କୋଲକାତା,୨।୬: ପଶ୍ଚିମବଙ୍ଗରେ କ୍ଷମତା ପରିବର୍ତ୍ତନ ପରେ, ଆଭ୍ୟନ୍ତରୀଣ କନ୍ଦଳ ଏବଂ ଦଳୀୟ ନେତାଙ୍କ ଉପରେ ଆକ୍ରମଣ ଯୋଗୁଁ ମମତା ବାନାର୍ଜୀଙ୍କ ଟିଏମ୍ସିରେ ରାଜନୈତିକ ଉତ୍ତେଜନା ବୃଦ୍ଧି ପାଇଛି। ଟିଏମସି ଭିତରେ ବିଭାଜନର ଖବର ମଧ୍ୟ ଆସିଛି, ଯାହା ମମତା ବାନାର୍ଜୀଙ୍କ ପାଇଁ ଏକ ନୂତନ ଚ୍ୟାଲେଞ୍ଜ । ଏହି ସମୟରେ, ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀ ଦଳୀୟ କର୍ମୀ ଏବଂ ବରିଷ୍ଠ ନେତାଙ୍କ ଉପରେ ଆକ୍ରମଣର ପ୍ରତିବାଦରେ କୋଲକାତାର ରାଣୀ ରାଶମୋଣୀ ଆଭେନ୍ୟୁରେ ଯୋଗଦେବାର କାର୍ଯ୍ୟକ୍ରମ ଥିଲା, କିନ୍ତୁ ପରେ କୋଲକାତା ପୋଲିସର ଅନୁମତି ମିଳିନଥିବାରୁ ଶେଷ ମୁହୂର୍ତ୍ତରେ ସ୍ଥାନ ପରିବର୍ତ୍ତନ କରାଯାଇଥିଲା। ପ୍ରାରମ୍ଭରେ, ମମତା ବାନାର୍ଜୀ ସମସ୍ତ ଟିଏମସି ନେତା ଧର୍ମତଲାର ଏକ ବସ୍ ଷ୍ଟପରେ ପହଞ୍ଚିଥିଲେ। ଏହି ସମୟରେ ତାଙ୍କ ସହିତ ପୁତୁରା ଅଭିଷେକ ବାନାର୍ଜୀ, ଟିଏମସିର ବଡ଼ ନେତା ମଦନ ମିତ୍ର, ସାଂସଦ କଲ୍ୟାଣ ବାନାର୍ଜୀ, ଫିରହାତ ହକିମ, ଡରେକ୍ ଓ’ବ୍ରାୟନ୍ ଓ ଡୋଲା ସେନ୍ ବି ଥିଲେ। ତେବେ ନିକଟରେ ଟିଏମସି ଟିକେଟରେ ବିଧାନସଭା ଆସନ ଜିତିଥିବା ଅଧିକାଂଶ ବିଧାୟକ ଏହି ସମୟରେ ଅନୁପସ୍ଥିତ ଥିଲେ।

ପ୍ରତିବାଦ ଆରମ୍ଭ କରିବା ପୂର୍ବରୁ, ବାନାର୍ଜୀ ରେଡ ରୋଡରେ ଥିବା ଡକ୍ଟର ବି.ଆର. ଆମ୍ବେଦକରଙ୍କ ପ୍ରତିମୂର୍ତ୍ତିରେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ମମତା। ଏହି ସମୟରେ ତାଙ୍କୁ ଭାରତର ସମ୍ବିଧାନ ଉପରେ ଏକ ପୁସ୍ତକ ଧରିଥିବାର ମଧ୍ୟ ଦେଖାଯାଇଥିଲା। ମମତା ଏକ ମେଗାଫୋନ୍‌ରେ ଲୋକଙ୍କୁ ସମ୍ବୋଧିତ କରି କହିଥିଲେ, ଆମକୁ ମଞ୍ଚ ତିଆରି କରିବା କିମ୍ବା ମାଇକ୍ରୋଫୋନ୍ ବ୍ୟବହାର ନକରିବାକୁ ଅନୁମତି ମିଳିନଥିଲା। କିନ୍ତୁ ମୁଁ ଲଢିବି କିମ୍ବା ମରିବି। ମମତା ବିଜେପିକୁ ଚ୍ୟାଲେଞ୍ଜ ଦେଇ କହିଛନ୍ତି, ଯଦି ସେମାନେ ଚାହାଁନ୍ତି ତେବେ ତାଙ୍କୁ ଗିରଫ କରିପାରନ୍ତି। ଯଦି ତାଙ୍କୁ କୋଲକାତାରେ ବିଶେଷ ଭାବରେ ଧାରଣା ଦେବାର ଅନୁମତି ଦିଆଯିବ ନାହିଁ ତେବେ ସେ ଦିଲ୍ଲୀ ଚାଲିଯିବେ।

କୋଲକାତା ପୋଲିସ ସୋମବାର ମମତା ବାନାର୍ଜୀଙ୍କୁ ପ୍ରତିବାଦ କରିବାକୁ ଅନୁମତି ଦେବାକୁ ମନା କରିଦେଇଥିଲା। ଏହା ସତ୍ତ୍ୱେ, ବଙ୍ଗଳାର ପୂର୍ବତନ ମୁଖ୍ୟମନ୍ତ୍ରୀ ପ୍ରତିବାଦ କରିବାକୁ ପହଞ୍ଚିଛନ୍ତି। ଧାରଣାରେ ବସିଥିବା ସମୟରେ, ମମତା କହିଛନ୍ତି, ବଙ୍ଗଳାର ପୋଲିସ ଟିଏମସି ନେତାଙ୍କୁ ଧମକ ଦେଉଛି। ମୋ କାର୍ଯ୍ୟକାଳ ମଧ୍ୟରେ, ମୁଁ ସମସ୍ତଙ୍କ ସହିତ ଛିଡ଼ା ହୋଇଥିଲି, ଯଦିଓ ସେମାନଙ୍କ ବିଚାରଧାରା ମୋ ଦଳ ସହିତ ସମାନ ନଥିଲା। ଯେତେବେଳେ ବିଜେପି ସାହାଯ୍ୟ ମାଗିଥିଲା, ମୁଁ ସେମାନଙ୍କୁ ସାହାଯ୍ୟ କରିଥିଲି। ତାଙ୍କର  ସବୁଠାରୁ ଖରାପ ଦିନଗୁଡ଼ିକରେ ମୁଁ ସେମାନଙ୍କ ସହିତ ଛିଡ଼ା ହୋଇଥିଲି। ବିଜେପି ଅଧ୍ୟକ୍ଷ ମୋତେ ଅନେକ ଥର ଫୋନ୍ କରି ସାହାଯ୍ୟ ମାଗିଥିଲେ, କିନ୍ତୁ ମୁଁ କେବେ ଗଣମାଧ୍ୟମକୁ ଏ ବିଷୟରେ କହି ନଥିଲି। ବିଜେପି ବ୍ୟତୀତ ମୋର ସମସ୍ତ ରାଜନୈତିକ ଦଳ ସହିତ ଭଲ ସମ୍ପର୍କ ଅଛି, କିନ୍ତୁ ଯେତେବେଳେ ବିଜେପି ସାହାଯ୍ୟ ମାଗିଛି, ମୁଁ ସେମାନଙ୍କୁ ସାହାଯ୍ୟ କରିଛି। ମୁଁ ନିଜେ ମଧ୍ୟ ସେମାନଙ୍କୁ ଫୋନ୍ କରିଥିଲି। ମୁଁ ଏଠାରେ ଅଛି ଏବଂ ଏଠାରେ ରହିବି। ଯେପର୍ଯ୍ୟନ୍ତ ବଞ୍ଚିଛି, ମୁଁ ଜଣେ ସାହସୀ  ପରି ଲଢ଼ିବି। ଏହି ସମୟରେ ସେ ବିଜେପିକୁ ଏକ ଶେଷ ଚ୍ୟାଲେଞ୍ଜ ଦେଇ କହିଥିଲେ, ମୁଁ ଲଢିବି ନଚେତ ମରିବି।’

ମମତା କହିଛନ୍ତି ପୋଲିସ ଲୋକଙ୍କୁ ଏଠାକୁ ଆସିବାକୁ ଦେଉନାହିଁ। ସେମାନଙ୍କୁ ଏଠାକୁ ଆସିବାକୁ ଦିଅ, ନଚେତ୍ କୋଲକାତା ପୋଲିସ ମୁଖ୍ୟାଳୟ ଘେରାଉ କରାଯିବ। ପୋଲିସ ଟିଏମସି କର୍ମୀମାନଙ୍କୁ ପ୍ରଦର୍ଶନରେ ଅଂଶଗ୍ରହଣ ନକରିବାକୁ ଧମକ ଦେଉଛି, କିନ୍ତୁ ସେ ତାଙ୍କର ପ୍ରତିବାଦ ଜାରି ରଖିବେ। ଏହି ସମୟରେ ମମତା ପୂର୍ବତନ ମୁଖ୍ୟମନ୍ତ୍ରୀ ବର୍ତ୍ତମାନର ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କୁ ମଧ୍ୟ କଟାକ୍ଷ କରି କହିଛନ୍ତି,ବିଜେପିର ପୁରୁଣା ଲୋକଙ୍କ ପାଖରେ ଏବେ କ୍ଷମତା ନାହିଁ, କିନ୍ତୁ ଯେଉଁମାନେ ଅନ୍ୟ ଦଳରୁ ଆସିଛନ୍ତି ସେମାନଙ୍କ ପାଖରେ କ୍ଷମତା ଅଛି।

ପୁତୁରା ଏବଂ ଦଳୀୟ ସାଂସଦ ଅଭିଷେକ ବାନାର୍ଜୀଙ୍କ ଉପରେ ହୋଇଥିବା ଆକ୍ରମଣର ନେଇ ମମତା କହିଛନ୍ତି   ଯଦି ସେହି ଦିନ ହେଲମେଟ୍ ନଥାନ୍ତା ଏବଂ ପଥରଟି ଅଭିଷେକଙ୍କ ମୁଣ୍ଡରେ ବାଜିଥାନ୍ତା, ତେବେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଯାଇଥାନ୍ତା। ଯେଉଁ ଲୋକେ ତାଙ୍କୁ କେବେ ସାହାଯ୍ୟ ମାଗିଥିଲେ ସେମାନେ ଡାଇମଣ୍ଡ ହାର୍ବର ସାଂସଦଙ୍କ ଉପରେ ହୋଇଥିବା ଘାତକ ଆକ୍ରମଣ ସମୟରେ କୌଣସି ସମର୍ଥନ ଦେଇ ନଥିଲେ। ଅନୁମତି ନମିଳିବା ପରେ ବି ବିରୋଧ ପ୍ରଦର୍ଶନ କରୁଥିବା କାରଣରୁ ଘଟଣାସ୍ଥଳରେ ଉତ୍ତେଜନାପୂର୍ଣ୍ଣ ସ୍ଥିତି ସୃଷ୍ଟି ହୋଇଛି।   ଏହି ସମୟରେ ବିରୋଧ ସ୍ଥଳରେ ଲୋକଙ୍କର ପ୍ରବଳ ଗହଳି ଜମା ହୋଇ ରହିଛି।