ଭାରତର ଐତିହାସିକ ଗେଟୱେ ଅଫ୍ ଇଣ୍ଡିଆ ଉପରେ ବିପଦ; ରିପୋର୍ଟ ପ୍ରକାଶ କଲା ପ୍ରତ୍ନତତ୍ତ୍ୱ ବିଭାଗ
Image Courtesy: Jansatta
ନୂଆଦିଲ୍ଲୀ,୦୮/ ୦୨: ମୁମ୍ବାଇରେ ଆରବସାଗର ଉପକୂଳରେ ଅବସ୍ଥିତ ଭାରତର ଐତିହାସିକ ଗେଟୱେ ଅଫ୍ ଇଣ୍ଡିଆ ବିପଦରେ ରହିଛି। ଏହି ଐତିହ୍ୟ ପ୍ରାୟ ଶହେ ବର୍ଷ ପୁରୁଣା। ୨୦୨୪ରେ ଏହା ୧୦୦ତମ ବର୍ଷରେ ପଦାର୍ପଣ କରିବ। ମହାରାଷ୍ଟ୍ରର ପ୍ରତ୍ନତତ୍ତ୍ୱ ବିଭାଗ ଗେଟ୍ଓ୍ବେ ଅଫ୍ ଇଣ୍ଡିଆରେ ହୋଇଥିବା କ୍ଷୟକ୍ଷତିକୁ ନେଇ ଏକ ଗଠନମୂଳକ ଅଡିଟ୍ ରିପୋର୍ଟ ପ୍ରସ୍ତୁତ କରିଛନ୍ତି। ଏହି ରିପୋର୍ଟରେ ଏକ ଆଶ୍ଚର୍ଯ୍ୟଜନକ ଦାବି କରାଯାଇଛି। ରାଜ୍ୟ ପ୍ରତ୍ନତତ୍ବ ବିଭାଗର ରିପୋର୍ଟ ମୁତାବକ, ଗେଟ୍ଓ୍ବେ ଅଫ୍ ଇଣ୍ଡିଆ ଭିତ୍ତିପ୍ରସ୍ତର ଏବଂ କାନ୍ଥରେ ଫାଟ ସୃଷ୍ଟି ହେଉଛି। ଏହି କାରଣରୁ କୋଠାଟି ଦୁର୍ବଳ ହେବାରେ ଲାଗିଛି, ଯାହାର ମରାମତି ହେବା ଆବଶ୍ୟକ। ରାଜ୍ୟ ପ୍ରତ୍ନତତ୍ତ୍ୱ ବିଭାଗ ମହାରାଷ୍ଟ୍ର ସରକାରଙ୍କୁ ଗେଟୱେ ଅଫ୍ ଇଣ୍ଡିଆର ମରାମତି କରିବାକୁ ଅନୁରୋଧ କରିଛି।
ସୂଚନାଥାଉକି, ୧୯୨୪ ମସିହାରେ ମୁମ୍ବାଇର ସମୁଦ୍ର କୂଳରେ ଗେଟୱେ ଅଫ୍ ଇଣ୍ଡିଆ ନିର୍ମାଣ କରାଯାଇଥିଲା। କୁହାଯାଏ ଯେ ସେହି ସମୟରେ ଏହା କିଙ୍ଗ୍ ଜର୍ଜ ଭିଙ୍କୁ ସ୍ୱାଗତ କରିବା ପାଇଁ ପ୍ରସ୍ତୁତ କରାଯାଇଥିଲା। କିଙ୍ଗ ଜର୍ଜ ଭି ଭାରତ ଗସ୍ତ ସମୟରେ ପ୍ରଥମେ ଏହି ଫାଟକ ଦେଇ ପ୍ରବେଶ କରିଥିଲେ। ଏଥି ସହିତ, ବ୍ରିଟିଶ ମାନଙ୍କର ଶେଷ କଣ୍ଟିଜେଣ୍ଟ ମଧ୍ୟ ଏହି ଗେଟୱେ ଅଫ୍ ଇଣ୍ଡିଆ ଦେଇ ଭାରତ ଛାଡିଥିଲେ ଏବଂ ଭାରତ ବ୍ରିଟିଶ ଶାସନରୁ ମୁକ୍ତ ହୋଇଥିଲା।
ଗେଟୱେ ଅଫ୍ ଇଣ୍ଡିଆର ସୁରକ୍ଷା ଦାୟିତ୍ବ ମହାରାଷ୍ଟ୍ର ସରକାରଙ୍କ ଉପରେ ନ୍ୟସ୍ତ। ରାଜ୍ୟ ସରକାର ଏହାକୁ ଅଣଦେଖା କରୁଥିବା ଅଭିଯୋଗ ହୋଇଛି। ତେବେ ମହାରାଷ୍ଟ୍ରର ସଂସ୍କୃତି ମନ୍ତ୍ରୀ ସୁଧୀର ମୁଙ୍ଗନ୍ତୀୱାର ନିଶ୍ଚିତ କରିଛନ୍ତି ଯେ, ଗେଟୱେ ଅଫ୍ ଇଣ୍ଡିଆ ମରାମତି ପାଇଁ ପ୍ରାୟ ୮ କୋଟି ଟଙ୍କାର ପ୍ରସ୍ତାବ ଦିଆଯାଇଛି। ଖୁବ୍ ଶୀଘ୍ର ଏହି ରାଶି ମଞ୍ଜୁର କରାଯାଇ ପୁରୁଣା ଐତିହାସିକ ପ୍ରାଚୁର୍ଯ୍ୟକୁ ମରାମତି କରାଯିବ।
