ନୂଆଦିଲ୍ଲୀ, ୨୭।୭: ଗାଜାରେ ଗତ ଦୁଇ ଦିନ ଧରି ଇସ୍ରାଏଲର ନରସଂହାର ଜାରି । ଆଇଡିଏଫର ଏୟାରଷ୍ଟ୍ରଇକରେ ବର୍ତ୍ତମାନ ୫୩ ଜଣଙ୍କର ମୃତ୍ୟୁ ହୋଇଥିବା ଜଣାପଡ଼ିଛି । ପାଲେଷ୍ଟାଇନୀ ସ୍ୱାସ୍ଥ୍ୟ ଅଧିକାରୀ ଏବଂ ସ୍ଥାନୀୟ ଆମ୍ବୁଲାନ୍ସ ସେବା ଅନୁଯାୟୀ, ଲୋକ ସାହାଯ୍ୟ ମାଗୁଥିବା ସମୟରେ ଏହି ଗୁଳିମାଡ଼ କରାଯାଇଥିଲା । ଅନ୍ୟପଟେ ଗାଜାରେ ଖାଦ୍ୟାଭାବ ଯୋଗୁଁ ମଧ୍ୟ ମୃତ୍ୟୁ ଘଟୁଛି । କହିରଖୁଛୁ ଯେ, ଜିକିମ କ୍ରସିଂ ନିକଟରେ ଇସ୍ରାଏଲ ସେନା ପକ୍ଷରୁ କିଛି ଘଣ୍ଟା ମଧ୍ୟରେ ଦୁଇଟି ଘତକ ହମଲା ହୋଇଥିଲା । ପ୍ରତ୍ୟକ୍ଷଦର୍ଶୀ ଶରିଫ୍ ଅବୁ ଆୟଶା କହିଛନ୍ତି ଯେ, ସ୍ଥାନୀୟ ଲୋକ ପ୍ରଥମେ ଏକ ଆଲୋକ ଦେଖିଥିଲେ, ଯାହାକୁ ସାହାଯ୍ୟ ଲାଗି ଆସିଥିବା ଟ୍ରକ୍ ବୋଲି ଭାବିଥିଲେ । ତେଣୁ ଲୋକମାନେ ଦୌଡ଼ିବାକୁ ଲାଗିଲେ, କିନ୍ତୁ ପାଖରେ ପହଞ୍ଚିବା ପରେ ଏହା ଏକ ଇସ୍ରାଏଲୀ ଟ୍ୟାଙ୍କ ଥିଲା । ପରେ ଇସ୍ରାଏଲୀ ସେନା ଗୁଳି ଚାଳନା ଆରମ୍ଭ କରିଥିଲେ ।
ଶନିବାର ସନ୍ଧ୍ୟାରେ ଶିଫା ହସ୍ପିଟାଲର ନିର୍ଦ୍ଦେଶକ ଡାକ୍ତର ମହମ୍ମଦ ଆବୁ ସେଲମିଆ କହିଛନ୍ତି ଯେ, ଗାଜାରେ ଶରଣାର୍ଥୀମାନେ ଏକ କାଫିଲାରୁ ଖାଦ୍ୟ ନେଉଥିବା ବେଳେ ଇସ୍ରାଏଲ ସେନା ସେମାନଙ୍କ ଉପରକୁ ଅତର୍କିତ ଗୁଳିମାଡ଼ କରିଥିଲା । ଯେଉଁଥିରେ ଅତି କମ୍ରେ ୧୧ ଜଣଙ୍କ ମୃତ୍ୟୁ ହୋଇଥିବା ବେଳେ ୧୨୦ ଜଣ ଆହତ ହୋଇଛନ୍ତି । ସଂକଟାପନ୍ନଙ୍କ ସଂଖ୍ୟା ଅଧିକ ଥିବାରୁ ଆଗକୁ ମୃତକଙ୍କ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି । ଅନ୍ୟପଟେ ଏହି ହମଲାକୁ ନେଇ ଇସ୍ରାଏଲୀ ସେନା ପକ୍ଷରୁ ଏନେଇ କୌଣସି ପ୍ରତିକ୍ରିୟା ମିଳିନାହିଁ ।
ନାସେର ହସ୍ପିଟାଲ ଅନୁଯାୟୀ, ଦକ୍ଷିଣ ସହର ଖାନ ୟୁନିସରେ ମୁୱାସିର ଜନଗହଳିପୂର୍ଣ୍ଣ ତମ୍ବୁ ଶିବିର ଉପରେ ଇସ୍ରାଏଲର ଅନ୍ୟ ଏକ ଆକ୍ରମଣରେ ୪ ଜଣ ଶିଶୁଙ୍କ ସମେତ ଅତି କମ୍ରେ ୮ ଜଣଙ୍କର ମୃତ୍ୟୁ ହୋଇଛି । ହସ୍ପିଟାଲ ମର୍ଗ ରେକର୍ଡ ଅନୁଯାୟୀ, ଖାନ୍ ୟୁନିସରେ ମଧ୍ୟ ଇସ୍ରାଏଲୀ ସେନା ଗୁଳି ଚଳାଇ ମୋରାଗ କରିଡରରେ ୯ ଜଣଙ୍କୁ ହତ୍ୟା କରିଥିଲେ । ଶନିବାର ଜିକିମରେ ଗୁଳିକାଣ୍ଡ ଘଟିବା ପରେ ସାହାଯ୍ୟ ପାଇବା ପାଇଁ କ୍ରସିଂରେ ପ୍ରବେଶ କରିବାକୁ ଚେଷ୍ଟା କରୁଥିବା ୮୦ ଜଣ ପାଲେଷ୍ଟାଇନୀଙ୍କ ମୃତ୍ୟୁ ହୋଇଥିଲା । ୨୧ ମାସର ଯୁଦ୍ଧରେ ସାହାଯ୍ୟ ଲୋଡ଼ୁଥିବା ଲୋକଙ୍କ ପାଇଁ ଏହା ସବୁଠାରୁ ଘାତକ ଦିନ ଥିଲା ।
ଇସ୍ରାଏଲ ବର୍ଦ୍ଧିତ ଅନ୍ତର୍ଜାତୀୟ ଚାପର ସମ୍ମୁଖୀନ ହେଉଛି । ଦୁଇ ଡଜନରୁ ଅଧିକ ପାଶ୍ଚାତ୍ୟ ଦେଶ ଏବଂ ୧୦୦ରୁ ଅଧିକ ମାନବଧିକାର ଗୋଷ୍ଠୀ ଯୁଦ୍ଧ ବନ୍ଦ କରିବାକୁ ଆହ୍ୱାନ ଦେଇଛନ୍ତି । ଜାତିସଂଘ ମାନବାଧିକାର କାର୍ଯ୍ୟାଳୟ କହିଛି , ଇସ୍ରାଏଲୀ ସେନା ମେ' ମାସରୁ ଖାଦ୍ୟାଭାବରେ ଥିବା ୧୦୦୦ରୁ ଅଧିକ ପାଲେଷ୍ଟାଇନୀଙ୍କୁ ହତ୍ୟା କରିଛି । ଲୋକଙ୍କୁ ଅତ୍ୟାବଶ୍ୟକ ସାମଗ୍ରୀ ଯୋଗାଇଥିବା ଏକ ସଂସ୍ଥା କହିଛନ୍ତି, ତାଙ୍କ କର୍ମଚାରୀମାନେ ନିଜେ ପର୍ଯ୍ୟାପ୍ତ ଖାଦ୍ୟ ସୁରକ୍ଷିତ ରଖିବା ପାଇଁ ସଂଘର୍ଷ କରୁଛନ୍ତି ।
