୮ରେ ଆସୁଛି ‘ପ୍ରେମରେ ରଖିଚି ୧୦୦ରୁ ୧୦୦’
ଭୁବନେଶ୍ୱର,୩ା୨(ବ୍ୟୁରୋ): ଆସନ୍ତା ୮ତାରିଖରେ ସାରା ଓଡ଼ିଶାରେ ମୁକ୍ତିଲାଭ କରିବ ଓଡ଼ିଆ ଚଳଚ୍ଚିତ୍ର ‘ପ୍ରେମରେ ରଖିଚି ୧୦୦ରୁ ୧୦୦’ । ପ୍ରଯୋଜନା ସଂସ୍ଥା ପକ୍ଷରୁ ଆଜି ଅଡିଓ ରିଲିଜ୍ କାର୍ଯ୍ୟକ୍ରମରେ ଏନେଇ ସୂଚନା ଦିଆଯାଇଛି । ଶନିବାର ସନ୍ଧ୍ୟାରେ ଏକ ସଙ୍ଗୀତଭିତ୍ତିକ ସାଂସ୍କୃତିକ ପରିବେଶରେ ଚଳଚ୍ଚିତ୍ରର ଅଡିଓ ରିଲିଜ୍ ଅନୁଷ୍ଠିତ ହୋଇଥିଲା । ସିନେମାରେ ମୋଟ୍ ୫ଟି ଗୀତ ରହିଛି । ‘ହ୍ୱାଟ୍ସଅପ୍ରେ ଚାଟିଂ କଲେ’, ‘ଏ ମନ ବିଚରା’, ‘ଏ ତୁ କୁଆଡ଼େ ଯାଉଚୁ’, ‘ହୃଦୟ ଚିରି ଦିଅନ୍ତି ଯଦି’, ‘ତଡପ ତଡପ କରି’ ଭଳି ଗୀତସବୁ ରହିଛି । ସଙ୍ଗୀତ ନିର୍ଦ୍ଦେଶନା ମଳୟ ମିଶ୍ର ଦେଇଥିବାବେଳେ ଗୀତଗୁଡ଼ିକ ଲେଖିଛନ୍ତି ଗୀତିକାର ଡ. ନିର୍ମଳ ନାୟକ, ଅରୁଣ ମନ୍ତ୍ରୀ । ଗୀତଗୁଡ଼ିକ ଗାଇଛନ୍ତି କଣ୍ଠଶିଳ୍ପୀ ହ୍ୟୁମାନ୍ ସାଗର, ଈରା ମହାନ୍ତି, ଦିପ୍ତି ପାଢ଼ୀ, ସ୍ୱୟଂପ୍ରଭାସ, ସବିଶେଷ, ତାରିକ୍ ଅଜିଜ୍, ଆଶୁତୋଷ । ରାସେଶ୍ୱରୀ ଏଣ୍ଟରଟେନ୍ମେଣ୍ଟ ବ୍ୟାନରରେ ପ୍ରସ୍ତୁତ ଏ ଫିଲ୍ମର ପ୍ରଯୋଜନାରେ ବିରଞ୍ଚି ନାରାୟଣ ପଣ୍ଡା ଓ ଦିଲ୍ଲୀପ କୁମାର ଦାସ ରହିଛନ୍ତି । ସମ୍ପାଦନାରେ ରାଜେଶ ଦାଶ, ମୁଖ୍ୟ ବ୍ୟବସ୍ଥାପକ ବିକାଶ ଶତପଥୀ ଏବଂ କ୍ରିଏଟିଭ୍ ହେଡ୍ ଭାବେ ପ୍ରଣୟ ଜେଠୀ ରହିଛନ୍ତି । ଆଜିର ଅଡିଓ ରିଲିଜ୍ରେ ଫିଲ୍ମର ସମସ୍ତ କଳାକାର, ଟେକ୍ନିସିଆନ୍, ନିର୍ଦ୍ଦେଶକ, ସଙ୍ଗୀତ ନିର୍ଦ୍ଦେଶକ, ଗୀତିକାର, କଣ୍ଠଶିଳ୍ପୀ ଯୋଗ ଦେଇଥିଲେ । ଫିଲ୍ମର ମୁଖ୍ୟ ଭୂମିକାରେ ନାୟକ ଜ୍ୟୋତି ଏବଂ ନାୟିକା ରିୟା ରହିଛନ୍ତି । ଫିଲ୍ମର ନିର୍ଦ୍ଦେଶନା ଦେଇଛନ୍ତି ସଞ୍ଜୟ ନାୟକ ।
