ପାଶ୍ୱାନଙ୍କୁ ନବୀନଙ୍କ ଚିଠି: ରାଜ୍ୟ ଯୋଗାଣ ନିଗମର ବକେୟା ୩୬୫୪ କୋଟି ଦିଅ
ଭୁବନେଶ୍ୱର,୮ା୨(ବ୍ୟୁରୋ): କେନ୍ଦ୍ରର ଖାଦ୍ୟ ଯୋଗାଣ ଓ ସାଧାରଣ ବଣ୍ଟନ ମନ୍ତ୍ରାଳୟ ଉପରେ ରାଜ୍ୟ ଯୋଗାଣ ନିଗମର ସବସିଡି ବାବଦକୁ ୩୬୫୪ କୋଟି ୪୧ ଲକ୍ଷ ଟଙ୍କା ବକେୟା ଗଡ଼ୁଛି । ତୁରନ୍ତ ଏ ପାଣ୍ଠି ପ୍ରଦାନ କରିବା ସହ ନିୟମିତ କିଭଳି ଓଡ଼ିଶା ଯୋଗାଣ ନିଗମକୁ ସବ୍ସିଡି ରାଶି ମିଳିବ ସେ ଦିଗରେ ଯତ୍ନବାନ ହେବାକୁ କେନ୍ଦ୍ର ଖାଦ୍ୟ ଯୋଗାଣ ମନ୍ତ୍ରୀ ରାମବିଳାସ ପାଶ୍ୱାନଙ୍କୁ ଚିଠି ଲେଖି ଅନୁରୋଧ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଚିଠିରେ ଶ୍ରୀ ପଟ୍ଟନାୟକ ଦର୍ଶାଇଛନ୍ତି, ଓଡ଼ିଶା ରାଜ୍ୟ ଯୋଗାଣ ନିଗମ ରାଜ୍ୟ ସରକାରଙ୍କ ଉଦ୍ୟୋଗ ଭାବେ ୨୦୦୩-୦୪ରୁ ରାଜ୍ୟରେ ଚାଷୀଙ୍କଠାରୁ ଧାନ ସଂଗ୍ରହ କରୁଛି । ନିଗମ
ଏ ପ୍ରକ୍ରିୟା ସଂପାଦନ କରିବାକୁ ବ୍ୟାଙ୍କରୁ ଋଣ କରୁଛି । ଧାନ ସଂଗ୍ରହ ବ୍ୟବସ୍ଥାକୁ ଅଧିକ ସ୍ୱଛ କରିବାକୁ ଚାଷୀଙ୍କ ଜମାଖାତାକୁ ସିଧାସଳଖ ଅର୍ଥ ପଠାଯାଉଛି । ଗତବର୍ଷ ଏ ଧାନ ସଂଗ୍ରହ ବାବଦକୁ ଚାଷୀଙ୍କ ଆକାଉଣ୍ଟକୁ ନିଗମ ୭୬୦୦ କୋଟି ଟଙ୍କା ପଠାଇଛି । ଚଳିତ ବର୍ଷ ନିଗମ ଏଯାଏ ୪୦ ହଜାର ମେଟ୍ରିକ ଟନ ଧାନ ସଂଗ୍ରହ କରିଥିଲା ବେଳେ ଚାଷୀଙ୍କ ଆକାଉଣ୍ଟକୁ ୬ ହଜାର କୋଟି ଟଙ୍କା ସ୍ଥାନାନ୍ତର କରାଯାଇଛି । ଏତେ ପରିମାଣର ପାଙଋି ଜମା କରିବାକୁ ପଡୁଥିବାରୁ ନିଗମ କ୍ୟାସ କ୍ରେଡଟ ଲିମିଟ ଛୁଇଁବାକୁ ବସିଛି । ଏ ସମସ୍ୟା ଏଡ଼ାଇବାକୁ ହେଲେ କେନ୍ଦ୍ର ଖାଦ୍ୟ ଯୋଗାଣ ମନ୍ତ୍ରାଳୟକୁ ଠିକ୍ ସମୟରେ ଯୋଗାଣ ନିଗମକୁ ଖାଦ୍ୟ ସବସିଡି ଦେବାକୁ ହେବ । ଆସନ୍ତା ମାର୍ଚ୍ଚ ଯାଏ ଏ ବାବଦରେ କେନ୍ଦ୍ର ଉପରେ ଯୋଗାଣ ନିଗମର ୩୬୫୪.୪୧ କୋଟି ବକେୟା ଗଡୁଛି । କେନ୍ଦ୍ର ଉପରେ ଏତେ ପରିମାଣର ପାଙଋି ବାକି ଗଡ଼ିବା ନିଗମର ପାଙଋି ସଂକଟ ସୃଷ୍ଟି କରୁଛି । ରାଜ୍ୟର ଚାଷୀଙ୍କୁ ଧାର୍ଯ୍ୟ ସମୟରେ ପାଙଋି ପ୍ରଦାନ କରିବା କଷ୍ଟକର ହେଉଛି । ତେଣୁ ରାଜ୍ୟର ଚାଷୀକୁଳର ହିତ ଦୃଷ୍ଟିରୁ ତୁରନ୍ତ ଶ୍ରୀ ପାଶ୍ୱାନ ହସ୍ତକ୍ଷେପ କରିବାକୁ ନବୀନ ଚିଠିରେ ଅନୁରୋଧ କରିଛନ୍ତି ।
