ନୂଆଦିଲ୍ଲୀ,୧୪/୦୯: ଦେଶରେ ଗତ କିଛି ମାସ ହେବ ଇଥାନଲକୁ ନେଇ ବିବାଦ ଦେଖିବାକୁ ମିଳିଛି । ଲୋକଙ୍କ କହିବା ଅନୁସାରେ ଇଥାନଲ ଯୋଗୁଁ ସେମାନଙ୍କ ଗାଡ଼ି କ୍ଷତିଗ୍ରସ୍ତ ହେଉଛି । ସମ୍ପୂର୍ଣ୍ଣ ମାମଲା ସୁପ୍ରିମକୋର୍ଟରେ ପହଞ୍ଚିଥିଲା । ଏଥିପାଇଁ କେନ୍ଦ୍ର ସଡ଼କ ମନ୍ତ୍ରୀ ନୀତିନ ଗଡକରୀଙ୍କୁ ଦାୟୀ କରାଯାଇଥିଲା । ତଥାପି, କୋର୍ଟ ଏହାକୁ ପ୍ରତ୍ୟାଖ୍ୟାନ କରିଥିଲେ । ଏହି ପ୍ରସଙ୍ଗରେ ଗଡକରୀ କହିଛନ୍ତି ଯେ, ଏହି ବିବାଦ ସୋସିଆଲ ମିଡିଆର ଫଳାଫଳ । ମୋର ଟଙ୍କାର କୌଣସି ଅଭାବ ନାହିଁ ଏବଂ ମୁଁ ଦଲାଲ ନୁହେଁ ଯେ ଏତେ ତଳକୁ ଖସିଯିବି । ମୁଣ୍ଡ ଖଟାଇ ମୁଁ ମାସକୁ ୨୦୦କୋଟି ଟଙ୍କା ରୋଜଗାର କରୁଛି ।
ମୁଁ ଦଲାଲ ନୁହେଁ - ଇଥାନଲ ବିବାଦ ଭିତରେ ନାଗପୁରରେ ଆଗ୍ରିକୋସ୍ ୱେଲଫେୟାର ସୋସାଇଟି ଦ୍ୱାରା ଆୟୋଜିତ ଏକ କାର୍ଯ୍ୟକ୍ରମରେ ନୀତିନ ଗଡକରୀ କହିଛନ୍ତି, ତାଙ୍କର କାମ ଏବଂ ପରୀକ୍ଷଣ ଚାଷୀଙ୍କ ହିତ ପାଇଁ, ଅଧିକ ରୋଜଗାର ପାଇଁ ନୁହେଁ । ତୁମେ ଭାବୁଛ ମୁଁ ଟଙ୍କା ପାଇଁ ଏସବୁ କରୁଛି ? ମୁଁ ସଚ୍ଚୋଟ ଭାବରେ କିପରି ରୋଜଗାର କରିବି ତାହା ଜାଣେ । ମୁଁ ଦଲାଲ ନୁହେଁ ।ନେତାମାନେ ଲୋକମାନଙ୍କୁ ସେମାନଙ୍କର ରାଜନୈତିକ ଲାଭ ପାଇଁ ଲଢ଼ିବାର କଳା ଜାଣନ୍ତି । ମୋର ମଧ୍ୟ ଏକ ପରିବାର ଏବଂ ଏକ ଘର ଅଛି । ମୁଁ ଜଣେ ସନ୍ଥ ନୁହେଁ, ମୁଁ ଜଣେ ନେତା ମଧ୍ୟ, କିନ୍ତୁ ମୁଁ ସବୁବେଳେ ଅନୁଭବ କରିଛି ଯେ ବିଦର୍ଭର ୧୦,୦୦୦ ଚାଷୀଙ୍କ ଆତ୍ମହତ୍ୟା ଲଜ୍ଜାଜନକ । ଆମର ଚାଷୀମାନେ ସମୃଦ୍ଧ ନହେବେ ସେ ପର୍ଯ୍ୟନ୍ତ ଆମେ ଅଟକିବୁ ନାହିଁ । "
ପୁଅର ବ୍ୟବସାୟକୁ ନେଇ କ’ଣ କହିଲେ ଗଡକରୀ ? ଗଡକରୀ ତାଙ୍କ ପୁଅର ବ୍ୟବସାୟ ବିଷୟରେ କହିଛନ୍ତି କି, ମୁଁ ମୋର ପୁଅକୁ ବ୍ୟବସାୟ ନେଇ କେବଳ ନୂଆ ନୂଆ ପ୍ଲାନ୍ ଦିଏ । ମୋ ପୁଅର ଆମଦାନୀ-ରପ୍ତାନି ବ୍ୟବସାୟରେ ଅଛି । ସେ ସମ୍ପ୍ରତି ଇରାନରୁ ୮୦୦ କଣ୍ଟେନର ସେଓ ଆମଦାନୀ କରିଛି ଏବଂ ଏଠାରୁ ୧୦୦୦ କଣ୍ଟେନର କଦଳୀ ପଠାଇଛି । ମୋ ପୁଅ ଗୋଆରୁ ୩୦୦ କଣ୍ଟେନର ମାଛ ନେଇ ସର୍ବିଆରେ ପହଞ୍ଚିଛି । ସେ ଅଷ୍ଟ୍ରେଲିଆରେ ଏକ କ୍ଷୀର ପାଉଡର କାରଖାନା ମଧ୍ୟ ସ୍ଥାପନ କରିଛି । ସେ ଆବୁଧାବି ଏବଂ ଅନ୍ୟାନ୍ୟ ସ୍ଥାନକୁ ୧୫୦ କଣ୍ଟେନର ପଠାନ୍ତି । "
ଗଡକରୀ ଆହୁରି କହିଛନ୍ତି ଯେ, ତାଙ୍କ ପୁଅ ITC ସହିତ ମିଶି ୨୬ଟି ଚାଉଳ ମିଲ୍ ମଧ୍ୟ ଚଳାନ୍ତି । ମୋତେ ପାଞ୍ଚ ଲକ୍ଷ ଟନ୍ ଚାଉଳ ଅଟା ଆବଶ୍ୟକ, ତେଣୁ ସେ ମିଲ୍ ଚଲାନ୍ତି ଏବଂ ମୁଁ ଅଟା କିଣେ। " ନୀତିନ ଗଡକରୀଙ୍କ ଏହି ବୟାନ ଆଲୋଚନାର ବିଷୟ ପାଲଟିଛି । କାରଣ ଇଥାନଲ୍ ବିବାଦ ସମୟରେ କୁହାଯାଇଥିଲା ଯେ ଗଡକରୀ ତାଙ୍କ ପୁଅକୁ ଲାଭ ଦେବା ପାଇଁ ଇଥାନଲ୍ ବ୍ୟବହାର କରିଥିଲେ । ଏପରି ପରିସ୍ଥିତିରେ ଗଡକରୀ ସ୍ପଷ୍ଟ କରିଛନ୍ତି ଯେ ତାଙ୍କ ପୁଅ ଅନେକ କମ୍ପାନୀ ଚଳାନ୍ତି ।
