ଧୋନି ଏବେବି ବିଶ୍ୱର ଶ୍ରେଷ୍ଠ ମ୍ୟାଚ୍ ବିଜେତା: ଚାପେଲ
ମେଲ୍ବୋର୍ଣ୍ଣ, ୨୦ା୧(ଏଜେନ୍ସି): ସଦ୍ୟ ସମାପ୍ତ ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜ୍ରେ ଭାରତ ୨-୧ରେ ବିଜୟ ହାସଲ କରିଥିଲା । ମହେନ୍ଦ୍ର ସିଂହ ଧୋନି ସମସ୍ତ ମ୍ୟାଚ୍ରେ ଅର୍ଦ୍ଧଶତକୀୟ ପାଳି ଖେଳିଥିଲେ । ଏହି ପ୍ରଦର୍ଶନ ପାଇଁ ତାଙ୍କୁ ମ୍ୟାନ୍ ଅଫ ଦ ସିରିଜ ବିବେଚିତ କରାଯାଇଥିଲା । ଏକଦା ଧୋନିଙ୍କୁ ସମାଲୋଚନା କରୁଥିବା କ୍ରିକେଟ୍ ପଣ୍ଡିତ ମାନେ ସିରିଜ୍ ବିଜୟ ପରେ ପ୍ରଶଂସା କରିବା ଆରମ୍ଭ କରିଦେଇଛନ୍ତି । ଅଷ୍ଟ୍ରେଲିଆର ପୂର୍ବତନ କ୍ରିକେଟ ଖେଳାଳି ଇଆନ୍ ଚାପେଲଙ୍କ ମତରେ ଧୋନିଙ୍କ ଭଳି ମ୍ୟାଚ୍ ବିଜେତା ସୃଷ୍ଟି ହୋଇ ନାହାନ୍ତି । ୩୭ବର୍ଷ ବୟସରେ ପହଞ୍ଚି ସାରିଥିଲେ ହେଁ ସେ ଏବେ ମଧ୍ୟ ବିଶ୍ୱର ଶ୍ରେଷ୍ଠ ମ୍ୟାଚ୍ ବିଚେତା ବୋଲି ଚାପେଲ ପ୍ରକାଶ କରିଛନ୍ତି । ଚାପେଲ କହିଛନ୍ତି ଯେ, ମ୍ୟାଚ୍ ଜିତାଇବାର ଦକ୍ଷତା ସମୟକ୍ରମେ ଲୋପ ପାଇଯାଇଥିବା ମୁଁ ଅନେକ ସମୟରେ ଅନୁଭବ କରୁଥିଲି । ହେଲେ ଧୋନି ମୋତେ ଭୁଲ ପ୍ରମାଣିତ କରିଦେଇଛନ୍ତି । ତାଙ୍କ ବିଶାଳ ସଟ୍ ମାରିବାର ଦକ୍ଷତା ପୂର୍ବଭଳି କାଏମ ରହିଛି । ମାଇକେଲ ବେଭାନ ପୂର୍ବରୁ ଚୌକା ମାରି ଜିତାଇବା ଦେଖିଥିଲି । ହେଲେ ଧୋନି କେବଳ ଛକା ମାରି ମ୍ୟାଚ୍ ଜିତାଇ ଆସୁଛନ୍ତି । ମୋ ମତରେ ବେଭାନଙ୍କ ତୁଳନାରେ ଧୋନି ଅଧିକ ଦକ୍ଷ ।
