- ମଣିପୁର ହିଂସା ଷଡ଼ଯନ୍ତ୍ରର ଯାଞ୍ଚ କରିବାକୁ ସିବିଆଇ ପ୍ରସ୍ତୁତ
- ଶୁକ୍ରବାର ସୁରକ୍ଷାକର୍ମୀଙ୍କ ବେଶରେ ଆସି ତିନିଜଣଙ୍କୁ ହତ୍ୟା କଲେ ହିଂସାକାରୀ
- କୁକି ଓ ମୈତେଇ ସମ୍ପ୍ରଦାୟ ମଧ୍ୟରେ ସମନ୍ବୟ ରକ୍ଷା କରିବାକୁ ଶାହଙ୍କ ପରାମର୍ଶ
ନୂଆଦିଲ୍ଲୀ,୦୯/୦୬: ମଣିପୁରରେ ହିଂସା ବନ୍ଦ ହେବାର ନାମ ନେଉନାହିଁ। ସେପଟେ ଶୁକ୍ରବାର ମଧ୍ୟ ସୁରକ୍ଷାକର୍ମୀଙ୍କ ବେଶରେ ଆସି ହିଂସାକାରୀମାନେ ୩ ଜଣଙ୍କୁ ଗୁଳି କରି ହତ୍ୟା କରିଛନ୍ତି। ମୃତକଙ୍କ ବ୍ୟତିତ ୨ ଜଣ ଆହତ ହୋଇଥିବା କୁହାଯାଉଛି। ତେବେ ଏହାରି ଭିତରେ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ୬ ଟି ଏଫ୍ଆଇଆର୍ ପଞ୍ଜୀକୃତ କରିଛି ଏବଂ ରାଜ୍ୟରେ ହୋଇଥିବା ହିଂସା ପଛରେ ହୋଇଥିବା ଷଡଯନ୍ତ୍ରର ଯାଞ୍ଚ ପାଇଁ ଏକ SIT ଗଠନ କରିଛି। ହିଂସା ମୁଖ୍ୟତଃ କୁକି ଏବଂ ମୈତେଇ ସମ୍ପ୍ରଦାୟ ମଧ୍ୟରେ ହୋଇଥିବା କୁହାଯାଇଛି। ଏହି ହିଂସାରେ ଏପର୍ଯ୍ୟନ୍ତ ୧୦୦ ଜଣଙ୍କର ମୃତ୍ୟୁ ହୋଇଥିବାବେଳେ ୩୫,୦୦୦ ରୁ ଅଧିକ ଲୋକ ବିସ୍ଥାପିତ ହୋଇଛନ୍ତି।
ସିବିଆଇ ତଦନ୍ତ ପାଇଁ ମଣିପୁର ସରକାରଙ୍କ ପକ୍ଷରୁ ସମସ୍ତ ୬ଟି ମାମଲା ଚୟନ କରାଯାଇଛି। ଏଥିରେ ଜାତି ହିଂସା ପୂର୍ବରୁ ଯୋଜନା କରାଯାଇଥିଲା କି ନାହିଁ ଜାଣିବାକୁ ଯାଞ୍ଚ କରାଯିବ। ରାଜ୍ୟରେ ହିଂସା ଆରମ୍ଭ ହେବା ପରେ ୩,୭୦୦ ରୁ ଅଧିକ ଏଫ୍ଆଇଆର୍ ପଞ୍ଜିକୃତ ହୋଇଛି। ଇମ୍ଫାଲ ପଶ୍ଚିମ ଜିଲ୍ଲାରେ ସର୍ବାଧିକ ସଂଖ୍ୟକ ମାମଲା ରୁଜୁ ହୋଇଥିଲା। ଏହା ପରେ କାଙ୍ଗପୋକପି ଏବଂ ବିଷ୍ଣୁପୁରରେ ମାମଲା ରୁଜୁ ହୋଇଛି।
ପଢ଼ନ୍ତୁ: ପ୍ରଧାନମନ୍ତ୍ରୀ ମୋଦୀଙ୍କୁ ଡିଗ୍ରୀ ମାଗିବାରୁ ଲାଗିଥିଲା ୨୫୦୦୦ ଜରିମାନା; ଏବେ କୋର୍ଟରେ ନୂଆ ଆବେଦନ କଲେ କେଜରିଓ୍ବାଲ
ସେପଟେ କେନ୍ଦ୍ର ଗୃହମନ୍ତ୍ରୀ ଅମିିତ ଶାହ ନାଗା ବିଧାୟକଙ୍କ ସହିତ ଏକ ବୈଠକ କରିଥିଲେ। ଏହି ବୈଠକରେ ତାଙ୍କୁ କୁକି ଏବଂ ମୈତେଇ ସମ୍ପ୍ରଦାୟ ମଧ୍ୟରେ ଏକ ମଧ୍ୟସ୍ତତା ଭାବରେ କାର୍ଯ୍ୟ କରିବାକୁ ତଥା ରାଜ୍ୟରେ ଶାନ୍ତି ଫେରାଇ ଆଣିବାକୁ ନିବେଦନ କରାଯାଇଥିଲା। କୁକି ବିଧାୟକମାନେ ପୃଥକ ପ୍ରଶାସନ ଦାବି କରୁଥିବା ବେଳେ ନାଗା ବିଧାୟକମାନେ ସେମାନଙ୍କ ଚାହିଦାଠାରୁ ଦୂରରେ ରହିଛନ୍ତି। ଯେଉଁ ୬ଟି ପାହାଡ଼ି ଜିଲ୍ଲାରେ କର୍ଫ୍ୟୁ ଲାଗୁ କରାଯାଇ ନାହିଁ ସେହି ଇଲାକା ବିଶେଷତଃ ନାଗାବହୁଳ ଅଞ୍ଚଳ ଅଟେ।
ଏହାପୂର୍ବରୁ ମଣିପୁର ସରକାରଙ୍କ ସୁରକ୍ଷା ପରାମର୍ଶଦାତା କୁଲଦୀପ ସିଂ ଦର୍ଶାଇଥିଲେ ଯେ, ମଣିପୁରର ସ୍ଥିତି ଶାନ୍ତିପୂର୍ଣ୍ଣ ଓ ନିୟନ୍ତ୍ରଣ ଆଡ଼କୁ ଗତି କରୁଛି। ସେ ଦାବି କରିଛନ୍ତି ଯେ ଗତ ୪୮ ଘଣ୍ଟା ମଧ୍ୟରେ କୌଣସି ହିଂସା ଖବର ସାମ୍ନାକୁ ଆସିନାହିଁ। ତେବେ ଶୁକ୍ରବାର ଦିନ ପୁଣି ଥରେ ହିଂସା ଆରମ୍ଭ ହୋଇଥିଲା ଯେଉଁଥିରେ ତିନି ଜଣ ପ୍ରାଣ ହରାଇଥିଲେ। କୁଲଦୀପ ସିଂ ଏହା ମଧ୍ୟ ଘୋଷଣା କରିଛନ୍ତି ଯେ ମଣିପୁରରେ ବିସ୍ଥାପିତ ଲୋକଙ୍କୁ ସହାୟତା କରିବା ପାଇଁ ଗୃହ ମନ୍ତ୍ରଣାଳୟ ୧୦୧.୭୫ କୋଟି ଟଙ୍କା ରିଲିଫ ପ୍ୟାକେଜ ଅନୁମୋଦନ କରିଛି। ହିଂସା ଆରମ୍ଭରୁ ରାଜ୍ୟର ପୋଲିସ ଅସ୍ତ୍ରଶସ୍ତ୍ର କ୍ୟାମ୍ପରୁ ୪୦୦୦ ରୁ ଅଧିକ ଅସ୍ତ୍ରଶସ୍ତ୍ର ଲୁଟ୍ ହୋଇଥିଲା। ତେବେ ସୁରକ୍ଷା ବାହିନୀ ଏପର୍ଯ୍ୟନ୍ତ ମୋଟ ୮୯୬ ଟି ଅସ୍ତ୍ର ଉଦ୍ଧାର କରିଛନ୍ତି। ଏହା ବ୍ୟତୀତ ସେମାନେ ୧୧୭୬୩ଟି ଗୁଳି ଏବଂ ୨୦୦ ପ୍ରକାର ବମ୍ ଉଦ୍ଧାର କରିଛନ୍ତି।
You can also read: ନିଶାସକ୍ତ ଅବସ୍ତାରେ ମହିଳା କୁସ୍ତିଯୋଦ୍ଧାଙ୍କ ସହିତ ଅସଦାଚରଣ କରିଥିଲେ ବ୍ରିଜଭୂଷଣ! ଦାବି ରଖିଲେ ଅନ୍ତରାଷ୍ଟ୍ରୀୟ ରେଫରୀ
