ମା’କୁ କଟୁରୀରେ ହାଣି ବିଭତ୍ସ ଭାବେ ହତ୍ୟାକଲା ପୁଅ, ଅଭିଯୁକ୍ତକୁ ବାନ୍ଧିଲା ପୋଲିସ
ପାରାଦୀପ ୨୩/୦୫: ତୁଚ୍ଛ ହେଲା ମମତା। ମା’କୁ କଟୁରୀରେ ହାଣି ବିଭତ୍ସ ଭାବେ ହତ୍ୟାକଲା ପୁଅ। ଏଭଳି ଅଭାବନୀୟ ଘଟଣା ପାରାଦୀପ ଲକ ଥାନା ଅନ୍ତର୍ଗତ ଭୁତମୁଣ୍ଡାଇ ପଞ୍ଚାୟତର କୁମ୍ଭାର ସାହିରେ। ଏହା ପରେ ଅଞ୍ଚଳରେ ଶୋକଛାୟା ଖେଳିଯାଇଛି। ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।
ସୂଚନା ମୁତାବିକ, ନୂଆଗଡର ଏକ ଘରୋଇ ବିଦ୍ୟାଳୟରେ ଶିକ୍ଷୟିତ୍ରୀ ଥିବା କୁମ୍ଭାର ସାହିର ସୁଲୋଚନା ଦେଇ(୫୮) ମଙ୍ଗଳବାର ସକାଳେ ଘରେ ଥିବା ବେଳେ ତାଙ୍କ ସାନ ପୁଅ ଅଂଶୁମାନ ବେହେରା ହଠାତ ସୁଲୋଚନାଙ୍କୁ ଏକ ଧାରୁଆ କଟୁରୀରେ ଆକ୍ରମଣ କରିଥିଲେ। ପୁଅର ଏଭଳି ରୂପ ଦେଖି ସୁଲୋଚନା ଘର ବାହାରକୁ ଦୌଡ଼ି ଆସିଥିଲେ। କିନ୍ତୁ ସୁଲୋଚନା ତଳେ ପଡିଯିବାରୁ ତାଙ୍କ ମୁଣ୍ଡକୁ ଚୋଟ ପରେ ଚୋଟ ପକେଇ ଚାଲିଥିଲା ଅଂଶୁମାନ। ଅତି ବିଭତ୍ସ ଭାବରେ ହାଣି ମୁଣ୍ଡକୁ ଛତୁ କରିଦେଇଥିଲା । ଘଟଣା ସ୍ଥଳରେ ସୁଲୋଚନାଙ୍କ ମୃତ୍ୟୁ ହେବାପରେ ଘଟଣା ପ୍ରଘଟ ହୋଇଥିଲା। ପାଖ ପଡୋଶୀ ଆସି ଦେଖିବା ପରେ ଲକ ପୁଲିସକୁ ଖବର ଦିଆଯାଇଥିଲା। ପୁଲିସ ପହଞ୍ଚି ମୃତଦେହକୁ ଜବତ କରିବା ସହ ହତ୍ୟା ଅଭିଯୋଗରେ ଅଂଶୁମାନକୁ ପୁଲିସ ଅଟକ ରଖିଛି। ହତ୍ୟାରେ ବ୍ୟବହୃତ କଟୁରୀକୁ ପୁଲିସ ଜବତ କରିଛି । ତେବେ ଦୀର୍ଘଦିନ ହେବ ଅଂଶୁମାନ ମାନସିକ ରୋଗ ପାଇଁ ଔଷଧ ଖାଇବା ସହ ଚିକିତ୍ସା ହେଉଥିବା ଜଣା ପଡିଛି । ଏଭଳି ଏକ ହତ୍ୟାକାଣ୍ଡ ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇଦେଇଛି।
