ନୂଆଦିଲ୍ଲୀ, ୧୩।୧୧: ଦିଲ୍ଲୀରେ ଆଉ ଏକ ବିସ୍ଫୋରଣ ! ଲାଲକିଲ୍ଲା ବିସ୍ଫୋରଣ ପରେ ଦିଲ୍ଲୀରେ ଆଉ ଏକ ବିସ୍ଫୋରଣ ଘଟଣା ଖବର ଆସିବା ପରେ ଆଖପାଖ ଅଞ୍ଚଳରେ ଆତଙ୍କ ଖେଳିଯାଇଛି । ଗୁରୁବାର ସକାଳେ ଦିଲ୍ଲୀ ମହିପାଳପୁର ଅଞ୍ଚଳର ରାଡିସନ ହୋଟେଲ ନିକଟରେ ଆଉ ଏକ ବିସ୍ଫୋରଣ ପରି ଶବ୍ଦ ଶୁଣାଗଲା । ସକାଳ ୯ଟା ୧୮ରେ ଏହି ବିସ୍ଫୋରଣ ଘଟିଥିବା ସୂଚନା । ଘଟଣାସ୍ଥଳରେ ଅଗ୍ନିଶମବାହିନୀ ପହଞ୍ଚିଥିବା ବେଳେ ପୁଲିସ ମଧ୍ୟ ଘଟଣାର ତଦନ୍ତ ଆରମ୍ଭ କରିଛି ।
ତଦନ୍ତ ପରେ ଜଣେ ସୁରକ୍ଷା କର୍ମୀ କହିଛନ୍ତି ଯେ, ଧଉଳା କୁଆଁ ଅଭିମୁଖେ ଯାଉଥିବା ଏକ DTC ବସ୍ର ପଛ ଟାୟାରରୁ ଜୋରରେ ଶବ୍ଦ ଆସୁଥିଲା, ଯାହା ଫାଟି ଯାଇଥିଲା । ପରିସ୍ଥିତି ଏବେ ସ୍ୱାଭାବିକ ମନେ ହେଉଛି । ତଥାପି, ପୁଲିସ ଏପର୍ଯ୍ୟନ୍ତ କୌଣସି ସରକାରୀ ନିଶ୍ଚିତକରଣ ଜାରି କରିନାହିଁ । ଦିଲ୍ଲୀର ଫାୟାର ସର୍ଭିସ୍ ଖବର ମିଳିବା ପରେ ୩ଟି ଦମକଳ ଗାଡ଼ିକୁ ଘଟଣାସ୍ଥଳକୁ ପଠାଯାଇଛି । ପୁଲିସ ଓ ସୁରକ୍ଷା କର୍ମଚାରୀଙ୍କୁ ମଧ୍ୟ ପଠାଯାଇଛି । ତେବେ ଏ ପର୍ଯ୍ୟନ୍ତ କୌଣସି କ୍ଷୟକ୍ଷତିର ସୂଚନା ମିଳିନାହିଁ । ବ୍ଲାଷ୍ଟ ପରେ ଏହି ଅଞ୍ଚଳକୁ ସିଲ୍ କରିଦିଆଯାଇଥିବା ବେଳେ ତଦନ୍ତ ଜାରି ରହିଛି ।
ସୋମବାର ସନ୍ଧ୍ୟାରେ ପୁରୁଣା ଦିଲ୍ଲୀରେ କାର ବିସ୍ଫୋରଣ ଘଟିଥିଲା, ଯେଉଁଥିରେ ଅତି କମରେ ୧୩ ଜଣଙ୍କର ମୃତ୍ୟୁ ହୋଇଥିବା ବେଳେ ୨୦ରୁ ଅଧିକ ଆହତ ହୋଇଥିଲେ । ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ, ଏହା ନିକଟସ୍ଥ ଦୋକାନର କାଚ ଝରକା ଭାଙ୍ଗି ଦେଇଥିଲା ଏବଂ ପୁରା ଅଞ୍ଚଳରେ ଆତଙ୍କ ଖେଳିଯାଇଥିଲା । ଘଟଣାର ପ୍ରାରମ୍ଭିକ ତଦନ୍ତ ଡକ୍ଟର ଉମରଙ୍କୁ ନେଇ ହୋଇଥିଲା, କାରଣ ସେ ଘଟଣାର ୧୦ ଦିନ ପୂର୍ବରୁ ବିସ୍ଫୋରଣରେ ବ୍ୟବହୃତ ଧଳା ହୁଣ୍ଡାଇ i20 କାର କିଣିଥିଲେ । ବିସ୍ଫୋରଣ ପରେ ତାଙ୍କ ମୃତଦେହ କାର ପାଖରେ ଉଦ୍ଧାର କରାଯାଇଥିଲା, କିନ୍ତୁ ଚିହ୍ନଟ ସମ୍ଭବ ହୋଇପାରିନଥିଲା । ବର୍ତ୍ତମାନ, ପୁଲୱାମାରେ ତାଙ୍କ ପରିବାରରୁ ସଂଗୃହୀତ ନମୁନାର ଡିଏନ୍ଏ ପରୀକ୍ଷାରୁ ନିଶ୍ଚିତ ହୋଇଛି ଯେ ସେ ହିଁ ଆକ୍ରମଣକାରୀ ଥିଲେ ।
