UPSC ଫଳାଫଳ: ଶୀର୍ଷ ୫ ମଧ୍ୟରେ ଏକମାତ୍ର ପୁଅ ମୟୂର ହଜାରିକା, ଜାଣନ୍ତୁ ଆସାମର ଏହି ଚର୍ଚ୍ଚିତ ଡାକ୍ତରଙ୍କ ବିଷୟରେ…
ନୂଆଦିଲ୍ଲୀ ୨୩/ ୦୫: ପ୍ରଶାସନିକ ସେବା ପରୀକ୍ଷା ଫଳରେ ଚଳିତ ଥର ଦେଖିବାକୁ ମିଳିଛି ଝିଅଙ୍କ ଦବଦବା । ମଙ୍ଗଳବାର ୨୦୨୨ର ପ୍ରଶାସନିକ ସେବା ପରୀକ୍ଷା ଫଳ ପ୍ରକାଶିତ ହୋଇଥିବା ବେଳେ ଶୀର୍ଷ ୫ ଜଣଙ୍କ ମଧ୍ୟରେ ରହିଛନ୍ତି ୪ ଜଣ ଝିଅ । ଇଶିତା କିଶୋର ଆଇଏଏସ୍ ଟପ୍ପର ହୋଇଥିବା ବେଳେ ଆସାମର ମୟୂର ହଜାରିକା ଶୀର୍ଷ ୫ ଜଣଙ୍କ ମଧ୍ୟରେ ଏକ ମାତ୍ର ପୁଅ ରହିଛନ୍ତି ।
ଇଶିତା କିଶୋର ୟୁପିଏସ୍ସି ପ୍ରଶାସନିକ ସେବା ପରୀକ୍ଷାରେ ଟପ୍ପର ହୋଇଥିବା ବେଳେ ଗରିମା ଲୋହିଆ ୨ୟ, ଉମା ହାରାତୀ ୩ୟ ସ୍ଥାନ ଅଧିକାର କରିଛନ୍ତି । ସେହିଭଳି ମୟୂର ହଜାରିକା ୫ମ ସ୍ଥାନ ଅଧିକାର କରିଛନ୍ତି । ମୋଟ ୯୩୩ ଜଣ ପ୍ରଶାସନିକ ସେବା ପରୀକ୍ଷାରେ ଯୋଗ୍ୟତା ଅର୍ଜନ କରିଛନ୍ତି ।
ମୟୂର ହଜାରିକା ରାଙ୍କିଂରେ ୫ମ ସ୍ଥାନରେ ରହିଥିବା ଆସାମ ମୁଖ୍ୟମନ୍ତ୍ରୀ ହେମନ୍ତ ବିଶ୍ବ ଶର୍ମା ଟ୍ବିଟ୍ କରି ଶୁଭେଚ୍ଛା ଜଣାଇଛନ୍ତି । ଟ୍ବିଟ୍ କରି ବିଶ୍ବ ଶର୍ମା କହିଛନ୍ତି, ‘ସର୍ବ ଭାରତୀୟ ସ୍ତରରେ ୫ମ ସ୍ଥାନ ଅଧିକାର କରି ଆପଣ ଆମକୁ ଗର୍ବିତ କରିଛନ୍ତି । ଆପଣଙ୍କ ସଫଳତା ଯୁବ ପିଢିଙ୍କୁ ଆଗକୁ ବଢିବାରେ ସହାୟକ ହେବ । ଅନେକ ଅନେକ ଶୁଭେଚ୍ଛା’।
Heartiest congratulations Mayur Hazarika for your outstanding performance in the 2022 #UPSC Civil Services exam results.
— Himanta Biswa Sarma (@himantabiswa) May 23, 2023
By securing 5th All India Rank you have made us all so very proud. Your achievement is sterling and will inspire our youth to aspire for the best.
Well…
ପେଶାରେ ଡାକ୍ତର ଭାବେ ଆସାମର ଜାତୀୟ ସ୍ବାସ୍ଥ୍ୟ ମିଶନରେ କାର୍ଯ୍ୟରତ ମୟୂର ହଜାରିକା ଜଣେ ମେଧାବୀ ଛାତ୍ର ଥିଲେ । ହାଇସ୍କଲ ସାର୍ଟିଫିକେଟ୍ ପରୀକ୍ଷାରେ ରାଙ୍କ ହୋଲ୍ଡର ଥିଲେ ମୟୂର । ଗୌହାଟୀ ମେଡିକାଲ କଲେଜରେ ଏମବିବିଏସ୍ ପାସ୍ କରିବା ପରେ ଡାକ୍ତର ଭାବେ କାର୍ଯ୍ୟରତ ଥିଲେ । ୟୁପିଏସସି ପରୀକ୍ଷାରେ ସର୍ବଭାରତୀୟ ସ୍ତରରେ ୫ମ ସ୍ଥାନ ଅଧିକାର କରିଥିବା ମୟୂର ହଜାରିକା କହିଛନ୍ତି, ‘ସର୍ବଭାରତୀୟ ସ୍ତରରେ ୫ମ ସ୍ଥାନ ଅଧିକାର କରିବି ବୋଲି କେବେ ଭାବି ନଥିଲି । ମୁଁ ଫଳାଫଳକୁ ନେଇ ସମ୍ପୂର୍ଣ୍ଣ ଭାବେ ସନ୍ତୁଷ୍ଟ ଅଛି । ଭାରତୀୟ ବୈଦେଶିକ ସେବାରେ କାର୍ଯ୍ୟ କରିବାକୁ ପ୍ରଥମ ପସନ୍ଦ ଭାବେ ନେବି’।
ସୂଚନା ଯେ, ପ୍ରଶାସନିକ ସେବା ପରୀକ୍ଷା ବାର୍ଷିକ ୩ଟି ପର୍ଯ୍ୟାୟରେ ଅନୁଷ୍ଠିତ ହୋଇଥାଏ । ୟୁପିଏସ୍ସି ପକ୍ଷରୁ ପ୍ରଥମେ ପ୍ରିଲିମିନାରୀ, ମେନ୍ ଓ ଇଣ୍ଟରଭ୍ୟୁ ଭଳି ମୋଟ ୩ଟି ପର୍ଯ୍ୟାୟରେ କରାଯାଇଥାଏ । ଭାରତୀୟ ପ୍ରଶାସନିକ ସେବା (IAS), ଭାରତୀୟ ବୈଦେଶିକ ସେବା (IFS), ଭାରତୀୟ ପୋଲିସ ସେବା (IPS) ଏବଂ ଅନ୍ୟାନ୍ୟ ପଦବୀ ପାଇଁ ଚୟନ କରାଯାଇଥାଏ ।
