ପାଳଲହଡା, ୬/୬ : ଜୀବନ ନେଲା ଅନ୍ଧବିଶ୍ଵାସ। ବୃଦ୍ଧଙ୍କୁ ଠେଙ୍ଗାରେ ପିଟିପିଟି ମାରିଦେଲେ ଦୁଇ ଭାଇ। ଅନୁଗୁଳ ଜିଲ୍ଲା ପାଳଲହଡ଼ା ଥାନା ବନ୍ଧାଭୂଇଁ ଗ୍ରାମପଞ୍ଚାୟତର ଭୀମକାଣ୍ଡ ଗାଁରେ ହତ୍ୟା ଅଭିଯୋଗ। ଘଟଣାସ୍ଥଳରେ ପହଞ୍ଚି ଶବ ଜବତ କରି ତଦନ୍ତ କରୁଛି ପୁଲିସ। ଅଭିଯୁକ୍ତ ଦୁଇ ଭାଇ ଫେରାର୍।
ସୂଚନା ଅନୁଯାୟୀ, ଗୁରୁବାର ବନ୍ଧାଭୂଇଁ ପାଞ୍ଚୟତ ଭୀମକାଣ୍ଡ ଗ୍ରାମରେ ରଜ ପାଇଁ ଦୋଳି ପ୍ରସ୍ତୁତି ଚାଲିଥିଲା। ଏହି ସମୟରେ କାଠ ଛାଲି ଘରକୁ ନେବା ପାଇଁ ଗ୍ରାମସମାଜରୁ ବାସନ୍ଦ ହୋଇଥିବା ନକୁଳ ପ୍ରଧାନ (୫୭ ବର୍ଷ) ଓ ଦୁଇ ଭାଇ ଜିତୁ ପ୍ରଧାନ ଏବଂ କାହ୍ନା ପ୍ରଧାନଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ସେମାନେ ନକୁଳ ପ୍ରଧାନଙ୍କୁ କାଠ ଛାଲି ଦେଇନଥିଲେ। ଯାହାଫଳରେ ନକୁଳ ରାଗିଯାଇ ସେମାନଙ୍କ ବାପାକୁ ସାପ କାମୁଡ଼ି ଦେବ ବୋଲି କହିଥିଲା। ଦୁର୍ଭାଗ୍ୟବଶତଃ ଝଗଡ଼ା ପରେ ଗତକାଲି ଅପରାହ୍ଣରେ ଜିତୁ ଓ କାହ୍ନାଙ୍କ ବାପା ଇଶ୍ୱର ପ୍ରଧାନଙ୍କୁ ସାପ କାମୁଡ଼ି ଦେଇଥିଲା। ଏଥିରେ ଉତ୍ତ୍ୟକ୍ତ ହୋଇ ରାତିରେ ଦୁଇ ଭାଇ ନକୁଳଙ୍କୁ ଘରୁ ଟାଣି ଆଣି ଠେଙ୍ଗାରେ ମାଡ଼ ମାରିଥିଲେ। ଘଟଣାସ୍ଥଳରେ ନକୁଳଙ୍କ ମୃତ୍ୟୁ ହୋଇଥିଲା।
ଏନେଇ ଖବର ପାଇବା ପରେ ପାଳଲହଡା ପୁଲିସ ଏସଡିପିଓ କୈଳାସ ଚନ୍ଦ୍ର ସେଠୀ ଓ ଥାନା ଅଧିକାରୀ ପ୍ରଦୀପ କୁମାର ମହାନ୍ତ ଘଟଣାସ୍ଥଳରେ ପହଞ୍ଚି ଶବ ଜବତ କରିବା ସହିତ ତଦନ୍ତ ଆରମ୍ଭ କରିଛନ୍ତି। ମୁଖ୍ୟ ଅଭିଯୁକ୍ତ ଦୁଇ ଭାଇ ଫେରାର ହୋଇଯାଇଛନ୍ତି। ଦୁଇ ଭାଇଙ୍କ ମଧ୍ୟରୁ ସାନ ଭାଇ ନାବାଳକ ବୋଲି ଜଣାପଡ଼ିଛି।
