ବଜାରରେ ନୂଆ ମାରୁତି ସୁଜୁକି ବଲେନୋ
ନୂଆଦିଲ୍ଲୀ,୨୮ା୧(ଏଜେନ୍ସି):ପ୍ରମୁଖ ଅଟୋ ନିର୍ମାତା ମାରୁତି ସୁଜୁକି ସୋମବାର ଏହାର ଲୋକପ୍ରିୟ ହ୍ୟାଚ୍ବ୍ୟାକ୍ ମଡେଲ୍ ବଲେନୋର ନୂଆ ଭର୍ସନକୁ ବଜାରକୁ ଆଣିଛି । ନୂତନ ବୈଶିଷ୍ଟ୍ୟ ଏବଂ ରଙ୍ଗରେ ଆସୁଥିବା ଏହି ମଡେଲ ପୁରୁଣା ଭର୍ସନଠାରୁ ମହଙ୍ଗା ରହିଛି । ଏହା ଉଭୟ ପେଟ୍ରୋଲ ଏବଂ ଡିଜେଲ ଭର୍ସନରେ ଉପଲବ୍ଧ । ବଲେନୋ ଫେସ୍ଲିଫ୍ଟର ଏକ୍ସଶୋ’ରୁମ୍ ଦିଲ୍ଲୀ ମୂଲ୍ୟ ୫.୪୫ ଲକ୍ଷ ଟଙ୍କାରୁ ଆରମ୍ଭ । ପେଟ୍ରୋଲ ସିଗ୍ମାର ମୂଲ୍ୟ ପୁରୁଣା ମଡେଲ ତୁଳନାରେ ୭୦୦୦ ଟଙ୍କା ଅଧିକ । ଡିଜେଲ ଭର୍ସନ ୬.୬୦ ଲକ୍ଷ ଟଙ୍କାରୁ ଆରମ୍ଭ । ଏହା ପୁରୁଣା ମଡେଲ ତୁଳନାରେ ୯,୦୦୦ ଟଙ୍କା ଅଧିକ । ୨୦୧୯ ବଲେନୋ ଏକ ନୂଆ ବମ୍ପର ଏବଂ ୧୬ ଇଞ୍ଚ ଆଲୟ ହ୍ୱିଲ୍ରେ ଆସୁଛି । ଦୁଇଟି ନୂଆ କଲର ବିକଳ୍ପ ଯଥା ଫୋନିକ୍ସ ରେଡ୍ ଏବଂ ମାଗ୍ମା ଗ୍ରେରେ ଆସୁଛି । ଅତିରିକ୍ତ ନିରାପତ୍ତା ବୈଶିଷ୍ଟ୍ୟ ଯେପରି ସ୍ପିଡ୍ ଆଲର୍ଟ ସିଷ୍ଟମ୍, କୋ-ଡ୍ରାଇଭର ସିଟ୍ ବେଲ୍ଟ ରିମାଇଣ୍ଡର ଏବଂ ରିୟର୍ ପାର୍କିଂ ଆସିଷ୍ଟ ସେନ୍ସରରେ ଏହା ଆସୁଛି । ସବୁ ମଡେଲରେ ଡୁଆଲ୍ ଏୟାର୍ବ୍ୟାଗ୍, ଚାଇଲ୍ଡ ସିଟ୍ ରିଷ୍ଟ୍ରେନ୍ ସିଷ୍ଟମ୍, ପ୍ରି-ଟେନ୍ସନର୍ ଏବଂ ଫୋସ୍ ଲିମିଟର୍ ସିଟ୍ ବେଲ୍ଟ ଓ ଇବିଡି ସହ ଏବିଏସ୍ ରହିଥିବା କମ୍ପାନି ପକ୍ଷରୁ ପ୍ରକାଶ ।
