ଆଜି ବିଶ୍ୱବ୍ୟାପୀ ପାଳନ ହେଉଛି ଋତୁସ୍ରାବ ସ୍ୱଚ୍ଛତା ଦିବସ । ମାସିକ ଧର୍ମକୁ ନେଇ ନୀରବତା ଭାଙ୍ଗିବା, ମାସିକ ଋତୁସ୍ରାବ ଦୂରବସ୍ଥାର ଅନ୍ତ ଏବଂ ଋତୁସ୍ରାବ ସ୍ୱାସ୍ଥ୍ୟକୁ ଏକ ମୌଳିକ ମାନବାଧିକାର ଭାବରେ ସ୍ୱୀକୃତି ପ୍ରଦାନ କରିବା ପାଇଁ ଆଜି ଦିବସ ଏକ ଉତ୍ସର୍ଗୀକୃତ ଅଭିଯାନ ଭାବେ ଗ୍ରହଣ କରାଯାଇଛି । ୨୦୨୬ ବର୍ଷର ବିଷୟବସ୍ତୁ ହେଉଛି ‘ଟୁଗେଦର୍ ଫର୍ ଏ ପିରିୟଡ୍ ଫ୍ରେଣ୍ଡଲି ୱାର୍ଲଡ୍’ ।
ଭୁବନେଶ୍ୱର,୨୮/୦୫ (ପ୍ରଜ୍ଞା ଚୌଧୁରୀ):‘ସ୍ୱଚ୍ଛ ନିରାପଦ ଋତୁସ୍ରାବ ଅଭ୍ୟାସ’ ରାଜ୍ୟରେ ଆଜି ବି ଏକ ଆହ୍ୱାନ । ଏକ ଶାରୀରିକ ଧର୍ମକୁ ନେଇ ଖୋଲାଖୋଲି ଆଲୋଚନା କରିବାକୁ ଲୋକେ ସଂକୋଚ କରୁଛନ୍ତି । ସହରାଞ୍ଚଳରେ ମାନସିକତାରେ ଧୀରେ ଧୀରେ ପରିବର୍ତ୍ତନ ଦେଖାଦେଉଥିବା ବେଳେ ଗ୍ରାମାଞ୍ଚଳରେ ଋତୁସ୍ରାବ ସହ ଜଡ଼ିତ ଅଜ୍ଞାନତା ରହିଛି । ଗାଁ ଗହଳିରେ ମାସିକ ଧର୍ମ ବେଳେ ଆଜି ବି କପଡ଼ା କିମ୍ବା ସରକାରୀ ବ୍ୟବସ୍ଥାରେ ମିଳୁଥିବା ସାନିଟାରୀ ନାପକିନ୍ ବ୍ୟବହାର କରୁଛନ୍ତି । ପରିବେଶ ଉପଯୋଗୀ ସାନିଟାରୀ ବିକଳ୍ପ ଯଥା- ମେନ୍ଷ୍ଟ୍ରୁଆଲ୍ କପ୍, ଟାମ୍ପୁନ୍ ଏବଂ ଡିସକ୍ ବିଷୟରେ ରାଜ୍ୟର ଅଧିକାଂଶ ମହିଳା ଜାଣିନାହାନ୍ତି । ଋତୁସ୍ରାବ ସ୍ୱଚ୍ଛତାକୁ ନେଇ କରାଯାଇଥିବା ବିଭିନ୍ନ ସର୍ଭେରୁ ଏହା ଜଣାପଡ଼ିଛି ।
ବିଏମସି ୱିମେନ୍ସ ହେଲ୍ଥ୍ରେ ପ୍ରକାଶିତ ତଥ୍ୟ ଅନୁଯାୟୀ, ଗ୍ରାମାଞ୍ଚଳରେ ୩୧.୬% ମହିଳା ଋତୁସ୍ରାବ ବେଳେ କପଡ଼ା ବ୍ୟବହାର କରନ୍ତି । ୬୧% ମହିଳା ସ୍ୟାନିଟାରି ପ୍ୟାଡ୍ ଓ ୭.୨ ଧ ମହିଳା ଉଭୟ କପଡ଼ା ଏବଂ ସାନିଟାରୀ ପ୍ୟାଡ୍ ବ୍ୟବହାର କରୁଥିବା ଜଣାପଡ଼ିଛି । ୪୬% ମହିଳା ମାସିକ ଋତୁ ଆରମ୍ଭ ହେବା ପୂର୍ବରୁ ସେ ବିଷୟରେ ଅବଗତ ନ ଥିଲେ ବୋଲି ସର୍ଭେରେ କୁହାଯାଇଛି । ୧୦ରୁ ୪୯ ବର୍ଷ ବୟସର ୯୨୧ ମହିଳାଙ୍କୁ ନେଇ କରାଯାଇଥିବା ଏହି ସାମ୍ପୁଲ ସର୍ଭେରେ ଏହା ଜଣାପଡ଼ିଛି ।
ଋତୁସ୍ରାବକାଳୀନ ସ୍ୱଚ୍ଛତା ପରିଚାଳନା ପ୍ରଜନନ ସ୍ୱାସ୍ଥ୍ୟକୁ ସୁସ୍ଥ ରଖିବା ଦିଗରେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଟେ । ତେବେ ଗ୍ରାମାଞ୍ଚଳରେ ମହିଳା ଯୁବତୀ ଓ ଛାତ୍ରୀଙ୍କ ମଧ୍ୟରେ ଋତୁସ୍ରାବ ସ୍ୱଚ୍ଛତାକୁ ନେଇ ଏବେବି ସଚେତନତାର ଅଭାବ ରହିଛି ବୋଲି ହେଲ୍ଥ୍ ଡେମୋଗ୍ରାଫିକ ଏନଭାର୍ନମେଣ୍ଟାଲ୍ ସିଷ୍ଟମ (ଏଚଡିଇଏସଏସ) ପକ୍ଷରୁ ହୋଇଥିବା ଆଉ ଏକ ଅନୁଧ୍ୟାନରୁ ଜଣାପଡ଼ିଛି ।
ଅଧିକ ପଢ଼ନ୍ତୁ :- Crime News: ଭଡ଼ା ଘରେ ଗୋଲ୍ଡି ଆତ୍ମହତ୍ୟା ମାମଲା: ଅଭିଯୁକ୍ତ ସ୍ୱାମୀ ଗିରଫ
୧୪ରୁ ୪୯ ବର୍ଷୀୟା ୬୨୨ ଜଣ ମହିଳା, ଯୁବତୀ, କିଶୋରୀଙ୍କୁ ନେଇ ହୋଇଥିବା ଏହି ସର୍ଭେରେ ୮୬.୯ ଧ ସାନିଟାରୀ ପ୍ୟାଡ୍ ବ୍ୟବହାର କରୁଥିବା ଜଣାପଡ଼ିଛି । କିନ୍ତୁ ୪୮.୭% କପଡ଼ା ବ୍ୟବହାରକାରୀ ଏନେଇ ଅଭିଜ୍ଞତା ଉତ୍କୃଷ୍ଟ ବୋଲି ମତ ଦେଇଥିଲେ । ତେବେ ସରକାରୀ ବ୍ୟବସ୍ଥାରେ ମିଳୁଥିବା ପ୍ୟାଡ୍ ବ୍ୟବହାର କରୁଥିବା ୨୯.୭% ସବୁଠାରୁ ଅଧିକ ଅସନ୍ତାଷ ବ୍ୟକ୍ତ କରିଥିଲେ । ସାନିଟାରୀ ପ୍ୟାଡ୍ ପୋଡ଼ିବା କିମ୍ବା ପୋତିବା ପରିବେଶ ପଇଁ କ୍ଷତିକାରକ । କିନ୍ତୁ ଏହି ସର୍ଭେରେ, ୪୦.୨% ମହିଳାଙ୍କର ସାନିଟାରୀ ସାମଗ୍ରୀକୁ ପୋତି ଦେବା ଏକ ସାଧାରଣ ଅଭ୍ୟାସ ।
ଅଧିକ ପଢ଼ନ୍ତ :- ଘରେ AC ନାହିଁ କି, ଜାଣନ୍ତୁ ଗରମରେ କେମିତି ଶୋଇବେ ଥଣ୍ଡାରେ ?
ପୁନଃବ୍ୟବହାର ଯୋଗ୍ୟ ପିରିୟଡ୍ ପ୍ୟାଣ୍ଟି, କପ୍, ଡିସ୍କ ଆଦିର ବ୍ୟବହାର ବିଷୟରେ ସହରାଞ୍ଚଳରେ ଧୀରେ ଧୀରେ ଲୋକେ ଅବଗତ ହେଲେଣି । ଏହା ସାନିଟାରୀ ପ୍ରଦୂଷଣ ରୋକିବା ଦିଗରେ ଏକ ବଡ଼ ଉତ୍ତରଦାୟିତ୍ୱ । କିନ୍ତୁ ଗ୍ରାମାଞ୍ଚଳରେ ଡିସପାଜେବଲ୍ ସାନିଟାରୀ ପ୍ୟାଡ୍ ଏବଂ କପଡ଼ା ହିଁ ସାଧାରଣତଃ ବ୍ୟବହାର ହୋଇଥାଏ । ତେବେ ସ୍ୱଚ୍ଛତାକୁ ପ୍ରାଧାନ୍ୟ ଦେଇ କପଡ଼ାକୁ ବ୍ୟବହାର କଲେ ବି ଏହା ଅନ୍ୟତମ ପରିବେଶ ଉପଯୋଗୀ ଋତୁସ୍ରାବ ବିକଳ୍ପ ହୋଇପାରିବ ବୋଲି ସ୍ୱାସ୍ଥ୍ୟ ବିଶେଷଜ୍ଞମାନେ ମତ ଦେଇଛନ୍ତି ।
