ମୁମ୍ବାଇ: ମହାରାଷ୍ଟ୍ରର ମୁଖ୍ୟମନ୍ତ୍ରୀ ଭାରତୀୟ ଜନତା ପାର୍ଟି (ବିଜେପି)ରୁ ହେବେ ଏବଂ ତାଙ୍କୁ ସହଯୋଗ କରିବେ ଦୁଇ ଜଣ ଉପମୁଖ୍ୟମନ୍ତ୍ରୀ । ଏକାନଥ ସିନ୍ଦେ ଏବଂ ଅଜିତ ପାଓ୍ବାରଙ୍କ ଦଳରୁ ଦୁଇ ଜଣ ଉପମୁଖ୍ୟମନ୍ତ୍ରୀ ହୋଇପାରନ୍ତି । ମହାରାଷ୍ଟ୍ର ବିଧାନସଭା ନିର୍ବାଚନରେ ମହାୟୁତିର ବିଶାଳ ବିଜୟ ପରେ ଏବେ ମୁଖ୍ୟମନ୍ତ୍ରୀ ପଦକୁ ନେଇ ଛକାପଞ୍ଝା ଜାରି ରହିଛି । ବଡ଼ ଭାଇ ଭୂମିକାରେ ଥିବା ବିଜେପି ନିଜ ନେତାଙ୍କୁ ମୁଖ୍ୟମନ୍ତ୍ରୀ କରାଇବାକୁ ଏକ ପ୍ରକାର ନିଶ୍ଚିତ ରହିଛି । ସେପଟେ ଏକନାଥ ସନ୍ଦେ ବିଜେପିର ନିଷ୍ପତ୍ତିକୁ ସମର୍ଥନ ଦେବେ ବୋଲି କହିସାରିଛନ୍ତି ।
୨୮୮ ଆସନ ଥିବା ମହାରାଷ୍ଟ୍ର ବିଧାନସଭାରେ ବିଜେପି ଏକାକୀ ୧୩୨ ଆସନରେ ବିଜୟୀ ହୋଇଛି । ସିନ୍ଦେଙ୍କ ଶିବସେନା, ଅଜିତ ପାଓ୍ବାରଙ୍କ ଏନସିପି ଏବଂ ବିଜେପି ମିଳିତ ଭାବେ ୨୩୫ ଆସନ ଜିତିଛନ୍ତି । ହେଲେ ମହାରାଷ୍ଟ୍ରରେ କିଏ ମୁଖ୍ୟମନ୍ତ୍ରୀ ହେବେ ସେନେଇ ସ୍ପଷ୍ଟ ଚିତ୍ର ସାମ୍ନାକୁ ଆସି ନାହିଁ । ବିଜେପିର ଦେବେନ୍ଦ୍ର ଫଡ଼ନାଭିସ୍ ହିଁ ରାଜ୍ୟର ମୁଖ୍ୟମନ୍ତ୍ରୀ ହୋଇପାରନ୍ତି ବୋଲି ଚର୍ଚ୍ଚା ଜୋର ଧରିଛି ।
ମୁଖ୍ୟମନ୍ତ୍ରୀ କିଏ ହେବେ ତାକୁ ନେଇ ବିବାଦ ମୁଣ୍ଡ ଟେକିଛି ବୋଲି ଦାବି ହୋଇଛି । କିନ୍ତୁ ଏଭଳି ଦାବିର କୌଣସି ସତ୍ୟତା ନାହିଁ ବୋଲି ଉଭୟ ଫଡ଼ନାଭିସ ଏବଂ ସିନ୍ଦେ ସ୍ପଷ୍ଟ କରିଛନ୍ତି । କୌଣସି ବିବାଦ ନାହିଁ, ୩ ଦଳ ମିଶି ନିର୍ବାଚନ ଲଢ଼ିଛୁ । ମୁଖ୍ୟମନ୍ତ୍ରୀ କିଏ ହେବେ ସେନେଇ ୩ ଦଳ ମିଳିତ ଭାବେ ନିଷ୍ପତ୍ତି ନେବେ ବୋଲି ବିଜେପି ନେତା ଫଡ଼ନାଭିସ୍ କହିଛନ୍ତି । ସେହିଭଳି ସମାନ କଥା ଦୋହରାଇଛନ୍ତି ଏକନାଥ ସିନ୍ଦେ ।
ଅନ୍ୟପଟେ ଆଜି ଏକନାଥ ସିନ୍ଦେ କହିଛନ୍ତି, ଯଦି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅନ୍ୟ କାହାକୁ ମୁଖ୍ୟମନ୍ତ୍ରୀ କରାଇବାକୁ ନିଷ୍ପତ୍ତି ନିଅନ୍ତି ତେବେ ମୁଁ ଏହାକୁ ବିରୋଧ କରିବି ନାହିଁ । ଆଉ ଏହା ପରେ ଜଣେ ମୁଖ୍ୟମନ୍ତ୍ରୀ ଓ ଦୁଇ ଜଣ ଉପମୁଖ୍ୟମନ୍ତ୍ରୀ ଫର୍ମୁଲା ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ଏସବୁ ଭିତରେ ଗୁରୁବାର ୩ ନେତା ଦେବେନ୍ଦ୍ର ଫଡ଼ନାଭିସ୍, ଏକାନଥ ସିନ୍ଦେ ଏବଂ ଅଜିତ ପାଓ୍ବାର କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ଭେଟିବେ ବୋଲି ଜଣାପଡ଼ିଛି ।
