ପୁରୀ,୦୫/୦୪: ଆଉ ମାତ୍ର କିଛି ଦିନ ପରେ ପବିତ୍ର ଅକ୍ଷୟ ତୃତୀୟା । ଏହି ଦିନଠାରୁ ମହାପ୍ରଭୁଙ୍କ ଆରମ୍ଭ ହେବ ଚନ୍ଦନଯାତ୍ରା । ଦୀର୍ଘ ୨୧ ଦିନ ଧରି ମହାପ୍ରଭୁଙ୍କ ଏହି ମାନବୀୟ ଲୀଳା ଦେଖିବା ଲାଗି ନରେନ୍ଦ୍ର ଚତୁଃପାଶ୍ୱର୍ରେ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହେବ । ହେଲେ ଏବେ ଅବହେଳିତ ଅବସ୍ଥାରେ ପଡ଼ିରହିଛି ନରେନ୍ଦ୍ର ପୁଷ୍କରିଣୀ । ଏପର୍ଯ୍ୟନ୍ତ ସରିନାହିଁ ସୌନ୍ଦର୍ଯୀକରଣ ତଥା ପୁନରୁଦ୍ଧାର କାର୍ଯ୍ୟ । ମନ୍ଥର ଗତିରେ କାର୍ଯ୍ୟ ଚାଲିଥିବାରୁ ନିର୍ଦ୍ଧାରିତ ସମୟରେ ଶେଷ ହେବା ନେଇ ଆଶଙ୍କା ଦେଖାଦେଇଛି । ଦାୟିତ୍ୱରେ ରହିଥିବା ଅଧିକାରୀଙ୍କ ଉପଯୁକ୍ତ ତଦାରଖ ଓ ସମୀକ୍ଷା ଅଭାବରୁ କାର୍ଯ୍ୟ ମାତ୍ରାଧିକ ବିଳମ୍ବ ହେଉଛି ।
ବର୍ତ୍ତମାନ ଜଟିଆବାବାଜୀ ଛକଠୁ ମାର୍କେଟ ଛକକୁ ସଂଯୋଗ କରୁଥିବାର ରାସ୍ତା ପାଶ୍ୱର୍ପଟେ ପାଚେରି ନିର୍ମାଣ ଜାରି ରହିଛି । ମାଟିକୁ ବାହାର କରାଯାଇ ବାହାରେ ଗଦା କରାଯାଇଛି । ପାଚେରି କାର୍ଯ୍ୟ ସରିଲେ ବ୍ୟାରିକେଡ କାମ ଆରମ୍ଭ ହେବ ବୋଲି ଜଣାପଡ଼ିଛି । ପାଚେରି କାର୍ଯ୍ୟ ସରି ନଥିବାରୁ ପଲସ୍ତରା ଓ ବ୍ୟାରିକେଡ କାର୍ଯ୍ୟ ଧାର୍ଯ୍ୟ ସମୟ ପୂର୍ବରୁ ଶେଷ ହେବା ନେଇ ଆଶଙ୍କା ଦେଖାଦେଇଛି । ସେହିଭଳି ଶୌଚାଳୟ କାର୍ଯ୍ୟ ମଧ୍ୟ ଜାରି ରହିଛି ।
ଏସମ୍ପର୍କରେ ଓବିସିସି ଅଧିକାରୀ ଗିରିଜା ଶଙ୍କର ନାୟକ କୁହନ୍ତି, ଅକ୍ଷୟତୃତୀୟା ପୂର୍ବରୁ ବାକି ରହିଥିବା ସୌନ୍ଦର୍ଯୀକରଣ କାମ ଓ ଶ୍ରଦ୍ଧାଳୁଙ୍କ ନିମନ୍ତେ ଶୌଚାଳୟ କାର୍ଯ୍ୟ ନିଶ୍ଚିତ ଭାବେ ସମ୍ପୂର୍ଣ୍ଣ କରାଯିବ । ଅନ୍ୟ ସମସ୍ତ କାର୍ଯ୍ୟ ସରିଯାଇଛି । ନରେନ୍ଦ୍ର ପୁଷ୍କରିଣୀର ରକ୍ଷଣାବେକ୍ଷଣା ଦାୟିତ୍ୱ ଶ୍ରୀମନ୍ଦିର ପ୍ରଶାସନ ଓ ପୌରପାଳିକା ହାତରେ ରହିଛି । କିନ୍ତୁ ପରିତାପର ବିଷୟ ନରେନ୍ଦ୍ର ପୁଷ୍କରିଣୀ ଓ ଏହାର ଚତୁଃପାଶ୍ୱର୍କୁ ସଫା କରାଯାଉନାହିଁ । ନରେନ୍ଦ୍ରର ଭିତର ପାହାଚ ଓ ପାଣିରେ ପାଣି ବୋତଲଠାରୁ ଆରମ୍ଭ କରି ଅଳିଆ ଆବର୍ଜନା ଭାସୁଛି । ସେହି ଭଳି ମାନସିକ ଚୁଟି ପଡୁଥିବା ପାଶ୍ୱର୍କୁ ବେଢା ଉପରେ ଲୋକେ ଘରକରଣା ସାମଗ୍ରୀ ରଖିଲେଣି । କେଉଁଠି ବାଲି ଗଦା ହୋଇଛି ତ ଅନ୍ୟ କେଉଁଠି ସାଇକଲ ଦୋକାନ ଖୋଲିଲାଣି । ଆଉ କେଉଁଠି ପୁରୁଣା ଗାଡ଼ି ରଖାଯାଇଛି । ଫଳରେ ନରେନ୍ଦ୍ର ଚତୁଃପାଶ୍ୱର୍ ପରିତ୍ୟକ୍ତ ଅବସ୍ଥାରେ ପଡ଼ିରହିଛି । ଏନେଇ ଜଣେ ସ୍ଥାନୀୟ ବାସିନ୍ଦା କହିଛନ୍ତି, ନରେନ୍ଦ୍ର ପୁନଃରୁଦ୍ଧାର ଓ ସୌନ୍ଦର୍ଯୀକରଣ ଲାଗି କୋଟି କୋଟି ଟଙ୍କା ବ୍ୟୟ କରାଯାଉଛି । ହେଲେ ଏହାର ରକ୍ଷଣାବେକ୍ଷଣା ଅଭାବରୁ ଆବର୍ଜନାମୟ ହୋଇପଡ଼ିଛି । ପୌରପାଳିକା ସଫେଇ କର୍ମଚାରୀମାନେ କେବଳ ରାସ୍ତା ସଫା କରୁଥିବାବେଳେ ନରେନ୍ଦ୍ର ପୁଷ୍କରିଣୀର ବାହାର ପାଶ୍ୱର୍ ବେଢାରେ ଝାଡୁ ମାରୁନାହାନ୍ତି । କେବଳ ୨୧ଦିନ ଚାପ ବେଳେ ଏଠାରେ ପ୍ରଶାସନିକ ଅଧିକାରୀଙ୍କ ଦେଖା ମିଳିଥାଏ ।
ଏସମ୍ପର୍କରେ ପୌରପାଳିକା କାର୍ଯ୍ୟନିର୍ବାହୀ ଅଧିକାରୀ ଅଭିମନ୍ୟୁ ବେହେରାଙ୍କୁ ପଚାରିବାରୁ ସେ କହିଛନ୍ତି, ମୋ ନିକଟରେ ଖବର ପହଞ୍ଚିଛି। ଖୁବ୍ଶୀଘ୍ର ନରେନ୍ଦ୍ରକୁ ପରିଷ୍କାର କରିବା ସହ ଚତୁଃପାଶ୍ୱର୍ରୁ ଜବରଦଖଲ ହଟାଯିବ । ରାଜ୍ୟ ସରକାର ନରେନ୍ଦ୍ର ସମେତ ମାର୍କଣ୍ଡେୟ ଓ ଇନ୍ଦ୍ରଦ୍ୟୁମ୍ନ ପୁଷ୍କରିଣୀର ପୁନରୁଦ୍ଧାର ଲାଗି ଅବଢ଼ା ଯୋଜନାରେ ୬୬ କୋଟି ଟଙ୍କା ମଞ୍ଜୁର କରିଥିଲେ ।
