ନୂଆଦିଲ୍ଲୀ: ଆମେରିକାର ଚେତାବନୀ ସତ୍ତ୍ବେ ଇସ୍ରାଏଲ ଉପରେ ଆକ୍ରମଣ କରିଛି ଇରାନ । ଇସ୍ରାଏଲ ଉପରେ ୪୦୦ରୁ ଅଧିକ ମିସାଇଲ ମାଡ଼ କରିଛି ତେହରାନ । ଇରାନ୍ ବାଲିଷ୍ଟିକ୍ ମିସାଇଲ୍ ମାଡ଼ କରିଥିବା ନେଇ ଇସ୍ରାଏଲ ସେନା ସ୍ପଷ୍ଟ କରିଛି । ଏହା ପୂର୍ବରୁ ଇରାନ୍ ଯଦି ଆକ୍ରମଣ କରା ତେବେ ତାକୁ ଭୟଙ୍କର ପରିଣାମ ଭୋଗିବାକୁ ପଡ଼ିବ ବୋଲି ଆମେରିକା ଚେତାବନୀ ଦେଇଥିଲା । ସେପଟେ ଇସ୍ରାଏଲ ସେନା ସୂଚନା ଦେଇଛି ଯେ, ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ଲକ୍ଷାଧିକ ଲୋକଙ୍କୁ ବୋମା ନିରୋଧୀ ବିଲ୍ଡିଂକୁ ପଠାଇ ଦିଆଯାଇଛି । ସେମାନଙ୍କ ସୁରକ୍ଷା ଲାଗି ସରକାର ସବୁ ପ୍ରକାର ବ୍ୟବସ୍ଥା କରିଛନ୍ତି ।
ଇରାନ ଏବଂ ଇସ୍ରାଏଲ୍ ମଧ୍ୟରେ ଉତ୍ତେଜନା ଚରମରେ ପହଞ୍ଚିଛି । ଦୁଇ ଦେଶ ମଧ୍ୟରେ ତିକ୍ତତା ଏବଂ ସଂଘର୍ଷ ଭିତରେ ମଙ୍ଗଳବାର ରାତିରେ ଇସ୍ରାଏଲ୍ ଉପରେ ଇରାନ ମିସାଇଲ ହମ୍ଲା କରିଛି । ଇସ୍ରାଏଲ୍ ବୈଦେଶିକ ବ୍ୟାପାର ମନ୍ତ୍ରଣାଳୟ ଟ୍ୱିଟ୍ କରି କହିଛି ଯେ, ଇସ୍ରାଏଲ୍ ଉପରେ ୪୦୦ରୁ ଅଧିକ ମିସାଇଲ୍ ଆକ୍ରମଣ କରାଯାଇଛି ଏବଂ ସାରା ଦେଶରେ ଏୟାର ଷ୍ଟ୍ରାଇକ ସାଇରନ୍ ଆକ୍ଟିଭ କରାଯାଇଛି । ଲୋକଙ୍କୁ ସୁରକ୍ଷିତ ସ୍ଥାନରେ ରହିବା ଏବଂ ବୋମା ନିରୋଧୀ ଆଶ୍ରୟ ସ୍ଥଳରେ ରହିବା ପାଇଁ ଆଦେଶ ଦିଆଯାଇଛି । ଏବେ ଅନୁମାନ କରାଯାଉଛି ଯେ, ଇରାନ ଉପରେ ଇସ୍ରାଏଲ ପାଲଟା ଆକ୍ରମଣ କରିପାରେ ।
ଅନ୍ୟପଟେ, ଇରାନର ମିସାଇଲ୍ ଆକ୍ରମଣ ପରେ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ମଧ୍ୟ ବୟାନ ସାମନାକୁ ଆସିଛି । ରାଷ୍ଟ୍ରପତି ବାଇଡେନ ଏକ୍ସରେ ପୋଷ୍ଟ କରି କହିଛନ୍ତି ଯେ, ଇସ୍ରାଏଲକୁ ଇରାନର ମିସାଇଲ୍ ଆକ୍ରମଣରୁ ରକ୍ଷା କରିବା ସହ ସେହି କ୍ଷେତ୍ରରେ ଆମେରିକୀୟ ସେନାର ରକ୍ଷା କରିବାକୁ ଆମେରିକା ପ୍ରସ୍ତୁତ ରହିଛି ।
ସେପଟେ ଇସ୍ରାଏଲ୍ ଉପରେ ଆକ୍ରମଣକୁ ନେଇ ଇରାନର ଇସଲାମିକ ରିଭୋଲ୍ୟୁସନରୀ ଗାର୍ଡ କର୍ପ ବୟାନ ଜାରି କରିଛି । ଏଥିରେ ଇସ୍ମାଇଲ୍ ହାନିୟେ, ହସନ ନସରଲ୍ଲା ଏବଂ ଅବ୍ବାସ ନିଲଫୋରୁସନଙ୍କୁ ସହିଦ ଦର୍ଶାଯାଇଛି । ଏଥିରେ କୁହାଯାଇଛି ଯେ, ଏହି ହତ୍ୟାର ଜବାବରେ ଆମେ ଇସ୍ରାଏଲ୍ ଉପରେ ଆକ୍ରମଣ କରିଛୁ । ଯଦି ଇସ୍ରାଏଲ ଏହାର ପ୍ରତିଜବାବ ଦିଏ ତେବେ ଆମେ ବିଧ୍ୱଂସକ ଆକ୍ରମଣ କରିବୁ ।
