ମହିଳା ଯାତ୍ରୀଙ୍କ ଶାରିରୀକ ଅସୁସ୍ଥତା ପାଇଁ ଜରୁରୀକାଳୀନ ଅବତରଣ କଲା ଇଣ୍ଡିଗୋ ବିମାନ, ଡାକ୍ତରଖାନାରେ ହେଲା ମୃତ୍ୟୁ…
ନୂଆଦିଲ୍ଲୀ: ମଙ୍ଗଳବାର ଇଣ୍ଡିଗୋର ଜେଡା-ଦିଲ୍ଲୀ ବିମାନ ଯୋଧପୁରରେ ଜରୁରୀକାଳୀନ ଅବତରଣ କରିଥିଲା । ଜଣେ ଯାତ୍ରୀଙ୍କ ଅସୁସ୍ଥତା ପାଇଁ ଜରୁରୀକାଳୀନ ଅବତରଣ ହୋଇଥିଲା । ତେବେ ପରେ ଯାତ୍ରୀ ଜଣକ ଡାକ୍ତରଖାନାରେ ମୃତ୍ୟୁ ବରଣ କରିଥିଲେ । ୬୧ ବର୍ଷୀୟ ମହିଳା ଯାତ୍ରୀଙ୍କ ପରିଚୟ ମିତ୍ର ବାନୋ ବୋଲି ଜଣା ପଡିଛି । ବିମାନରେ ଶାରିରୀକ ଅସୁସ୍ଥତା ପାଇଁ ତାଙ୍କୁ ଯୋଧପୁରର ଗୋୟଲ ହସ୍ପିଟାଲରେ ଭର୍ତି କରାଯାଇଥିଲା । ସେଠାରେ ତାଙ୍କର ମୃତ୍ୟୁ ହୋଇଥିଲା ।
ମିତ୍ର ବାନୋ ଜାମ୍ମୁ କାଶ୍ମୀରର ବାସିନ୍ଦା ଥିଲେ । ଇଣ୍ଡିଗୋର ବିବୃତ୍ତି ଅନୁଯାୟୀ, ବିମାନରେ ଥିବା ଜଣେ ଡାକ୍ତର ଯାତ୍ରୀଙ୍କୁ ତୁରନ୍ତ ପ୍ରାଥମିକ ଚିକିତ୍ସା ଯୋଗାଇବାରେ ସାହାଯ୍ୟ କରିଥିଲେ । ବାନୋଙ୍କ ପୁଅ ମୁଜାଫର ତାଙ୍କ ସହିତ ଥିଲେ । ବିମାନଟି ସକାଳ ୧୧ ଟାରେ ଯୋଧପୁରରେ ପହଞ୍ଚିଥିଲା । ମୃତ ମହିଳାଙ୍କ ପୁଅ ଏକ ଜାତୀୟ ଗଣମାଧ୍ୟମ ଆଗରେ ଦାବି କରିଛନ୍ତି ଯେ ତାଙ୍କ ମା ପୂର୍ବରୁ କୌଣସି ରୋଗରେ ପୀଡିତ ନଥିଲେ । ସାଉଦି ଆରବ ଗସ୍ତ ସମୟରେ ତାଙ୍କର ଭଲ ସମୟ କଟିଥିଲା ଏବଂ ଏହା ମଧ୍ୟରେ କିଛି ଘଟିବ ବୋଲି ସେ ଜାଣି ନଥିଲେ ।
ସେ କହିଛନ୍ତି ଯେ ଉଡ଼ାଣ ସମୟରେ ମାଙ୍କୁ ପ୍ରବଳ ଯନ୍ତ୍ରଣା ହୋଇଥିଲା, ଯେଉଁଥିପାଇଁ ଜରୁରୀକାଳୀନ ଅବତରଣ କରିବାକୁ ପଡିଥିଲା । ଖବର ଅନୁଯାୟୀ, ମହିଳାଙ୍କର ହୃଦଘାତରେ ମୃତ୍ୟୁ ହୋଇଛି ।
