ଚଣ୍ଡିଗଡ଼,୦୮/୦୪: ଆଇପିଏଲ୍ ୨୦୨୫ର ୨୨ତମ ମୁକାବିଲାରେ ପଞ୍ଜାବ କିଙ୍ଗସ୍ ଚେନ୍ନାଇ ସୁପର କିଙ୍ଗସ୍ର ବୋଲରଙ୍କ ବିପକ୍ଷରେ ଧୂଆଁଧାର ପ୍ରଦର୍ଶନ କରିଛି। ପଞ୍ଜାବ ପକ୍ଷରୁ ଯୁବ ଖେଳାଳି ପ୍ରିୟାଂଶ ଆର୍ଯ୍ୟ ୪୨ ବଲ୍ରେ ୧୦୩ ରନ୍ର ଏକ ବିସ୍ଫୋରକ ଇନିଂସ ଖେଳିଥିଲେ। ତାଙ୍କ ବ୍ୟାଟରୁ ୭ଟି ଚୌକା ଏବଂ ୯ଟି ଛକା ବାହାରିଥିଲା। ଶଶାଙ୍କ ସିଂହ ୩୬ ବଲ୍ରେ ୫୨ ରନ୍ ଏବଂ ମାର୍କୋ ଜନସନ୍ ୧୯ ବଲ୍ରେ ୩୪ ରନ୍ କରି ଅପରାଜିତ ରହିଥିଲେ। ଦୁହେଁ ସପ୍ତମ ୱିକେଟ ସୁଦ୍ଧା ୩୮ ବଲ୍ରେ ୬୫ ରନ୍ର ଭାଗୀଦାରି କରିଥିଲେ। ଏହି ତିନି ଜଣଙ୍କ ଯୋଗୁଁ ପଞ୍ଜାବ କିଙ୍ଗ୍ସ ୨୦ ଓଭରରେ ୬ ୱିକେଟ୍ ହରାଇ ୨୧୯ ରନ୍ କରିଛି।
ଆକର୍ଷଣୀୟ କଥା ହେଉଛି ଯେ ପଞ୍ଜାବ କିଙ୍ଗ୍ସର ସମସ୍ତ ବଡ଼ ଖେଳାଳି ଆଜିର ମ୍ୟାଚ୍ରେ ଫ୍ଲପ୍ ହୋଇଥିଲେ। ତଥାପି, ଦଳ ୨୦୦ ରୁ ଅଧିକ ସ୍କୋର କରିଛି। ପ୍ରଭସିମରନ ସିଂହ (୦୦), ଅଧିନାୟକ ଶ୍ରେୟସ ଆୟର (୦୯), ଗ୍ଲେନ ମ୍ୟାକ୍ସୱେଲ (୦୧), ମାର୍କସ ଷ୍ଟୋଇନିସ୍ (୦୪) ଏବଂ ନେହାଲ ୱାଧେରା (୦୯) ଦୁଇ ଅଙ୍କ ଛୁଇଁ ପାରି ନଥିଲେ।
