ମାଲକାନଗିରି, ୦୪/୦୧ : ରାସ୍ତା କାମରେ ହୋଇଥିବା ଦୁର୍ନୀତିର ପର୍ଦ୍ଦାଫାସ୍ କରିବା ହେଲା କାଳ। ପାଇଖାନା ଟାଙ୍କିରୁ ସାମ୍ବାଦିକଙ୍କ ମୃତଦେହ ଉଦ୍ଧାର। ଛତିଶଗଡ଼ ବିଜାପୁର ଜିଲ୍ଲାର ଏନଡିଟିଭି ସାମ୍ବାଦିକ ମୁକେଶ ଚନ୍ଦ୍ରାକାରଙ୍କ ମୃତଦେହ ଉଦ୍ଧାର ହୋଇଛି। ଜଣେ ଠିକାଦାର ତାଙ୍କୁ ହତ୍ୟା କରିଥିବା ଅଭିଯୋଗ ହୋଇଛି। ନ୍ୟାୟ ଦାବିରେ ସାମ୍ବାଦିକମାନେ ବିଜାପୁର ମୁଖ୍ୟ ରାସ୍ତା ଅବରୋଧ କରିଛନ୍ତି।
ମୁକେଶ ଚନ୍ଦ୍ରାକାର ଛତିଶଗଡ଼ର ଜଣେ ଜଣାଶୁଣା ସାମ୍ବାଦିକ ଥିଲେ। ବସ୍ତର ଜଙ୍କ୍ସନ୍ ନାମରେ ତାଙ୍କର ଏକ ୟୁଟ୍ୟୁବ ଚ୍ୟାନେଲ ରହିଥିବା ବେଳେ ସେ ପୁର୍ବରୁ ବିଭିନ୍ନ ଜାତୀୟ ଗଣମାଧ୍ୟମ ସଂସ୍ଥାରେ କାମ କରିଥିଲେ। ସେ ଏବେ ଏନଡିଟିଭିରେ ସାମ୍ବାଦିକ ଭାବେ କାର୍ଯ୍ୟ କରୁଥିଲେ। ଲାଲ୍ ଗଡ଼ରେ ଜଣେ ସାହାସୀ ରିପୋର୍ଟର ଭାବେ ପରିଚୟ ସୃଷ୍ଟି କରିଥିଲେ ମୁକେଶ ଚନ୍ଦ୍ରାକାର । ମାଓ ଇଲାକାର ବିକାଶ ଲାଗି ସରକାର କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ଠିକାଦାରମାନେ ଆଦିବାସୀ ଲୋକଙ୍କୁ କିପରି ଭାବେ ଠକୁଛନ୍ତି ଲଗାତର ଭାବେ ତାହାର ପର୍ଦ୍ଦାଫାସ କରୁଥିଲେ ମୁକେଶ। ଏହି ମଧ୍ୟରେ ଗାଙ୍ଗାଲୁର ଅଞ୍ଚଳର ଏକ ରାସ୍ତା ନିର୍ମାଣ କାର୍ଯ୍ୟରେ ହୋଇଥିବା ଦୁର୍ନୀତିକୁ ନେଇ ଠିକାଦାର ସୁରେଶ ଚନ୍ଦ୍ରାକାରଙ୍କ ଆକ୍ରୋଶର ଶିକାର ହୋଇଥିଲେ ମୁକେଶ। ଗତ ୧ ତାରିଖରୁ ସେ ନିଖୋଜ ଥିଲେ। ଗତକାଲି ବିଜାପୁର ପୋଲିସ ଠିକାଦାର ସୁରେଶ ଚନ୍ଦ୍ରାକାରଙ୍କ ଠିକା କ୍ୟାମ୍ପର ଏକ ପାଇଖାନା ଟାଙ୍କିରୁ ମୁକେଶଙ୍କ ଶବ ଉଦ୍ଧାର କରିଛି। ଠିକାଦାର ହତ୍ୟା କରିବା ପରେ ଟାଙ୍କିରେ ଫିଙ୍ଗି ଦେଇଥିବା ସନ୍ଦେହ କରାଯାଉଛି। ସେପଟେ ମୁକେଶଙ୍କ ପରିବାରକୁ ନ୍ୟାୟ ଦାବିରେ ବିଜାପୁର ମୁଖ୍ୟ ରାସ୍ତାରେ ଆନ୍ଦୋଳନ କରିଛନ୍ତି ବସ୍ତର ଅଞ୍ଚଳର ସାମ୍ବାଦିକ।
