ନୀଳଗିରି,୪/୬:ସୁନାର ସଂସାର ଉଜୁଡିଗଲା।ଲୌହ ଦାନବ ନେଇଗଲା ଜୀବନ। ଝିଅ ବାହାଘରର ଋଣ ସୁଝିବା ପାଇଁ ସୁଦୂର ଚେନାଇ ଯାଉଥିଲେ।କହି ଯାଇଥିଲେ କିଛି ଚିନ୍ତା କରିବୁନି। କାମ କରି ସବୁ ଋଣ ଶୁଝିଦେବି। ଏଭଳି କହି ସ୍ୱାମୀର ମୃତ ଶରୀର ଉପରେ କାନ୍ଧୁଥିଲା ସ୍ତ୍ରୀ। ଏଭଳି ଶୋକାକୁଳ ପରିବେଶ ଦେଖି ଅଞ୍ଚଳବାସୀଙ୍କ ଆଖିମଧ୍ୟ ଛଳଛଳ ହେଇଯାଉଥିଲା।ଏଭଳି ହୃଦୟବିଦାରକ ଘଟଣା ନୀଳଗିରି ବ୍ଲକ ଅଯୋଧ୍ୟା ପଂଚାୟତ ଅଧୀନ ମୁଖିସାହି ଗ୍ରାମରେ ଦେଖିବାକୁ ମିଳିଛି।

ଗତ ଶୁକ୍ରବାର ଦିନ ସନ୍ଧ୍ୟାରେ ଅଯୋଧ୍ୟା ମୁଖିସାହି ଅଞ୍ଚଳର ସ୍ବର୍ଗତ ଶ୍ରୀଧର ମୁଖୀଙ୍କ ପୁଅ କୁନା ମୁଖୀ ଝିଅ ବାହାଘର ସାରି ଧାର କରଜ ସୁଝିବା ପାଇଁ କରମଣ୍ଡଳ ଟ୍ରେନରେ ବସି ଚେନାଇ ଯାଉଥିବା ବେଳେ ତାଙ୍କ ସ୍ତ୍ରୀ ଦମୟନ୍ତୀ ଙ୍କ କଥା ହୋଇଥିଲେ। ହେଲେ କିଛିସମୟ ପରେ ଫୋନ ଆସିଲା ଟ୍ରେନ ଦୁର୍ଘଟଣା ହୋଇଛି ବୋଲି। ଗ୍ରାମବାସୀ ଘଟଣା ସ୍ଥଳରେ ପହଂଚି ଥିବାବେଳେ କୁନାଙ୍କୁ ଗୁରୁତର ଅବସ୍ଥାରେ ସୋର ଡାକ୍ତରଖାନାରେ ଭର୍ତ୍ତି ହୋଇଥିବା ସୂଚନା ପାଇଲେ। ହେଲେ ସେଠାରେ ଦେଖିବା ବେଳକୁ ତାଙ୍କର ମୃତ୍ୟୁ ହୋଇଥିଲା। ଖବର ପାଇ ସ୍ତ୍ରୀ ସହଜରେ ବିଶ୍ୱାସ କରିପାରିନଥିଲେ। ହେଲେ ଗତକାଲି ତାଙ୍କ ଶବ ଗାଁରେ ପହଁଚିବା ପରେ ସେ ଦେଖି ସ୍ତବଦ ହୋଇଯାଇଥିଲେ। ଝିଅ ମଧ୍ୟ ଏହା ଦେଖି ବିଶ୍ୱାସ କରିପାରିନଥିଲେ। ବାପାଙ୍କ ମୃତଦେହ ପାଖରେ ମୁଣ୍ଡ ପିଟି କହୁଥିଲେ ବାପା ମୋତେ ପରା କହୁଥିଲ ଭଲ ମୋବାଇଲ ଦେବ ବୋଲି। ଉଠ ବାପା ଉଠ।ଏଭଳି ଦୃଶ୍ୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି କରିଥିଲା। ପରିବାର ଏକମାତ୍ର ରୋଜଗାରିଆ ପୁଅ ଚାଲିଯିବା ପରେ ବୁଢ଼ୀ ମାଆ ମାନସିକ ଭାବେ ଭାଙ୍ଗିପଡିଛନ୍ତି।ଝିଅ ଓ ୪ ବର୍ଷର ପୁଅଟିଏ ଏବେ ଘରେ ରହୁଥିବା ବେଳେ ଦମୟନ୍ତି କଣ କରିବେ କିପରି ଚଳିବେ ଭାବିଭାବି କାନ୍ଦିଚାଲିଛନ୍ତି। ତେବେ ସରକାରୀ ସ୍ତରରେ ମୃତକଙ୍କ ପରିବାରଙ୍କୁ ସହାୟତା ଦେବାକୁ ଅଞ୍ଚଳବାସୀ ନିବେଦନ କରିଛନ୍ତି।

ଆହୁରି ପଢନ୍ତୁ : ବାହାନଗା ଟ୍ରାଜେଡି : ମୃତାହତଙ୍କ ସମ୍ପର୍କରେ  ଜାଣିବା ପାଇଁ ରେଲୱେ ଜାରି କଲା ହେଲପ ଲାଇନ ନମ୍ବର