ଭୁବନେଶ୍ୱର ୧୭/୨: ବିଜେଡି ଓ ବିଜେପି ବିରୋଧରେ ରାଜ୍ୟରେ ହେବ ମହାମେଣ୍ଟ । ସିପିଆଇ, ସିପିଏମ୍, ଜେଏମଏମ ଓ କଂଗ୍ରେସକୁ ନେଇ ମହାମେଣ୍ଟ ହେବ ବୋଲି କହିଛନ୍ତି ସିପିଆଇର କେନ୍ଦ୍ରୀୟ ସମ୍ପାଦକ ଡି.ରାଜା ।
ଆସନ୍ତା ନିର୍ବାଚନ ପାଇଁ ପ୍ରସ୍ତୁତି ଆରମ୍ବ କରିସାରିଲେଣି ସମସ୍ତ ରାଜନୈତିକ ଦଳ । ରାଜ୍ଯ ରାଜନୀତି ଏବେ ସରଗରମ । ବହୁ ପୂର୍ବରୁ ମହାମେଣ୍ଟ ନେଇ କଳ୍ପନା ଜଳ୍ପନା ଚାଲିଥିଲା । ତେବେ ଏନେଇ ମୁହଁ ଖୋଲିଛନ୍ତି ସିପିଆଇର କେନ୍ଦ୍ରୀୟ ସମ୍ପାଦକ ଡି.ରାଜା । ଡି. ରାଜା ଆସନ୍ତା ନିର୍ବାଚନରେ ମହାମେଣ୍ଟ ନେଇ ସୂଚନା ଦେଇଛନ୍ତି । ସେ କହିଛନ୍ତି ଯେ ବିଜେଡି ଓ ବିଜେପି ବିରୋଧରେ ମହାମେଣ୍ଟ ଗଠନ ହେବ । ସିପିଆଇ, ସିପିଏମ୍, ଜେଏମଏମ ଓ କଂଗ୍ରେସକୁ ନେଇ ଏହି ମହାମେଣ୍ଟ ଗଠନ କରାଯିବ । ଆଜି ଭୁବନେଶ୍ୱରରେ ଏକ ଦଳୀୟ କାର୍ଯ୍ଯକ୍ରମରେ ଯୋଗଦେଇ ଡି.ରାଜା ଏହି ସୂଚନା ଦେଇଛନ୍ତି । ଏ ସମ୍ପର୍କରେ ଓଡିଶା ପ୍ରଦେଶ କଂଗ୍ରେସର ସଭାପତି ନିରଞ୍ଜନ ପଟ୍ଟନାୟକଙ୍କ ସହ ତାଙ୍କର ଆଲୋଚନା ହୋଇଥିବା ମଧ୍ୟ ସେ ସୂଚନା ଦେଇଛନ୍ତି । ବାମପନ୍ଥି ଦଳ ଏବଂ ଅନ୍ୟାନ୍ୟ ଦଳ ସହ ରାଜ୍ୟ ସ୍ତରରେ ମେଣ୍ଟ କରିବା ପାଇଁ ଏଆଇସିସିର ଅଧ୍ୟକ୍ଷ ରାହୁଲ ଗାନ୍ଧୀ ମଧ୍ୟ ରାଜ୍ୟକୁ ସବୁଜ ସଂକେତ ପ୍ରଦାନ କରିସାରିଛନ୍ତି । କେନ୍ଦ୍ରରେ ହେଉଥିବା ମହାମେଣ୍ଟ ଢାଞ୍ଚାର ଓଡିଶାରେ ମଧ୍ୟ ମହାମେଣ୍ଟ କରିବା ଯୋଜନାରେ କଂଗ୍ରେସ ରହିଛି । ତେବେ ଆସନ ବୁଝାବଣା ନେଇ ବିବାଦ ସୃଷ୍ଟି ହେବାର ଆଶଂକାକୁ ଏଡାଇ ଦିଆଯାଇନପାରେ ।
୨୦୧୪ରେ ବି ହୋଇଥିଲା ମହାମେଣ୍ଟ ଚର୍ଚ୍ଚା
ଓଡ଼ିଶା ରାଜନୀତି ଇତିହାସରେ ମହାମେଣ୍ଟର ପରିକଳ୍ପନା କିଛି ନୂଆ କଥା ନୁହେଁ । ୨୦୧୪ ନିର୍ବାଚନ ପୂର୍ବରୁ ମଧ୍ୟ ବିଜେଡି ବିରୋଧରେ ମହାମେଣ୍ଟ ଗଠନ ନେଇ ଚର୍ଚ୍ଚା ହୋଇଥିଲା । ଏନେଇ ଦୁଇରୁ ଅଧିକ ଥର ବୈଠକ ମଧ୍ୟ ହୋଇଥିଲା । ହେଲେ ମହାମେଣ୍ଟ ଗଠନ ସମ୍ଭବ ହୋଇ ନଥିଲା।
ନବୀନଙ୍କୁ ଗାଦିରୁ ହଟାଇବା ପାଇଁ ୨୦୧୪ରେ ଯେଉଁ ଯୋଜନା ହୋଇଥିଲା ତାହା ଫଳପ୍ରଦ ହୋଇ ନଥିଲା । ନବୀନ ପୁଣି ୧୧୭ ଆସନରେ ବିଜୟ ବାନା ଉଡ଼ାଇଥିଲେ । ୨୦୧୯ ନିର୍ବାଚନ ପୂର୍ବରୁ ମଧ୍ୟ ପୁଣି ମହାମେଣ୍ଟ ପ୍ରସଙ୍ଗ ଉଠିଛି । ଏଥର ଶାସକଦଳ ବିଜେଡି ସହ ବିଜେପି ବିରୋଧରେ ମଧ୍ଯ ମେଣ୍ଟ ଗଠନ ହେବା ଆଲୋଚନା ହେଉଛି । ତେବେ ଦେଖାଯାଉ ଏହା କେତେଦୂର ଫଳପ୍ରଦ ହେଉଛି ।