ନୂଆଦିଲ୍ଲୀ,୨୫/୦୫: ଆଜି ରାତ୍ରି ମ୍ୟାଚ୍ରେ କୋଲକାତା ନାଇଟ ରାଇଡର୍ସ ଓ ସନରାଇଜର୍ସ ହାଇଦ୍ରାବାଦ ପରସ୍ପରକୁ ଭେଟିବେ । ଏହି ମ୍ୟାଚ୍ ଖେଳି ଉଭୟ ଦଳ ଅଭିଯାନ ଶେଷ କରିବେ । ଅନ୍ତିମ ମ୍ୟାଚ୍ ହୋଇଥିବାରୁ ଉଭୟ ଦଳ ବିଜୟ ପାଇଁ ତତ୍ପର । ମାତ୍ର ପ୍ରଦର୍ଶନକୁ ଦେଖିଲେ ସନରାଇଜର୍ସର ପଲା ଭାରି ଜଣା ପଡ଼ୁଛି । ଦଳ ଶେଷ ୨ଟି ମ୍ୟାଚ୍ରେ ଯଥାକ୍ରମେ ଲକ୍ଷ୍ନୌ ସୁପରଜାଏଣ୍ଟ୍ସ ଓ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁକୁ ପରାସ୍ତ କରିଛି ।
ନାଇଟ୍ ରାଇଡର୍ସ ୧୮ଦିନ ପରେ ଗ୍ରାଉଣ୍ଡକୁ ଓହ୍ଲାଇବ । ଶେଷ ଥର ପାଇଁ ଦଳ ୭ ତାରିଖରେ ଚେନ୍ନାଇ ସୁପରକିଙ୍ଗ୍ସକୁ ଭେଟିଥିଲା ଓ ୨ୱିକେଟ୍ରେ ପରାଜିତ ହୋଇଥିଲା । ଦଳର ପରବର୍ତ୍ତୀ ମ୍ୟାଚ୍ ୧୭ ତାରିଖରେ ରହିଥିଲା । ହେଲେ ବର୍ଷା ଯୋଗୁଁ ଉକ୍ତ ମ୍ୟାଚ୍ ସମ୍ପୂର୍ଣ୍ଣ ରୂପେ ଧୋଇ ଯାଇଥିଲା ।
ନାଇଟ୍ ରାଇଡର୍ସର ପ୍ରଦର୍ଶନକୁ ନେଇ ପୂର୍ବାନୁମାନ କରିହେବ ନାହିଁ । ତଥାପି ଅଜିଙ୍କ୍ୟ ରାହାଣେଙ୍କ ଦଳ ବିଜୟ ସହ ଅଭିଯାନ ଶେଷ କରିବାକୁ ଗୁରୁତ୍ୱ ଦେବ । ଦୁଇ ଘରୋଇ ଖେଳାଳି ଭେଙ୍କଟେଶ ଆୟର ଓ ରିଙ୍କୁ ସିଂହଙ୍କ ପ୍ରଦର୍ଶନ ଦେଖିବାକୁ ଦର୍ଶକ ଆଶା ରଖିବେ । ଉଭୟ ସିଜନ ସାରା ନୈରାଶ୍ୟଜନକ ପ୍ରଦର୍ଶନ ଜାରି ରଖିଛନ୍ତି । ଉଭୟ ଦଳ ପରସ୍ପରକୁ ୨୯ଥର ଭେଟିଛନ୍ତି । ଏଥିରୁ ନାଇଟ୍ ରାଇଡର୍ସ ୨୦ଟି ମ୍ୟାଚ୍ ଜିତିଛି ।
ସନରାଇଜର୍ସ ବିଳମ୍ବରେ ଫର୍ମକୁ ଫେରିଛି ଓ ସନ୍ତୁଳିତ ମନେ ହେଉଛି । ତଥାପି ଟ୍ରେଭିସ୍ ହେଡ୍ଙ୍କ ବିସ୍ଫୋରକ ବ୍ୟାଟିଂ ଦେଖିବାକୁ ଫ୍ୟାନମାନେ ଉତ୍ସୁକତାର ସହ ଅପେକ୍ଷା କରିଛନ୍ତି । ବାକି ସବୁ ଖେଳାଳିଙ୍କ ଉନ୍ନତ ପ୍ରଦର୍ଶନ ଜାରି ରହିଛି । ଆଜି ଟ୍ରେଭିସ୍ ହେଡ ଓ ବୈଭବ ଆରୋରାଙ୍କ ମଧ୍ୟରେ ଏକ ଲଢ଼େଇ ହୋଇପାରେ । ବୈଭବଙ୍କ ବିପକ୍ଷରେ ହେଡ୍ଙ୍କ ଆଭରେଜ ୨ ଓ ଇଶାନ କିଷନଙ୍କ ଆଭରେଜ ୫ ରହିଛି। ଉଭୟଙ୍କୁ ବୈଭବ ୨ଥର ଲେଖାଏଁ ଆଉଟ୍ କରିଛନ୍ତି । ଜୟଦେବ ଉନାକାତଙ୍କ ବିପକ୍ଷରେ ସୁନୀଲ ନାରାଏନ ୧୯ ରନ ସଂଗ୍ରହ କରିଛନ୍ତି ଓ ୩ଥର ଆଉଟ୍ ହୋଇଛନ୍ତି ।
କୋଟଲା ଗ୍ରାଉଣ୍ଡର ପିଚ୍ ବ୍ୟାଟିଂ ପାଇଁ ଅନୁକୂଳ ରହିବ । ୨ଦିନ ତଳେ ପ୍ରଥମେ ବ୍ୟାଟିଂ କରି ସନରାଇଜର୍ସ ଜିତିଥିଲେ ହେଁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
-: ସମ୍ଭାବ୍ୟ ଦଳ :-
ନାଇଟ୍ ରାଇଡର୍ସ: ରହମନୁଲ୍ଲା ଗୁରବାଜ/ ଲଭନିତ ସିସୋଦିଆ, ସୁନୀଲ ନାରାଏନ, ଅଜିଙ୍କ୍ୟ ରାହାଣେ (ଅଧିନାୟକ), ଅଙ୍ଗକ୍ରିଶ ରଘୁବଂଶୀ, ଭେଙ୍କଟେଶ ଆୟର/ମନୀଷ ପାଣ୍ଡେ, ରିଙ୍କୁ ସିଂହ, ଆନ୍ଦ୍ରେ ରସେଲ, ରମଣଦୀପ ସିଂହ, ହର୍ଷିତ ରାଣା, ଆନରିଚ ନର୍ଜ, ବରୁଣ ଚକ୍ରବର୍ତ୍ତୀ, ବୈଭବ ଆରୋରା ।
ସନରାଇଜର୍ସ: ଟ୍ରେଭିସ ହେଡ୍, ଅଭିଷେକ ଶର୍ମା, ଇଶାନ କିଷନ, ହେନରିକ କ୍ଲାସେନ, ନୀତିଶ କୁମାର ରେଡ୍ଡୀ, ଅନିକେତ ବର୍ମା, ଅଭିନବ ମନୋହର, ହର୍ଷ ଦୁବେ, ପ୍ୟାଟ୍ କମିନ୍ସ (ଅଧିନାୟକ), ହର୍ଷଲ ପଟେଲ, ଇଶାନ ମାଲିଙ୍ଗା, ଜୟଦେବ ଉନାକାତ ।
