ଭୁବନେଶ୍ୱର,୩୦/୦୯: ସର୍ବମଙ୍ଗଲ ମାଙ୍ଗଲ୍ୟେ ଶିବେ ସର୍ବାର୍ଥ ସାଧିକେ, ଶରଣ୍ୟେ ତ୍ର୍ୟମ୍ବକେ ଗୌରୀ, ନାରାୟଣୀ ନମୋସ୍ତୁତେ... ପ୍ରତୀକ୍ଷାର ଅନ୍ତ । ଜଗତଜନନୀ ମା’ ଦୁର୍ଗା ଭକ୍ତଙ୍କୁ ଦର୍ଶନ ଦେଇଛନ୍ତି। ପୀଠେ ମହାନବମୀ ଏବଂ ମଣ୍ଡପରେ ମହାଷ୍ଟମୀ ପୂଜା ନୀତି କାନ୍ତି ଚାଲିଛି । ସବୁଠି ଦୁର୍ଗାପୂଜା ପାଇଁ ଆଧ୍ୟାତ୍ମିକ ପରିବେଶ । ମାଆଙ୍କୁ ଦର୍ଶନ ପାଇଁ ଶ୍ରଦ୍ଧାଳୁଙ୍କ ଗହଳି ଚହଳି ଲାଗିଛି । ପୁରୋହିତଙ୍କ ମନ୍ତ୍ର ଉଚ୍ଚାରଣ, ଘଣ୍ଟ ଘଣ୍ଟାରେ ଭାବ ଭକ୍ତିମୟ ପରିବେଶ । ସ୍ବତନ୍ତ୍ର ରୀତିନୀତି ଅନୁସାରେ ଜଗଜ୍ଜନନୀ ମା’ ଦୁର୍ଗାଙ୍କ ପୂଜାର୍ଚ୍ଚନା କରାଯାଉଛି। ରାତିରେ ସନ୍ଧିପୂଜା, ବଳି ସହ ଚଣ୍ଡୀପାଠ କରାଯିବ ।
ସୋମବାର ସପ୍ତମୀ ପୂର୍ବାହ୍ଣରେ ଘଟ ପ୍ରତିଷ୍ଠା ସହ ମା’ଙ୍କ ଚକ୍ଷୁଦାନ ଓ ପ୍ରାଣପ୍ରତିଷ୍ଠା ହୋଇଥିଲା। ଧରାପୃଷ୍ଠକୁ ମା’ଙ୍କୁ ଆବାହନ କରିଥିଲେ ଶାସ୍ତ୍ରଜ୍ଞ ପଣ୍ଡିତ । ପରେ ସପ୍ତଶତୀ ଚଣ୍ଡୀପାଠରେ ପ୍ରକମ୍ପିତ ହୋଇଥିଲା ପୂଜା ମଣ୍ଡପ। ଦିନତମାମ ମା’ଙ୍କ ଦର୍ଶନ ପାଇଁ ପୂଜା ମଣ୍ଡପରେ ଅସମ୍ଭାଳ ଭିଡ଼ ଲାଗି ରହିଥିଲା । ସନ୍ଧ୍ୟାରେ ସାରା ସହର ଏକପ୍ରକାର ଉତ୍ସବମୟ ପାଲଟିଲା । ପୂଜା ଜମୁଥିବାରୁ ମନୋରଞ୍ଜନ ପାଇଁ ବଜାର, ରାମଦୋଳି ଆଦି ଲାଗିଛି । ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ଆରମ୍ଭ ହୋଇଛି । ବିଭିନ୍ନ ରାଜନୈତିକ ଦଳର ଛାମୁଆ ନେତା ଓ ସରକାରୀ ଦଳର ମନ୍ତ୍ରୀଗଣ ମଣ୍ଡପ ବୁଲି ମା’ଙ୍କ ଆର୍ଶୀବାଦ ଲୋଡ଼ିଛନ୍ତି । ବାଚସ୍ପତି ସୁରମା ପାଢ଼ୀ, ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ପୃଥ୍ୱୀରାଜ ହରିଚନ୍ଦନ, ସମ୍ପଦ ସ୍ୱାଇଁ ପ୍ରମୁଖ ଝାରପଡ଼ା ଦୁର୍ଗାପୂଜା ମଣ୍ଡପ ବୁଲିଥିଲେ ।
