରଥମ ଭେଟ ହୋଇଥିଲା ଓ ପଞ୍ଜାବ କିଙ୍ଗ୍ସ ଉକ୍ତ ମ୍ୟାଚ୍ ଜିତିଥିଲା । ପ୍ରଥମେ ବ୍ୟାଟିଂ କରି ପଞ୍ଜାବ କିଙ୍ଗ୍ସ ମାତ୍ର ୧୧୧ ରନ କରିଥିଲା । ଜବାବରେ ନାଇଟ ରାଇଡର୍ସ ମାତ୍ର ୯୫ ରନ୍ରେ ଅଲ୍ ଆଉଟ୍ ହୋଇଯାଇଥିଲା ।
ଇଡେନ ଗାର୍ଡେନ୍ସରେ ଉପସ୍ଥିତ ଦର୍ଶକଙ୍କ ନଜର ରହିବ ଶ୍ରେୟାସ ଆୟରଙ୍କ ଉପରେ । ଆୟର ଗତ ବର୍ଷ ନାଇଟ୍ ରାଇଡର୍ସର ନେତୃତ୍ୱ ନେଇଥିଲେ । ତାଙ୍କ ଅଧିନରେ ଦଳ ଚାମ୍ପିଅନ୍ ଆଖ୍ୟା ଅର୍ଜନ କରିଥିଲା । ମାତ୍ର ସବୁ ପ୍ରଶଂସା ନେଇଥିଲେ ମୁଖ୍ୟ କୋଚ ଗୌତମ ଗମ୍ଭୀର। ଏଥର ମେଗା ନିଲାମ ପୂର୍ବରୁ ନାଇଟ ରାଇଡର୍ସ ଆୟରଙ୍କୁ ରିଟେନ କରିନଥିଲା । ଏଥର ସେ ପଞ୍ଜାବ କିଙ୍ଗ୍ସର ନେତୃତ୍ୱ ନେଉଛନ୍ତି ଓ ଚମତ୍କାର ଫର୍ମରେ ରହିଛନ୍ତି । ୨୦୦ରୁ ଊଦ୍ଧ୍ୱର୍ ଷ୍ଟ୍ରାଇକ ରେଟ୍ରେ ସେ ରନ୍ ସଂଗ୍ରହ କରୁଛନ୍ତି । ଆଜି ଇଡେନ ଗାର୍ଡେନ୍ସ ଦର୍ଶକଙ୍କ ଠାରୁ ଆୟରଙ୍କୁ ଭରପୁର ସମର୍ଥନ ମିଳିବା ଆଶା କରାଯାଉଛି ।
ପୂର୍ବ ରେକର୍ଡକୁ ଦେଖିଲେ ନାଇଟ୍ ରାଇଡର୍ସର ପଲା ଭାରି ରହିବ । ଉଭୟ ଦଳ ପରସ୍ପରକୁ ୩୪ଥର ଭେଟିଛନ୍ତି । ଏଥିରୁ ନାଇଟ ରାଇଡର୍ସ ୨୧ଟି ମ୍ୟାଚ୍ ଜିତିଛି । ପଞ୍ଜାବ କିଙ୍ଗ୍ସ ଜିତିଛି ୧୩ଟି ମ୍ୟାଚ୍ । କିନ୍ତୁ ଚଳିତ ବର୍ଷର ପ୍ରଦର୍ଶନ, ଘରୋଇ ଗ୍ରାଉଣ୍ଡ୍ ଓ ସମର୍ଥନ ପଞ୍ଜାବ କିଙ୍ଗ୍ସକୁ ବିଜୟ ଦାବିଦାର କରିଛି । ଗତ ସିଜନରେ ଉଭୟ ଦଳ ଇଡେନ ଗାର୍ଡେନ୍ସରେ ସାମ୍ନା ସାମ୍ନି ହୋଇଥିଲେ ଓ ପଞ୍ଜାବ କିଙ୍ଗ୍ସ ଉକ୍ତ ମ୍ୟାଚ୍ ଜିତିଥିଲା ।
ପଞ୍ଜାବ କିଙ୍ଗ୍ସ ପ୍ରଦର୍ଶନରେ ସେଭଳି କୌଣସି ତ୍ରୁଟି ଦେଖିବାକୁ ମିଳିନାହିଁ । ଗତ କିଛି ମ୍ୟାଚ୍ରେ ଆୟରଙ୍କ ବ୍ୟାଟ୍ରୁ ରନ ବାହାରି ନାହିଁ । ମାତ୍ର ନିଜ ପ୍ରିୟ ଗ୍ରାଉଣ୍ଡରେ ତାଙ୍କ ବ୍ୟାଟ୍ ପୁଣିଥରେ କଥା କହିବ ବୋଲି ଆଶା କରାଯାଉଛି । ନାଇଟ ରାଇଡର୍ସକୁ ଅନେକ ତ୍ରୁଟି ସୁଧାରିବାକୁ ପଡ଼ିବ । ସମ୍ପୂର୍ଣ୍ଣ ବ୍ୟାଟିଂ ବିଭାଗ ସନ୍ତୁଳନ ହରାଇଛି । କେବଳ ଅଜିଙ୍କ୍ୟ ରାହାଣେଙ୍କୁ ଛାଡ଼ିଦେଲେ ଅନ୍ୟ କେହି ଫର୍ମରେ ନାହାନ୍ତି। ବିଶେଷ କରି ମଧ୍ୟ କ୍ରମ ବ୍ୟାଟରଙ୍କ ବିଫଳତା ଯୋଗୁଁ ନାଇଟ ରାଇଡର୍ସର ପରାଜୟ ଧାରା ଜାରି ରହିଛି । ବ୍ୟାଟିଂରେ ଉନ୍ନତି ଆଣି ପାରିଲେ ବିଜୟ ସମ୍ଭବ ହୋଇପାରିବ ।
ଉଭୟ ଦଳ ଏକାଦଶରେ ପରିବର୍ତ୍ତନ କରିବା ସମ୍ଭାବନା ନାହିଁ । ପଞ୍ଜାବ କିଙ୍ଗ୍ସ ଶ୍ରେଷ୍ଠ ଏକାଦଶ ପ୍ରସ୍ତୁତ କରିସାରିଛି । ନାଇଟ୍ ରାଇଡର୍ସ ନିକଟରେ ଯଥେଷ୍ଟ ବିକଳ୍ପ ନାହିଁ । ତେଣୁ ଫର୍ମ ହରାଇଥିବା ଖେଳାଳିଙ୍କ ଉପରେ ଦଳକୁ ଭରସା କରିବାକୁ ପଡ଼ିବ ।
ଇଡେନ ଗାର୍ଡେନ୍ସର ପିଚ୍କୁ ନେଇ ଏଥର ପୂର୍ବାନୁମାନ କରି ହେଉନାହିଁ । ପିଚ୍ ସ୍ପିନରଙ୍କୁ ସହାୟତା କରୁଛି, ତାହ ପୁଣି ପ୍ରଥମ ଭାଗରେ । ଦ୍ୱିତୀୟ ଭାଗରେ କାକର ଯୋଗୁଁ ଟର୍ଣ୍ଣ ମିଳୁ ନାହିଁ । ତେଣୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ।
ସମ୍ଭାବ୍ୟ ଦ୍ବାଦଶ
ପଞ୍ଜାବ କିଙ୍ଗ୍ସ: ପ୍ରିୟାଂଶ ଆର୍ଯ୍ୟ, ପ୍ରଭସିମରନ ସିଂହ, ଶ୍ରେୟାସ ଆୟର (ଅଧିନାୟକ), ନେହାଲ ୱଧେରା, ଶଶାଙ୍କ ସିଂହ, ଗ୍ଲେନ ମ୍ୟାକ୍ସୱେଲ୍, ମାର୍କସ ଷ୍ଟଇନିସ୍, ଅଜମତୁଲ୍ଲା ଓମାରଜାଇ/ଆରନ ହାର୍ଡି, ମାର୍କୋ ଜାନସେନ, ୟୁଝବେନ୍ଦ୍ର ଚହଲ, ଅର୍ଶଦୀପ ସିଂହ, ୟଶ ଠାକୁର ।
ନାଇଟ୍ ରାଇଡର୍ସ: କ୍ୱିଣ୍ଟନ ଡି କକ୍/ରହମନୁଲ୍ଲା ଗୁରବାଜ, ସୁନୀଲ ନାରାଏନ, ଅଜିଙ୍କ୍ୟ ରାହାଣେ (ଅଧିନାୟକ), ଅଙ୍ଗକ୍ରୀଶ ରଘୁବଂଶୀ, ଭେଙ୍କଟେଶ ଆୟର, ରିଙ୍କୁ ସିଂହ, ଆନ୍ଦ୍ରେ ରସେଲ, ରମଣଦୀପ ସିଂହ, ମୋଇନ ଅଲି, ହର୍ଷିତ ରାଣା, ବୈଭବ ଆରୋରା, ବରୁଣ ଚକ୍ରବର୍ତ୍ତୀ।
IPL-2025: ଚେନ୍ନାଇକୁ ୫ ୱିକେଟରେ ହରାଇଲା ହାଇଦ୍ରାବାଦ; ସିଏସକେ ପାଇଁ ଆଗକୁ କଷ୍ଟକର ହେବ ପ୍ଲେ ଅଫ୍ ରାସ୍ତା
