ତେଲେଙ୍ଗାନା,୨୭/୧୧: ମୃତ୍ୟୁ କେତେବେଳେ ଆସେ ତାହା କାହାକୁ ଜଣାନଥାଏ । ସାଙ୍ଗସାଥୀଙ୍କ ମେଳରେ ଖୁସି ଗପ କରି ଟିଫିନ୍ ବକ୍ସ ଖୋଲି ଖାଉଥିଲେ । ଆଉ ମୃତ୍ୟୁ ଡାକିନେଲା । ତେଲେଙ୍ଗାନା ସିକନ୍ଦରାବାଦରୁ କିଛି ଏପରି ଦୁଃଖଦଖବର ଆସିଛି । ଜଣେ ୧୧ ବର୍ଷୀୟ ବାଳକ ଟିଫିନରୁ ଏକାସଙ୍ଗରେ ତିନୋଟି ପୁରି ଖାଇବାରୁ ତାଙ୍କର ମୃତ୍ୟୁ ହୋଇଛି । ଏହି ଘଟଣା ସ୍କୁଲ ଓ ସାଙ୍ଗସାଥୀଙ୍କୁ ସ୍ତବ୍ଦ କରି ଦେଇଛି ।

ସିକନ୍ଦରାବାଦର ୧୧ ବର୍ଷୀୟ ବିରେନ ସବୁ ଦିନ ପରି ସ୍କୁଲ ଯାଇଥିଲେ । ମଧ୍ୟାହ୍ନ ଭୋଜନ ଛୁଟି ସମୟରେ ସାଙ୍ଗଙ୍କ ଗହଣରେ ଟିପିନ ଖାଇବାକୁ ବସିଥିଲେ । ମାଆ ଦେଇଥିବା ଟିଫିନବକ୍ସ ଖୋଲି ଥିଲେ । ସେଥିରେ ପୁରୀ ଥିଲା । ଏହାକୁ ଦେଖି ଖୁସି ହୋଇ ଯାଇଥିଲେ ବିରେନ୍ । ଆଉ ଏକାସଙ୍ଗରେ ୩ଟି ପୁରି ଖାଇ ଦେଇଥିଲେ ସେ । ଏହି ସମୟରେ ବିରେନଙ୍କ ତଣ୍ଟିରେ ପୁରି ଲାଗି ଯାଇଥିଲା । ସେହି ସ୍ଥାନରେ ହିଁ ସେ ଟଳି ପଡିଥିଲେ ।

ତୁରନ୍ତ ବିରେନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ପ୍ରାଥମିକ ଚିକିତ୍ସା ପରେ ସିକନ୍ଦରାବାଦର ଏକ ବଡ ଘରୋଇ ଡାକ୍ତରଖାନାରୁ ରେଫର କରିଥିଲେ । ମାତ୍ର ସେଠାରେ ବିରେନ ପହଞ୍ଚିବା ବେଳକୁ ଆଖି ବୁଜି ସାରିଥିଲେ । ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହା ପରେ ବିରେନଙ୍କ ପରିବାରକୁ ସ୍କୁଲ ତରଫରୁ ଖବର ଦିଆଯାଇଥିଲା । ଏ ଘଟଣାରେ ବିରେନଙ୍କ ପରିବାର ମର୍ମାହତ ହୋଇଛନ୍ତି ।

ପୁରି ଖାଇବା ସମୟରେ ତଣ୍ଟିରେ ଲାଗିବାରୁ ଏପରି ହୋଇଥିବା ବିରେନଙ୍କ ବାପାଙ୍କୁ ସ୍କୁର କର୍ତ୍ତୃପକ୍ଷ କହିଥିଲେ । ମାତ୍ର ଏହାକୁ ଅସ୍ବୀକାର କରିଥିଲେ ବିରେନଙ୍କ ବାପା । ପ୍ରକୃତ ସତ ଜାଣିବାକୁ ଥାନାରେ ଏତଲା କରିଛନ୍ତି । ପୋଲିସ ଘଟଣାର ତଦନ୍ତ ଆରମ୍ଭ କରିଛି ।