ଜୟପୁର,୨୯/୦୩: ମଞ୍ଜୁର ହୋଇଛି କୋରାପୁଟ ଜିଲ୍ଲା ଜୟପୁର ସହରର ନୂଆ ମାଷ୍ଟର ପ୍ଲାନ । ଏ ସଂପର୍କରେ ରାଜ୍ୟ ସରକାରଙ୍କ ଗେଜେଟ୍ରେ ବିଧିବଦ୍ଧ ଭାବେ ପ୍ରକାଶ ପାଇଛି ସ୍ୱତନ୍ତ୍ର ବିଜ୍ଞପ୍ତି । ଏଥିଲାଗି ସହର ଓ ଆଖପାଖ ବାସିନ୍ଦାଙ୍କୁ ଦୀର୍ଘ ୪୪ ବର୍ଷ ଅପେକ୍ଷା କରିବାକୁ ପଡ଼ିଛି । ନୂଆ ମାଷ୍ଟର୍ପ୍ଲାନ୍ରେ ୧୫ଟି ରାଜସ୍ୱଗାଁକୁ ସାମିଲ କରାଯାଇଛି । ଏବେ ୭ ହଜାର ୭୧୭ ଏକରରେ ପହଞ୍ଚିଛି ଏହାର ପରିସୀମା। ସେ ଭିତରେ ରହିଛି ପୌରାଞ୍ଚଳର ୨ ହଜାର ୫୪୩ ଏକର ଏବଂ ସହରକୁ ଲାଗିଥିବା ୬ଟି ପଞ୍ଚାୟତର ୪ ହଜାର ୫୭୪ ଏକର । ମାଷ୍ଟର ପ୍ଲାନ ଅନୁସାରେ ଉମୁରୀ, ବିଶୋଇପୁଟ ଏବଂ ସଉରାଗୁଡାକୁ ଶିଳ୍ପାଞ୍ଚଳ ମାନ୍ୟତା ମିଳିବ । ମକାପୁଟରେ ଓପନ ସ୍ପେସ ରହିବ । ଏଠାରେ ସବୁଜକ୍ଷେତ୍ର ଲାଗି ଯୋଜନା କରାଯିବ ।
ଗେଜେଟେ୍ରେ ପ୍ରକାଶ ପାଇଥିବା ବିଜ୍ଞପ୍ତି ଅନୁସାରେ, ୨୦୨୩ ଜୁଲାଇ ୧୨ରେ ନୂଆ ମାଷ୍ଟର ପ୍ଲାନ ପାଇଁ କ୍ରିଟ୍ ପକ୍ଷର ପ୍ରସ୍ତୁତ ହୋଇଥିଲା ଡ୍ରାଫ୍ଟ । ଏହାକୁ ଅନୁମୋଦନ ଲାଗି ଗୃହ ଓ ସହରାଞ୍ଚଳ ଉନ୍ନୟନ ବିଭାଗକୁ ପଠାଯାଇଥିଲା । ୨୦୨୪ ଡିସେମ୍ବର ୨୬ରେ ବିଭାଗ ପକ୍ଷରୁ ରାଜ୍ୟ ଟାଉନପ୍ଲାନିଂ ନିର୍ଦ୍ଦେଶକଙ୍କ ପାଖକୁ ଏହା ଯାଇଥିଲା । ଏହାପରେ ରାଜ୍ୟ ଗେଜେଟ୍ରେ ଗତ ୧୮ ତାରିଖରେ ବିଜ୍ଞପ୍ତି ପ୍ରକାଶ ପାଇଛି। ନୂଆ ମାଷ୍ଟର ପ୍ଲାନରେ ପୌରାଞ୍ଚଳର ଜୟପୁର, ଜୟନଗର, ଜଗଧାତ୍ରୀପୁର, ଲକ୍ଷ୍ମଣପୁର, ବିଦ୍ୟାଧରପୁର, ବିକ୍ରମନଗର, ବାଲାଜୀପୁର, ନୀଳକଣ୍ଠେଶ୍ୱରପୁର ରାଜସ୍ୱ ଗାଁ(ମୌଜା) ରହିଛି ।
ବାଲିଆ ପଞ୍ଚାୟତର ଜୟନଗର ଅଞ୍ଚଳ ସହ, ଉମୁରୀର ମକାପୁଟ, ସଉରାଗୁଜା ଓ ପେନାଙ୍ଗି ସଂରକ୍ଷିତ ଜଙ୍ଗଲ,ଏକମ୍ବା ପଞ୍ଚାୟତର ବାଙ୍କବିଜା, ଟାଙ୍କୁଆ ପଞ୍ଚାୟତର ଜଗନ୍ନାଥପୁର, ଭୂଷାଙ୍ଗଗୁଡ଼ା ପଞ୍ଚାୟତର କଟରିପୁଟ ରାଜସ୍ୱ ଗାଁକୁ ସାମିଲ କରାଯାଇଛି । ସହରକୁ ଲାଗିଥିବା ବାରିଣୀପୁଟ, ଟାଙ୍କୁଆ, ଉମୁରୀ ଓ ଗଡ଼ପଦର ପଞ୍ଚାୟତର କେତେକ ଅଞ୍ଚଳ ମଧ୍ୟ ଏହି ପ୍ଲାନରେ ରହିଛି । ନୂଆ ମାଷ୍ଟର ପ୍ଲାନରେ ଉତ୍ତରରେ ଏକମ୍ବା, ବିଶୋଇପୁଟ ଓ ହର୍ଦ୍ଦଳି ରହିଛି । ଦକ୍ଷିଣରେ ଟାଙ୍କୁଆ, ପଦ୍ମପୁର ଓ ଘାଟଗୁମର ସଂରକ୍ଷିତ ଜଙ୍ଗଲ, ପୂର୍ବରେ କଳାଗୁଡା, ପାଲିଗୁଡା, ଦୁବୁଲି, ବଡ଼ଜୋରି, ବାରିଣୀପୁଟ, ନାକଟିଡଙ୍ଗର ସଂରକ୍ଷିତ ଜଙ୍ଗଲ ଓ ମୁଣ୍ଡିଗୁଡ଼ା ରହିଛି । ପଶ୍ଚିମରେ ରହିଛି ଏକମ୍ବା, ଗାଗନାପୁର, କୁନ୍ତରଖାଲ ସଂରକ୍ଷିତ ଜଙ୍ଗଲ ଏବଂ କୁନ୍ତରଖାଲ । ଏହା ମଞ୍ଜୁର ହୋଇଥିବାରୁ ଏଣିକି ଏସବୁ ଅଞ୍ଚଳରେ ଘର ନିର୍ମାଣ କରିବା ପୂର୍ବରୁ କ୍ରିଟ୍ରୁ ଲାଇସେନ୍ସ ନେବା ବାଧ୍ୟତାମୂଳକ ।
ସୂଚନାଥାଉକି, ୧୯୮୧ ମସିହାରେ ଜୟପୁର ସହର ଲାଗି ଶେଷଥର ପାଇଁ ମାଷ୍ଟର ପ୍ଲାନ ପ୍ରସ୍ତୁତ କରାଯାଇଥିଲା । ପ୍ରତି ୨୦ ବର୍ଷରେ ଥରେ ନୂଆ ମାଷ୍ଟର ପ୍ଲାନ ହେବା କଥା । ଅଥଚ ବିଭିନ୍ନ କାରଣରୁ ଏହାକୁ ୪୪ ବର୍ଷ ଲାଗିଗଲା । ନୂଆ ମାଷ୍ଟର ପ୍ଲାନ ଲାଗି ୨୦୧୬ରେ ପଦକ୍ଷେପ ନିଆଯାଇଥିଲା । ନୂଆଦିଲ୍ଲୀର ଏନ୍ଏଫ ଇନଫ୍ରାଟେକ୍ ସର୍ଭିସ ପ୍ରାଇଭେଟ୍ ଲିମିଟେଡ୍ ସଂସ୍ଥାକୁ ପ୍ଲାନ୍ ପ୍ରସ୍ତୁତ ଲାଗି ଦାୟିତ୍ୱ ଦିଆଯାଇଥିଲା । ୩୧.୨୩ ବର୍ଗକିମି ପରିସୀମାରେ ହୋଇଥିଲା ସର୍ଭେ । ଏଥିଲାଗି ବଜେଟ୍ ରହିଥିଲା ୧୮ ଲକ୍ଷ ୭୦ ହଜାର ଟଙ୍କା । ଅଥଚ ସଂସ୍ଥା ପକ୍ଷରୁ ପ୍ରସ୍ତୁତ ହୋଇଥିବା ମାଷ୍ଟର ପ୍ଲାନ୍ରେ କେତେକ ତ୍ରୁଟି ରହିଥିଲା । ଏହାକୁ ପୁଣିଥରେ ସୁଧାରି ନୂଆ ମାଷ୍ଟରପ୍ଲାନ୍ ପ୍ରସ୍ତୁତ କରିବାକୁ କ୍ରିଟ୍ ପକ୍ଷରୁ ପରାମର୍ଶ ଦିଆଯାଇଥିଲା । ପ୍ରସ୍ତୁତ ହୋଇଥିବା ମାଷ୍ଟରପ୍ଲାନ୍କୁ ନେଇ କ୍ରିଟ୍ ପକ୍ଷରୁ ଆପତ୍ତି ଅଭିଯୋଗ ଆହ୍ୱାନ କରାଯାଇଥିଲା । କିନ୍ତୁ କୌଣସି ଆପତ୍ତି ଓ ଅଭିଯୋଗ ଆସିନଥିଲା ।
