୯ ବର୍ଷ ପୂର୍ବେ ହୋଇଥିଲା ମୃତ୍ୟୁ, ଏବେ ଜୀବନ୍ତ ଫେରିଲେ ବ୍ୟକ୍ତି
ନୂଆଦିଲ୍ଲୀ ୦୯/୦୩ : ଯେତେବେଳେ ଆମେ ନିଜର ଲୋକଙ୍କୁ ହରାଇଥାଉ, ତାଙ୍କୁ ଭୁଲିଯିବାକୁ ବର୍ଷ ବର୍ଷ ସମୟ ଲାଗିଥାଏ। କିନ୍ତୁ ଯଦି ଆପଣ ଏହି ସମୟ ମଧ୍ୟରେ ସେହି ବ୍ୟକ୍ତିଙ୍କୁ ଜୀବନ୍ତ ଦେଖନ୍ତି, ତେବେ ଆପଣ କଣ ନିଜ ଆଖିକୁ ବିଶ୍ୱାସ କରିପାରିବେ? ଚାଇନାର ଏକ ପରିବାର ସହିତ ସମାନ ଘଟଣା ଘଟିଛି। ଏହି ପରିବାରର ଜଣେ ସଦସ୍ୟଙ୍କ ଅନ୍ତିମ ସଂସ୍କାର ହେବାର ୯ ବର୍ଷ ପରେ ସେ ଜୀବନ୍ତ ଫେରି ଆସିଛନ୍ତି।
ସୂଚନା ଅନୁଯାୟୀ, ଏହି ମାମଲା ୨୦୧୪ ବର୍ଷର। ସେତେବେଳେ ଝୁଓ କାଙ୍ଗଲୁଓ ନାମକ ଜଣେ ବ୍ୟକ୍ତି ଏକ ଭୟଙ୍କର କାର ଦୁର୍ଘଟଣାର ଶିକାର ହୋଇଥିଲେ। ପରିବାରର ସଦସ୍ୟ ନିଜେ ଏହି ଦୁର୍ଘଟଣାର ଶିକାର ହୋଇଥିବା ବ୍ୟକ୍ତିଙ୍କ ମୃତଦେହ ଚିହ୍ନଟ କରିଥିଲେ। ତେବେ ସେମାନେ କୌଣସି ପରୀକ୍ଷଣ ନକରି ଝୁଓ ମୃତ ବୋଲି ମାନି ନେଇଥିଲେ ଏବଂ ତାଙ୍କ ଅନ୍ତିମ ସଂସ୍କାର କରିବାକୁ ନିଷ୍ପତ୍ତି ନେଇଥିଲେ।
କାର ଦୁର୍ଘଟଣା ପରେ ଲୋକମାନେ ଝୁଓ ଆଉ ଫେରିବେ ବୋଲି ଆଶା କରୁନଥିଲେ। ତେବେ, ତାଙ୍କ ମୃତ୍ୟୁର ୯ ବର୍ଷ ପରେ, ଝୁଓଙ୍କ ପରି ଦେଖାଯାଉଥିବା ଜଣେ ବ୍ୟକ୍ତି ଏକ ଗାଁରେ ଲୋକଙ୍କ ନଜରକୁ ଆସିଥିଲେ। ତାଙ୍କର କାର୍ଯ୍ୟକଳାପ ଟିକେ ଅଜବ ଥିଲା। ଯେତେବେଳେ ଏହି ସମସ୍ତ କଥା ଚୋଙ୍ଗକିଙ୍ଗର ଅଧିକାରୀଙ୍କ ନିକଟରେ ପହଞ୍ଚିଲା, ବ୍ୟକ୍ତି ଜଣକ ନିଜ ବିଷୟରେ ସମସ୍ତ କଥା କହିଥିଲେ। ସବୁକିଛି ଜାଣିବା ପରେ ଅଧିକାରୀମାନେ ତାଙ୍କ ପରିବାର ସଦସ୍ୟଙ୍କ ସହ ଯୋଗାଯୋଗ କଲେ। ପରିବାର ସଦସ୍ୟ କିନ୍ତୁ ବିଶ୍ୱାସ କରିପାରିଲେ ନାହିଁ।
ସେହି ବ୍ୟକ୍ତିଙ୍କ DNA ଟେଷ୍ଟ କରାଯିବାରୁ ସ୍ପଷ୍ଟ ହେଲା ଯେ ବ୍ୟକ୍ତି ଜଣକ ଝୁଓଙ୍କ ଡୁପ୍ଲିକେଟ୍ ନୁହଁନ୍ତି ବରଂ ନିଜେ ଝୁଓ। ଯାହାଙ୍କ ମୃତ୍ୟୁ ପୂର୍ବରୁ ଘୋଷଣା କରାଯାଇଥିଲା। ବାସ୍ତବରେ, ଦୁର୍ଘଟଣା ପରେ ପରିବାର ଦ୍ୱାରା ଚିହ୍ନିତ ହୋଇଥିବା ଶବଟି ଅନ୍ୟ ଜଣଙ୍କର ଥିଲା। ବର୍ତ୍ତମାନ ଜୁଓଙ୍କ ବଦଳରେ ଯେଉଁ ବ୍ୟକ୍ତିଙ୍କର ଶେଷ ରୀତିନୀତି କରାଯାଇଥିଲା, ତାଙ୍କୁ ଚିହ୍ନଟ କରାଯାଉଛି।
