ବାହାରିଲା ଜେଇଇ ମେନ୍ ପେପର -୧ ଫଳ
ଭୁବନେଶ୍ୱର,୧୯ ।୧(ବ୍ୟୁରୋ): ଗତ ୯ରୁ ୧୨ ତାରିଖ ପର୍ଯ୍ୟନ୍ତ ଅନୁଷ୍ଠିତ ହୋଇଥିବା ଜେଇଇ ମେନ୍ ପେପେର-୧ର ଫଳ ଆଜି ପ୍ରକାଶିତ ହୋଇଛି । ନ୍ୟାସନାଲ୍ ଟେଷ୍ଟିଂ ଏଜେନ୍ସି(ଏନ୍ଟିଏ) ଏହି ପରୀକ୍ଷା ପରିଚାଳନା କରୁଥିବାବେଳେ ଆଜି ଫଳ ବାହାର କରିଛି । ପ୍ରରକାଶିତ ଫଳ ତାଲିକାରେ ମାତ୍ର ୧୫ଜଣ ଶତ ପ୍ରତିଶତ(୧୦୦ଧ) ମାର୍କ ରଖିଛନ୍ତି । ୧୫ଜଣଙ୍କ ମଧ୍ୟରୁ ତେଲେଙ୍ଗାନାରୁ ୪ଜଣ, ମହାରାଷ୍ଟ୍ରରୁ ୩ଜଣ, ଉତ୍ତର ପ୍ରଦେଶରୁ ୨ଜଣ, ରାଜସ୍ଥାନରୁ ୨ଜଣ, ପଞ୍ଜାବ, ଆନ୍ଧ୍ରପ୍ରଦେଶ, ମଧ୍ୟପ୍ରଦେଶ ଓ କର୍ଣ୍ଣାଟକରୁ ଜଣେ ଲେଖାଏଁ ୧୦୦ଧ ହାସଲ କରିପାରିଛନ୍ତି । ତେବେ ଚଳିତ ବର୍ଷ କେନ୍ଦ୍ର ମାନବ ସମ୍ବଳ ମନ୍ତ୍ରଣାଳୟ ଛାତ୍ରଛାତ୍ରୀଙ୍କୁ ଦୁଇ ଥର ପରୀକ୍ଷା ଦେବା ପାଇଁ ସୁଯୋଗ ଦେଇଛି । ପ୍ରଥମ ଥର ଖରାପ ହୋଇଥିଲେ ଦ୍ୱିତୀୟ ଥର ଜଣେ ପରୀକ୍ଷା ଦେଇ ଭଲ କରିପାରିବ । ନଚେତ୍ ଉଭୟ ପରୀକ୍ଷା ମଧ୍ୟରୁ ଭଲ ମାର୍କକୁ ଗଣନା କରାଯିବ ବୋଲି କେନ୍ଦ୍ର ମାନବ ସମ୍ବଳ ମନ୍ତ୍ରୀ ପ୍ରକାଶ ଜାଭଡେକର ସୂଚନା ଦେଇଛନ୍ତି । ଅପରପକ୍ଷେ ଏପ୍ରିଲରେ ହେବାକୁ ଥିବା ଜେଇଇ ମେନ୍ର ଦ୍ୱିତୀୟ ପର୍ଯ୍ୟାୟ ରେଜଲ୍ଟ ବାହାରିବା ପରେ ର୍ୟାଙ୍କ୍ ଘୋଷଣା କରାଯିବ । ଜେଇଇ ମେନରେ ବିଭିନ୍ନ ରାଜ୍ୟର ଟପର୍ ତାଲିକା ଘୋଷଣା କରାଯାଇଛି । ଓଡ଼ିଶାର ଶିବାଶିଷ ନାୟକ ୯୯.୯୮ଧ ମାର୍କ ରଖି ରାଜ୍ୟ ଟପର୍ ହୋଇଛନ୍ତି ।
ଜେଇଇ ମେନ୍ ପେପର୍-୧ ଦେଇଥିବା ଛାତ୍ରଛାତ୍ରୀମାନେ ର୍ୟାଙ୍କ୍ ହାସଲ କରିବା ପରେ ଏନ୍ଆଇଟି, ଟ୍ରିପଲ୍ଆଇଟି ସମେତ ଦେଶର ବିଭିନ୍ନ ଘରୋଇ ତଥା ସରକାରୀ ଇଞ୍ଜିନିୟରିଂ କଲେଜଗୁଡିକରେ ବିଇ/ବିଟେକ୍ ପଢ଼ିପାରିବେ । ଚଳିତ ବର୍ଷ ଜେଇଇ ମେନ୍ ପେପର୍-୧ ପାଇଁ ସାରା ଦେଶରୁ ୯ ଲକ୍ଷ ୨୯ ହଜାର ଛାତ୍ରଛାତ୍ରୀ ପଞ୍ଜିକରଣ କରିଥିବା ବେଳେ ୮ଲକ୍ଷ ୭୪ହଜାର ୪୬୯ଜଣ ପରୀକ୍ଷା ଦେଇଥିଲେ । ଦେଶ ଓ ବିଦେଶର ମୋଟ ୨୫୮ଟି ସହରର ୪୬୭ଟି କେନ୍ଦ୍ରରେ ପରୀକ୍ଷା ହୋଇଥିଲା ।
ସେହିପରି ଶୀଘ୍ର ଜେଇଇ ମେନ୍ ପେପର୍-୨ର ପରୀକ୍ଷା ଫଳ ବାହାରିବ ବୋଲି ମନ୍ତ୍ରୀ ଶ୍ରୀ ଜାଭଡେକର୍ ସୂଚନା ଦେଇଛନ୍ତି । ପେପର୍-୨ରେ ର୍ୟାଙ୍କ୍ ହାସଲ କରିବା ପରେ ବି.ଆର୍କ (ଆର୍କିଟେକଚର୍) ଓ ବି ପ୍ଲାନ୍ରେ ନାମ ଲେଖିପାରିବେ । ତେବେ ଜେଇଇ ମେନ୍ ଦ୍ୱିତୀୟ ପର୍ଯ୍ୟାୟ ପାଇଁ ଆସନ୍ତା ଫେବ୍ରୁଆରୀ ୮ ତାରିଖରୁଆବେଦନ ଆରମ୍ଭ ହେବ । ଆବେଦନ ଅନଲାଇନରେ ହେବାକୁ ଥିବା ବେଳେ ମାର୍ଚ୍ଚ ୭ ତାରିଖରେ ସରିବ । ଦ୍ୱିତୀୟ ପର୍ଯ୍ୟାୟ ଜେଇଇ ମେନ୍ ପରୀକ୍ଷା ଏପ୍ରିଲ ୬ରୁ ଆରମ୍ଭ ହୋଇ ୨୦ ତାରିଖରେ ସରିବ ।
