ସିସିଟିଭିରେ ସୁନ୍ଦରୀ ଲୁଟେରା, ଜୁଏଲାରୀ ଦୋକାନରୁ ଲୁଟିନେଲେ ୨ ମୁଦି
ଭୁବନେଶ୍ୱର,୩୧ ।୧(ବ୍ୟୁରୋ): ଦେଖିବାକୁ ଖୁବ୍ ସୁନ୍ଦରୀ । ଡ୍ରେସ୍ ପତ୍ର ଓ ହାବଭାବରୁ ଜଣେ ଉଚ୍ଚ ଶିକ୍ଷିତା ଭଳି ଜଣା ପଡ଼ୁଛନ୍ତି । ହେଲେ ତାଙ୍କର ଏହି ସୁନ୍ଦର ଚେହେରା ଭିତରେ ଥିବା ଆଉ ଗୋଟିଏ ସାଂଘାତିକ ଗୁଣକୁ ଦେଖି ସମସ୍ତେ ତାଜୁବ୍ ହୋଇ ଯାଇଛନ୍ତି । ସୁନ୍ଦରୀ ଜଣକ ଏକ ଜୁଏଲାରୀ ଦୋକାନରୁ ଅତି ଚତୁରତାର ସହ ଦୁଇଟି ସୁନା ମୁଦି ଲୁଟି ନେଇଛନ୍ତି । ସୁନାମୁଦି ଲୁଟି ନେବାର ଦୃଶ୍ୟ ଜୁଏଲାରୀ ଦୋକାନରେ ଲାଗିଥିବା ସିସିଟିଭିରେ ଉତ୍ତୋଳିତ ହୋଇଛି । ଘଟଣାଟି ଏମିତି । ରାଜମହଲ ଛକରେ ରହିଛି ଏକ ଜୁଏଲାରୀ ଦୋକାନ । ଗତକାଲି ଜଣେ ସୁନ୍ଦରୀ ଯୁବତୀ ଜିନ୍ସ ସାଙ୍ଗକୁ ଗୋଲାପି ରଙ୍ଗର ଫୁଲ୍ ସାର୍ଟ ଓ ମୁଣ୍ଡରେ ମଙ୍କି କ୍ୟାପ୍ ପିନ୍ଧି ଉକ୍ତ ଜୁଏଲାରୀ ଦୋକାନକୁ ଆସିଥିଲେ । ପ୍ରଥମେ କାନଫୁଲ ଦେଖାଇବାକୁ ଦୋକାନୀଙ୍କୁ କହିଥିଲେ । ଦୋକାନୀ କାନ ଫୁଲ ପାଇଁ ଭିତରକୁ ଯାଇଥିବା ବେଳେ ଯୁବତୀ ସୋକେସ୍
ବାକ୍ସରୁ ଏକ କାନଫୁଲ ନେଇ ଦୋକାନରୁ ବାହାରି ଯାଇଥିଲେ । କିଛିବାଟ ଯାଇ ଅନ୍ୟ ଏକ ଜୁଏଲାରୀ ଦୋକାନରେ ବିକ୍ରି କରିବା ପାଇଁ ଉଦ୍ୟମ କରୁଥିବା ବେଳେ ତାହା
ଇମିଟେସନ୍ ବୋଲି ଜାଣିବାକୁ ପାଇଥିଲେ । ତେଣୁ ସେ ପୁଣି ଉକ୍ତ ଜୁଏଲାରୀକୁ ଆସି ଦୋକାନୀଙ୍କୁ କହିଥିଲେ, ସୁନା କାନଫୁଲ ନୁହେଁ, ଘରୁ ସୁନା ମୁଦି ପାଇଁ ବରାଦ
ଆସିଲା । ତେଣୁ ଦୋକାନୀ ତାଙ୍କୁ ସୁନାମୁଦି ଦେଖାଇଥିଲେ । ସଂପୃକ୍ତ ଯୁବତୀ ଗୋଟାଏ ପରେ ଗୋଟାଏ ସୁନା ମୁଦି ନିଜ ଅଙ୍ଗୁଳିରେ ଗଳାଇ ପରଖୁଥିଲେ । ଦୋକାନୀଙ୍କ ଟିକେ ଅନ୍ୟମନସ୍କତାର ସୁଯୋଗରେ ଦୁଇଟି ମୁଦିକୁ ମୁଣ୍ଡରେ ପିନ୍ଧିଥିବା ମଙ୍କି କ୍ୟାପ୍ ଭିତରେ ଲୁଚାଇ ଦେଇଥିଲେ । ଯାହାକି ଦୋକାନୀ ଜାଣିପାରି ନଥିଲେ । ପସନ୍ଦ ହେଉନାହିଁ କହି ଯୁବତୀ ଜଣଙ୍କ ସେଠାରୁ ପଳାଇଥିଲେ । ରାତିରେ ଦୋକାନର ସୁନା ଅଳଙ୍କାର ସବୁ ଗଣତିବେଳେ ଦୁଇଟି ସୁନା ମୁଦି ନଥିବା ଜଣା ପଡ଼ିଥିଲା । ତେଣୁ ଦୋକାନୀ ସିସିଟିଭି ଫୁଟେଜ୍କୁ ଯାଞ୍ଚ କରିଥିଲେ । ସେଥିରେ ଯୁବତୀ ଜଣକ ସୁନା ମୁଦି ଦୁଇଟି ମଙ୍କି କ୍ୟାପ୍ରେ ଲୁଚାଇ ନେଉଥିବାର ଦୃଶ୍ୟ ଦେଖିବାକୁ ପାଇଥିଲେ । ଚୋରି ଯାଇଥିବା ଦୁଇଟି ସୁନା ମୁଦିର ମୂଲ୍ୟ ପ୍ରାୟ ୬୦ ହଜାର ଟଙ୍କା ହେବ ବୋଲି ଦୋକାନୀ କହିଛନ୍ତି । ତେବେ ଏନେଇ ସେ ଥାନାରେ କୌଣସି ଅଭିଯୋଗ କରି ନଥିବା ଜଣା ପଡ଼ିଛି ।
