ଭୁବନେଶ୍ଵର, ୦୭/୧୧ : କିଶୋରୀ ଅବସ୍ଥାରେ ଝିଅମାନଙ୍କଠାରେ ବିଭିନ୍ନ ସ୍ୱାସ୍ଥ୍ୟ ସମସ୍ୟା ଦେଖା ଦେଇଥାଏ । ତେଣୁ ଏହି ବୟସରେ ମା’ମାନେ ଝିଅମାନଙ୍କ ପ୍ରତି ଅଧିକ ଯତ୍ନଶୀଳ ହେବା ଆବଶ୍ୟକ । କାରଣ ଏହି ସମୟରେ ରକ୍ତର ଅଭାବ, ମାଇଗ୍ରେନ୍ ଓ ପିସିଓଏସ୍ ଆଦି ହେବାର ଆଶଙ୍କା ଅଧିକ ରହିଥାଏ । ପିଲାମାନେ ଧୀରେ ଧୀରେ ବଢିବା ସହ କିଶୋରାବସ୍ଥାରେ ପହଞ୍ଚିଥାନ୍ତି । ୧୩ରୁ ୧୯ ବର୍ଷ ବୟସକୁ କିଶୋରାବସ୍ଥା କୁହାଯାଏ । ଏହି ବୟସ ଜଣେ ଝିଅ ପାଇଁ ଖୁବ୍ ଗୁରୁତ୍ୱପୂର୍ଣ୍ଣ । କାରଣ ଏହି ସମୟରେ ଗୋଟିଏ ଝିଅ ଭିତରେ ଅନେକ ପରିବର୍ତ୍ତନ ଆସିଥାଏ । ଯେପରିକି ଶାରିରୀକ, ମାନସିକ ଓ ଭାବନାତ୍ମକ ପରିବର୍ତ୍ତନ ଦେଖିବାକୁ ମିଳିଥାଏ । ଅନେକ ସମୟରେ ସୁସ୍ଥ ସବଳ ଦେଖା ଯାଉଥିବା ଝିଅମାନେ ମଧ୍ୟ ଅନେକ ସମସ୍ୟା ଭୋଗୁଥାନ୍ତି ।
ଯଦି ଆପଣ ଜଣେ କିଶୋରୀ ଝିଅର ମା’ ହେଇଥାନ୍ତି, ତେବେ ସଚେତନ ରହିବା ଜରୁରି । ଡାକ୍ତର ପ୍ରିୟଙ୍କାଙ୍କ ମତରେ ୧୩ରୁ ୧୯ ବର୍ଷର ଝିଅମାନଙ୍କଠାରେ ମାଇଗ୍ରେନ୍, ରକ୍ତର ଅଭାବ ଓ ପିସିଓଏସ୍ ସମସ୍ୟା ହୋଇପାରେ । ଏହି ସମସ୍ୟା ପ୍ରତି ଆରମ୍ଭରୁ ହିଁ ସଚେତନ ରହିବା ଆବଶ୍ୟକ । ବିଶେଷଜ୍ଞଙ୍କ ମତରେ ଏହି ବୟସରେ ଡାଏଟ୍ ଓ ଜୀବନଶୈଳୀ ଉପରେ ବିଶେଷ ଧ୍ୟାନ ଦେବା ଦ୍ୱାରା ଏସବୁ ସମସ୍ୟାକୁ ଏଡାଇ ଦିଆଯାଇପାରେ । କିଶୋରୀମାନଙ୍କୁ ହାଇ ଫାଇବର, ହାଇ ପ୍ରୋଟିନ୍, ଆଇରନ୍ଯୁକ୍ତ ଖାଦ୍ୟ ଦେବା ଆବଶ୍ୟକ । ଯେପରିକିହାଇ ପ୍ରୋଟିନ୍ ଡାଏଟ୍- ଅଣ୍ଡା, ଦହି, ପନୀର, ବିଭିନ୍ନ ନଟ୍ସ ଆଇରନ୍ଯୁକ୍ତ ଡାଏଟ୍- ଛତୁ, ବେଦନା, ଖଜରା, ଗୁଡ ଓ ପାଳଙ୍ଗ ହଇ ଫାଇବର ଡାଏଟ୍- ସେଓ, ନଟ୍ସ, କଖାରୁ ମଞ୍ଜି ସହ ଅନ୍ୟାନ ମଞ୍ଜି ସେହିପରି ଆବଶ୍ୟକ ପାଣି ପିଇବା ମଧ୍ୟ ଜରୁରି । ଏହାବ୍ୟତୀତ ୯ରୁ ୨୬ ବର୍ଷ ବୟସ ମଧ୍ୟରେ ଗର୍ଭାଶୟ କର୍କଟ ପାଇଁ ଟୀକାକରଣ ମଧ୍ୟ କରାଇ ନେବା ଉଚିତ୍ । ଏହାବ୍ୟତୀତ ମା'ମାନେ ଝିଅକୁ ନେଇ ଏକ ନିର୍ଦ୍ଦିଷ୍ଟ ସମୟ ଅନ୍ତରରେ ଡାକ୍ତର ପରାମର୍ଶ କରିବା ଆବଶ୍ୟକ ।
