କେଭିଙ୍କୁ ନବୀନଙ୍କ ଜବାବ, ଆବ୍ସଲ୍ୟୁଟ୍ଲି ନନ୍ସେନ୍ସ
ଭୁବନେଶ୍ୱର,୫ ।୨(ବ୍ୟୁରୋ): ଚିଟ୍ଫଣ୍ଡ ମାମଲାରେ ସିବିଆଇ ନବୀନଙ୍କୁ ଜେରା କରିଛି । ବିଜେପି ବିଧାୟକ ଦଳନେତା କେଭି ସିଂହଦେଓଙ୍କ ଏ ଅଭିଯୋଗକୁ ମାତ୍ର ଦୁଇଟି ଶବ୍ଦରେ ହସି ଉଡ଼ାଇ ଦେଇଛନ୍ତି । ଗଣମାଧ୍ୟମ କେଭିଙ୍କ ଅଭିଯୋଗ ନେଇ ପ୍ରତିକ୍ରିୟା ଲୋଡ଼ିବାରୁ ନବୀନ କହିଲେ, ଆବ୍ସଲ୍ୟୁଟ୍ଲି ନନ୍ସେନ୍ସ । ଏମିତି କହି ନବୀନ କେଭିଙ୍କ ଅଭିଯୋଗକୁ ସଂପୂର୍ଣ୍ଣ ଖଣ୍ଡନ କରିଛନ୍ତି ।
ଚିଟଫଣ୍ଡ ସ୍କାମକୁ ନେଇ କୋଲକତାରେ ସିବିଆଇ-ମମତା ବାନାର୍ଜୀ ମୁହାଁମୁହିଁ ହେବା ପରେ ଏହାର କମ୍ପନ ଭୁବନେଶ୍ୱରରେ ମଧ୍ୟ ଅନୁଭୂତ ହୋଇଛି । ସୋମବାର ସଂସଦରେ ବିଜେଡି ନିଜ ପକ୍ଷ ରଖି କେନ୍ଦ୍ର ଓ ସିବିଆଇ ଉପରେ ବର୍ଷିଥିଲା । ଏପରିକି ମଙ୍ଗଳବାର ଧାରଣାରୁ ହଟିବା ପୂର୍ବରୁ ମମତା ଘୋଷଣା କଲେ ଯେ, ଏ ନେଇ ସେ ନବୀନଙ୍କ ସହ ଆଲୋଚନା କରିବେ । ନବୀନ ମଧ୍ୟ ତାଙ୍କୁ ସମର୍ଥନ ଦେବେ । ଏହାକୁ ନେଇ ବିଜେପି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ବିଧାନସଭା ଭିତରେ ଓ ବାହାରେ ଟାର୍ଗେଟ୍ କରିଥିଲା ବେଳେ ନବୀନ ପାଲଟା ଜବାବ ରଖିଛନ୍ତି ।
ସିବିଆଇ ପ୍ରସଙ୍ଗରେ ଆପଣ ମମତାଙ୍କୁ ସମର୍ଥନ ଦେବେ କି? ଏ ପ୍ରଶ୍ନରେ ମୁଖ୍ୟମନ୍ତ୍ରୀ ସ୍ପଷ୍ଟ କରିଛନ୍ତି, ଏ ପ୍ରସଙ୍ଗରେ ଗତ ବର୍ଷେ ହେବ ଆମ ସହ ଟିଏମ୍ସିର କେହି କଥା ହୋଇ ନାହାନ୍ତି । ଏ ପ୍ରସଙ୍ଗରେ ଦଳ ପକ୍ଷରୁ ସୋମବାର ଆମେ ଆମ ପକ୍ଷ ରଖିଛୁ । ଆମ ଦଳର ମତାମତ କେବଳ ଓଡ଼ିଶା ସଂପର୍କିତ । ତେବେ ସିବିଆଇ ପେସାଦାର ସଂସ୍ଥା ଭଳି ରାଜନୀତିରୁ ଉଧ୍ୱର୍ରେ ରହି କାମ କରିବା ଦରକାର ବୋଲି ନବୀନ ମତ ରଖିଛନ୍ତି । ଏହାଛଡ଼ା ସୁପ୍ରିମକୋର୍ଟ ଏ ନେଇ ଦେଇଥିବା ରାୟକୁ ସମସ୍ତେ ମାନିନେବା ଉଚିତ ବୋଲି ନବୀନ କହିଛନ୍ତି ।
