୧୫୦ ବର୍ଷରେ ବିଶ୍ୱପ୍ରସିଦ୍ଧ ଯୋରନ୍ଦା ମାଘମେଳା, ଗାଦି ମନ୍ଦିର ଚାରିଦ୍ୱାରରେ ଜଳିଲା ଝାଡ଼…
ଢେଙ୍କାନାଳ,୪/୦୨ : ଯୋରନ୍ଦା ମହିମା ଗାଦିରେ ଶନିବାର ଠାରୁ ଆରମ୍ଭ ହୋଇଛି ବିଶ୍ୱ ପ୍ରସିଦ୍ଧ ମାଘମେଳା । ଚଳିତବର୍ଷ ମେଳାକୁ ୧୫୦ ବର୍ଷ ପୁରିଛି । ଅନୁକୂଳ ପାଗ ଯୋଗୁ ମେଳାରେ ଲକ୍ଷାଧିକ ଶ୍ରଦ୍ଧାଳୁଙ୍କର ସମାଗମ ହୋଇଛି । ଗୁରୁବ୍ରହ୍ମ ମହିମା ଅଲେଖ ଧ୍ୱନୀରେ ମହିମାଗାଦିର ଗଗନ ପବନ ପ୍ରକମ୍ପିତ ହୋଇଉଠିଛି । ବିଶ୍ୱବାସୀଙ୍କ କଲ୍ୟାଣ ଉଦେ୍ଦଶ୍ୟରେ ସନ୍ଧ୍ୟା ୫.୩୦ମିନିଟରେ ଗାଦି ମନ୍ଦିରର ଚାରିଦ୍ୱାରରେ ଶୂନ୍ୟପ୍ରଭୁଙ୍କ ଉଦ୍ଦେଶ୍ୟରେ ଝାଡଦୀପ ପ୍ରଜ୍ୱଳନ କରାଯାଇଛି । ଅନୁରୂପ ଭାବେ ଧ୍ୱନି ମନ୍ଦିର, ଅଖଣ୍ଡଜ୍ୟୋତି ମନ୍ଦିର, ଶୂନ୍ୟ ମନ୍ଦିର ଆଦି ସ୍ଥାନରେ ଝାଡଦୀପ ପ୍ରଜ୍ୱଳିତ କରାଯାଇଛି । ଝାଡଦୀପରେ ଘୃତାହୂତି ଦେବାପାଇଁ ଶ୍ରଦ୍ଧାଳୁମାନେ ଗାଦି ମନ୍ଦିର ପରିସରରେ ସମବେତ ହୋଇଛନ୍ତି ।
ଏଥିସହିତ ବିଭିନ୍ନ ଉପାସନା ପୀଠଗୁଡିକରେ ଶ୍ରଦ୍ଧାଳୁମାନଙ୍କ ଭିଡ ଲାଗି ରହିଛି । ପୁଲିସ୍ ପକ୍ଷରୁ ଯୋରନ୍ଦାର ବିଭିନ୍ନ ସ୍ଥାନ ଓ ଉପାସନା ପୀଠଗୁଡିକରେ ଫୋର୍ସ ମୃତୟନ କରାଯାଇଛି । ବୋମା ନୀରୋଧି ସ୍କ୍ୱାର୍ଡ, ସନ୍ଧାନୀ କୁକୁର, ସାଇଣ୍ଟିଫିକ୍ ଟିମ୍ ସହ ୯ ପ୍ଲାଟୁନ୍ ସଶସ୍ତ୍ର ପୁଲିସ୍ ଫୋର୍ସ ମେଳାରେ ମୁତୟନ ରହିଛନ୍ତି । ପ୍ରାୟ ୧୦ଟି ସ୍ଥାନରେ ସିସି କ୍ୟାମେରା ଖଞ୍ଜା ଯାଇ ସୁରକ୍ଷା ବ୍ୟବସ୍ଥାକୁ ତଦାରଖ କରାଯାଉଛି । ବରିଷ୍ଠ ପ୍ରଶାସନିକ ଓ ପୁଲିସ୍ ଅଧିକାରୀମାନେ ମହିମାଗାଦିରେ ଉପସ୍ଥିତ ରହି ଶାନ୍ତିଶୃଙ୍ଖଳା ରକ୍ଷା ସହ ଅନ୍ୟାନ୍ୟ ଆନୁସଙ୍ଗିକ ବ୍ୟବସ୍ଥାକୁ ତଦାରଖ କରୁଛନ୍ତି । ଶହ ଶହ ସଂଖ୍ୟାରେ ଉଠାଦୋକାନୀ ସେମାନଙ୍କର ପସରା ମେଲାଇଛନ୍ତି । ମନୋରଞ୍ଜନ ପାଇଁ ଅପେରା ପାର୍ଟି ପକ୍ଷରୁ ରାତିରେ ନାଟକ ମଞ୍ଚସ୍ଥ ହେବାର କାର୍ଯ୍ୟକ୍ରମ ରହିଛି ।
