ମଣିପୁର ହିଂସା: ପୂର୍ବତନ ବିଜେପି ବିଧାୟକ ଗିରଫ, ହିଂସାକାଣ୍ଡ ଘଟାଇବାକୁ କରୁଥିଲେ ଯୋଜନା
ଇମ୍ଫାଲ ୨୫/ ୦୫: ମଣିପୁରକୁ ପୁଣି ଫେରିଛି ହିଂସାକାଣ୍ଡ । ଦୁଇ ସମ୍ପ୍ରଦାୟ ମୈତେଇ ଓ କୁକୀ ମଧ୍ୟରେ ଲାଗି ରହିଥିବା ବିବାଦ କିଛି ଦିନ ଶିଥିଳତା ପରେ ପୁଣି ତୀବ୍ର ହୋଇଛି । ରାଜ୍ୟ ସରକାର ଓ ସେନା ମିଳିତ ଭାବେ ହିଂସାକାଣ୍ଡ ରୋକିବା ପାଇଁ ପ୍ରୟାସରତ । କିନ୍ତୁ ବ୍ୟତିକ୍ରମ ହେଉଛି କିଛି ନେତା ମଧ୍ୟ ଜନତାଙ୍କୁ ଉସକାଇବାରେ ବ୍ୟସ୍ତ । ଗୋଟିଏ ପଟେ ହିଂସାକାଣ୍ଡ କିଭଳି ଥମିବ ସେ ନେଇ ସମସ୍ତଙ୍କ ଚିନ୍ତା ବଢିଥିବା ବେଳେ ପୂର୍ବତନ ବିଜେପି ବିଧାୟକ ଦଙ୍ଗା ଉସକାଇବା ଅଭିଯୋଗରେ ଗିରଫ ହୋଇଛନ୍ତି । ହେଙ୍ଗଲେପ୍ର ପୂର୍ବତନ ବିଜେପି ବିଧାୟକ ତେଲଭମ୍ ଥାଙ୍ଗଜାଲାଙ୍ଗ ହାଓକିପ୍ ମଣିପୁର ବିଧାନସଭାର ଉପ-ବାଚସ୍ପତି ଭାବେ ମଧ୍ୟ କାର୍ଯ୍ୟଭାର ତୁଲାଇଥିଲେ । ତାଙ୍କ ସମେତ ୨ ଜଣ ଅଙ୍ଗରକ୍ଷୀଙ୍କୁ ମଧ୍ୟ ପୋଲିସ ଗତ ମେ ୨୨ ତାରିଖରେ ଗିରଫ କରିଥିଲା । ହେଙ୍ଗଲେପ୍ ଅଞ୍ଚଳ ମଣିପୁର ଦଙ୍ଗାରେ ସର୍ବାଧିକ ପ୍ରଭାବିତ ହୋଇଥିଲା ।
ମୁଖ୍ୟମନ୍ତ୍ରୀ ଏନ୍ ବିରେନ ସିଂହ କହିଛନ୍ତି, ‘ପୂର୍ବତନ ବିଧାୟକ ତେଲଭମ୍ ଥାଙ୍ଗଜାଲାଙ୍ଗ ହାଓକିପ୍ ହିଂସାକାଣ୍ଡ ଘଟାଇବା ପାଇଁ ଷଡଯନ୍ତ୍ର ରଚିଥିଲେ । ସେ ଏଭଳି ସ୍ଥାନରେ ପୁଣି ଦଙ୍ଗା କରିଥାନ୍ତେ ଯେଉଁଠି କି ପୂର୍ବରୁ ୭୧ ଜଣଙ୍କ ଜୀବନ ଯାଇ ସାରିଛି ଓ ପ୍ରାୟ ୩୫ ହଜାର ଲୋକଙ୍କୁ ସ୍ଥାନାନ୍ତରଣ କରାଯାଇଛି।’
୧୯୯୮ ମସିହାରେ ହେଙ୍ଗଲେପ୍ ଆସନରୁ କଂଗ୍ରେସ ଟିକେଟରୁ ନିର୍ବାଚନ ଲଢି ବିଜୟୀ ହେବା ପରେ ମଣିପୁର ବିଧାନସଭାର ଉପ-ବାଚସ୍ପତି ହୋଇଥିଲେ ତେଲଭମ୍ ଥାଙ୍ଗଜାଲାଙ୍ଗ ହାଓକିପ୍ । ପୁଣି ୨୦୧୭ରେ ବିଜେପି ଟିକେଟରୁ ସେଠାରୁ ଲଢି ବିଜୟୀ ହୋଇଥିଲେ । ପ୍ରତିପକ୍ଷ କଂଗ୍ରେସ ପ୍ରାର୍ଥୀଙ୍କୁ ମାତ୍ର ୨୬୮ ଭୋଟରେ ହରାଇଥିଲେ । ସେହି ବର୍ଷ ସେ ହିଲ୍ସ ଏରିୟା କମିଟି (HAC)ର ଚେୟାରମ୍ୟାନ୍ ହୋଇଥିଲେ । ଯାହା କି ମଣିପୁରର ଶୀର୍ଷ ସଂସ୍ଥା । ରାଜ୍ୟରେ ଯେତେ ବି ଯୋଜନା, କାର୍ଯ୍ୟକାରିତା ଏବଂ ତଦାରଖ କାର୍ଯ୍ୟ ଏହି କମିଟି ହିଁ କରିଥାଏ । ୨୦୨୦ରେ ସେ ଚେୟାରମ୍ୟାନ୍ ପଦବୀରୁ ଇସ୍ତଫା ଦେଇଥିଲେ । ମୁଖ୍ୟମନ୍ତ୍ରୀ ଏନ୍ ବିରେନ ସିଂହଙ୍କ ସହ ବିବାଦ କାରଣରୁ ତାଙ୍କୁ ଇସ୍ତଫା ଦେବାକୁ ପଡିଥିଲା । ୨୦୨୨ରେ ସେ ଶିବ ସେନାରୁ ଟିକେଟ୍ ପାଇଁ ନିର୍ବାଚନ ଲଢିଥିଲେ ସୁଦ୍ଧା ମାତ୍ର ୨୬୦୫ ଖଣ୍ଡ ଭୋଟ ପାଇ ତୃତୀୟ ସ୍ଥାନରେ ରହିଥିଲେ ।
