ମୁମ୍ବାଇ,୧୧/୦୧: ଜାନୁଆରୀ ୩ରେ ଶେଷ ହୋଇଥିବା ସପ୍ତାହରେ ଦେଶର ବୈଦେଶିକ ମୁଦ୍ରା ଭଣ୍ଡାରରେ ୫୬୯.୩ କୋଟି ଡଲାର ହ୍ରାସ ଘଟିଛି । ଫଳରେ ଏହା ୬୩୪୫୯ କୋଟି ଡଲାରକୁ ଖସିଆସିଥିବା ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ପ୍ରଦତ୍ତ ତଥ୍ୟରୁ ଜଣାପଡ଼ିଛି । ଡିସେମ୍ବର ୨୭ରେ ଶେଷ ହୋଇଥିବା ସପ୍ତାହରେ ଏଥିରେ ୪୧୦ କୋଟି ଡଲାର ହ୍ରାସ ଦେଖାଦେଇଥିଲା । ଫଳରେ ଏହା ୬୪୦୨୭ କୋଟି ଡଲାରକୁ ଖସିଆସିଥିଲା ।
ଆର୍ବିଆଇର ସାପ୍ତାହିକ ରିପୋର୍ଟ ଅନୁସାରେ, ଜାନୁଆରୀ ୩ରେ ଶେଷ ହୋଇଥିବା ସପ୍ତାହରେ ଫରେନ୍ କରେନ୍ସି ଆସେଟ୍(ଏଫ୍ସିଏ) ୬୪୦ କୋଟି ଡଲାର ସଂକୁଚିତ ହୋଇ ୫୪୫୪୭ କୋଟି ଡଲାରକୁ ଖସିଆସିଛି । ସୁନା ଭଣ୍ଡାରରେ ୮୨.୪ କୋଟି ଡଲାର ବୃଦ୍ଧି ଘଟିଛି । ଫଳରେ ଏହା ୬୭୦୯ କୋଟି ଡଲାରରେ ପହଞ୍ଚିଛି ।
