୨୫ରେ ନବୀନ ବନାମ ରାହୁଲ ସୋ
ହାତ, ପୁରୀରେ ଶଙ୍ଖ । ଏଠି ରାହୁଲ, ସେଠି ନବୀନ । ୨୫ରେ କଂଗ୍ରେସ କର୍ମୀଙ୍କ ବିଶାଳ ସମାବେଶରେ ରାହୁଲ ଗାନ୍ଧି ବିଜେଡି ସରକାର ଉପରେ କରିବେ ଆକ୍ରମଣ । ବିଜେଡି ମୁଖିଆ ତଥା ମୁଖ୍ୟମନ୍ତ୍ରୀ ପୁରୀରେ ଠିକ୍ ସେଇଦିନ ଚାଷୀଙ୍କ ଗହଣରେ ରହିବେ । ‘କାଳିଆ’ ଯୋଜନାର ହିତାଧିକାରୀଙ୍କୁ ସହାୟତା ରାଶି ବଣ୍ଟନ କରିବେ ।
ଏଆଇସିସି ଅଧ୍ୟକ୍ଷ ରାହୁଲ ଗାନ୍ଧି ଆସନ୍ତା ୨୫ରେ ଓଡ଼ିଶା ଗସ୍ତରେ ଆସିବେ । ରାହୁଲ ଦିନିକିଆ ଗସ୍ତରେ ଆସି ତମାଣ୍ଡୋ ଖେଳ ପଡ଼ିଆରେ ବିଶାଳ ସମାବେଶକୁ ସମ୍ବୋଧିତ କରିବେ । ଏଥିପାଇଁ କଂଗ୍ରେସ କ୍ୟାମ୍ପରେ ନାହିଁ ନଥିବା ଉତ୍ସାହ । ଅବଶ୍ୟ ରାହୁଲଙ୍କ ଗସ୍ତ ପୂର୍ବରୁ ବିଧାୟକ ନବ ଦାସ ଓ ଯୋଗେଶ ସିଂହ ବିଜେଡିମୁହାଁ ହେବା ଦଳକୁ ଝଟକା ଦେଇଛି । ମାତ୍ର ଏହା ସତ୍ତେ୍ୱ ଦଳ ବେଶ ଆତ୍ମବିଶ୍ୱାସର ସହ ରାହୁଲଙ୍କ ସଭାକୁ ପୂର୍ଣ୍ଣ ସଫଳ କରିବାକୁ ସବୁପ୍ରକାର ଉଦ୍ୟମ ଜାରି ରଖିଛି । ପୁରୀ, ଖୋର୍ଦ୍ଧା, ନୟାଗଡ଼, କଟକ, ଜଗତସିଂହପୁର, କେନ୍ଦ୍ରାପଡ଼ା ଆଦି ଜିଲ୍ଲାରୁ ଲୋକଙ୍କୁ ଆଣିବାକୁ ଦଳ ପକ୍ଷରୁ କସରତ ଆରମ୍ଭ ହୋଇଛି । ତମାଣ୍ଡୋ ପଡ଼ିଆ ଯେପରି ଲୋକରେ ଉବୁଟୁବୁ ହେବ ସେଥିପାଇଁ ଟିମ୍ ନିରଞ୍ଜନ ଦିନରାତି ଏକ କରିଛନ୍ତି । ରାହୁଲ ଓଡ଼ିଶା ଗସ୍ତରେ ଆସି ନବୀନ ଓ ମୋଦି କାହା ଉପରେ ଅଧିକ ବର୍ଷିବେ ତାହା ଉପରେ ଆଖି । ବିଜେଡି ମୁଖିଆ ଉଭୟ ବିଜେପି ଓ କଂଗ୍ରେସଠାରୁ ସମ ଦୂରତାରେ ଅଛନ୍ତି ବୋଲି ବାରମ୍ବାର ଦୋହରାଉଛନ୍ତି । କଂଗ୍ରେସ ପାଇଁ ବିଜେପି ବଡ଼ ଶତ୍ରୁ ଭାବେ ଉଭା ହୋଇଥିଲା ବେଳେ ବିଜେଡି ମଧ୍ୟ ବନ୍ଧୁ ନୁହେଁ । ତେଣୁ ନିଜ ଭାଷଣରେ ରାହୁଲ ମୋଦିଙ୍କ ସହ ନବୀନଙ୍କ ଉପରେ ଆକ୍ରମଣ କରିବା ଅନୁମାନ କରାଯାଉଛି । ନିରଞ୍ଜନ ପିସିସି ସଭାପତି ହେବା ପରେ ଓ ଆସନ୍ତା ଭୋଟ ପୂର୍ବରୁ ରାହୁଲଙ୍କ ଏହା ପ୍ରଥମ ଓଡ଼ିଶା ଗସ୍ତ । ଏ ଗସ୍ତର ସଫଳତା ଉପରେ କଂଗ୍ରେସର ଆଗାମୀ ଭୋଟ ରାଜନୀତି ଅନେକାଂଶରେ ନିର୍ଭର କରୁଥିବାରୁ ଏହାକୁ ସଫଳ କରିବାକୁ ଦଳର ସବୁ ଛାମୁଆ ସଂଗଠନ କାନ୍ଧରେ କାନ୍ଧ ମିଳାଇଛନ୍ତି ।
ରାହୁଲ ଗାନ୍ଧିଙ୍କ ସମାବେଶରୁ ନଜର ହଟାଇବାକୁ ପୁରୀରେ ରାଜ୍ୟ ସରକାରଙ୍କ ପକ୍ଷରୁ ଏକ ବିଶାଳ ଚାଷୀ ସମାବେଶର ଆୟୋଜନ କରାଯାଇଛି । ସ୍ୱାଧୀନତାର ଦୀର୍ଘ ବର୍ଷ ପରେ ‘ଚାଷ ଓ ଚାଷୀ’ ପ୍ରମୁଖ ପ୍ରସଙ୍ଗ ହେବାକୁ ଯାଉଥିବାରୁ ମୁଖ୍ୟମନ୍ତ୍ରୀ ଚାଷୀ ଭୋଟବ୍ୟାଙ୍କକୁ ସୁରକ୍ଷିତ ରଖିବାକୁ କୌଣସି ସୁଯୋଗ ହାତଛଡ଼ା କରୁନାହାନ୍ତି । ପୁରୀ ତାଳବଣିଆରେ ପ୍ରାୟ ୧ ଲକ୍ଷ ଚାଷୀଙ୍କୁ ଏକାଠି କରିବାକୁ ସରକାରଙ୍କ ପକ୍ଷରୁ ତିଆରି ହୋଇଛି ବ୍ଲୁପ୍ରିଣ୍ଟ୍ । ବିଭିନ୍ନ ଜିଲ୍ଲାରୁ ଏଠାରେ ଚାଷୀଙ୍କୁ ଠୁଳ କରି ମୁଖ୍ୟମନ୍ତ୍ରୀ ‘କାଳିଆ’ ସହାୟତା ବଣ୍ଟନର ଶୁଭାରମ୍ଭ କରିବା ସହ ନୂଆ ଘୋଷଣା କରିପାରନ୍ତି ବୋଲି ଚର୍ଚ୍ଚା ହେଉଛି । ରାହୁଲଙ୍କ ସଭା ତୁଳନାରେ ଅଧିକ ଲୋକଙ୍କୁ ଏକାଠି କରିବାକୁ ଉଦ୍ୟମ ଜୋର୍ ଧରିଛି । ଉଦ୍ଦେଶ୍ୟମୂଳକ ଭାବେ ବିଜେଡି ସରକାର ରାହୁଲଙ୍କ କାର୍ଯ୍ୟକ୍ରମ ଦିନ ଚାଷୀ ସମାବେଶ ଆୟୋଜନ କରିଛି ବୋଲି କଂଗ୍ରେସ ଅଭିଯୋଗ ମଧ୍ୟ ଆଣିଛି । ଚାଷୀଙ୍କ ନାମରେ ଭୋଟ ରାଜନୀତି କରି ଚାଷୀଙ୍କୁ ଭୂଆଁ ବୁଲାଇବାକୁ ସରକାରୀ ପ୍ରାୟୋଜିତ ଦଳୀୟ କାର୍ଯ୍ୟକ୍ରମ କରାଯାଉଛି ବୋଲି କଂଗ୍ରେସ ଅଭିଯୋଗ ଆଣିଛି । ମାତ୍ର ରାଜସ୍ୱ ମନ୍ତ୍ରୀ ମହେଶ୍ୱର ମହାନ୍ତି କହିଛନ୍ତି, ଏ ଅଭିଯୋଗ ଭିତ୍ତିହୀନ । ରାଜ୍ୟର ଚାଷୀ ଜାଣିଛନ୍ତି ତାଙ୍କ ପ୍ରତି କାହାର ଦରଦ ଅଛି ।
