ଭୁବନେଶ୍ୱର,୩୦/୧୧ : ରାଜମହଲରୁ ଏଜି ଛକ ରାସ୍ତାରେ ଆଉ ଗାଡ଼ି ପାର୍କିଂ କରି ହେବନି । ବିଏମ୍ସି ଏହି ରାସ୍ତାକୁ ନୋ ପାର୍କିଂ ଜୋନ୍ ଘୋଷଣା କରିବାକୁ ଯାଉଛି । ଏହି ଅଞ୍ଚଳର ସବୁ ସ୍ଲଟ ବା ଟେଣ୍ଡରକୁ ବାତିଲ କରିବାକୁ ଭୁବନେଶ୍ୱର ସ୍ମାର୍ଟସିଟି ଲିମିଟେଡ୍ ବିଏମ୍ସିକୁ ଚିଠି ଲେଖିଛି । ଗୁରୁବାରଠୁ ରାଜମହଲ ବହୁତଳ କାର ପାର୍କିଂ କାର୍ଯ୍ୟକ୍ଷମ ହେବ ବୋଲି ଜଣାପଡ଼ିଛି । ରାଜମହଲ -ଏଜି ରାସ୍ତା କଡ଼ରେ ପାର୍କିଂ ଯୋଗୁଁ ରାସ୍ତାରେ ଟ୍ରାଫିକ ଜାମ ପରିସ୍ଥିତି ଉପୁଜୁଛି । ରାସ୍ତା ପାର ହେବା ପାଇଁ ଘଣ୍ଟା ଘଣ୍ଟା ସମୟ ଲାଗୁଛି । ରାସ୍ତାକୁ କବଜାକୁ ନେଇ ଉଠାଦୋକାନୀମାନେ ପସରା ମେଲାଇଥିବାରୁ ପରିସ୍ଥିତି ଜଟିଳ ହେଉଛି ।
ବିଏମ୍ସି ପକ୍ଷରୁ ରାସ୍ତା କଡ଼ରେ କାର ପାର୍କିଂ ପାଇଁ ଅନୁମତି ଥିଲା । ରାଜମହଲ ବହୁତଳ କାର ପାର୍କିଂ ଲୋକାର୍ପଣ ହେବ । ତେଣୁ ରାଜମହଲରୁ-ଏଜି ଉଭୟ ପାର୍ଶ୍ୱ ରାସ୍ତାରେ ପାର୍କିଂ ଟେଣ୍ଡର ବାତିଲ କରିବାକୁ ନିଷ୍ପତ୍ତି ହୋଇଛି । ନୋ ପାର୍କିଂ ଜୋନ୍ ଘୋଷଣା ହେବା ପରେ ଯଦି କିଏ କାର କିମ୍ବା ବାଇକ୍ ପାର୍କିଂ କରେ ତେବେ ମୋଟା ଅଙ୍କର ଜରିମାନା ଆଦାୟ କରାଯିବ । ୨୩ ତାରିଖରେ ବିଡିଏ ଉପାଧ୍ୟକ୍ଷଙ୍କ ଅଧ୍ୟକ୍ଷତାରେ ଏକ ଜରୁରୀ ବୈଠକ ବସିଥିଲା । ଏଥିରେ ସ୍ମାର୍ଟସିଟି ଲିମିଟେଡ ଏମ୍ଡି ଯୋଗ ଦେଇଥିଲେ । ଆଗକୁ ହକି ବିଶ୍ୱକପ୍ ଥିବାରୁ ସହରରେ ଟ୍ରାଫିକ ମ୍ୟାନେଜମେଣ୍ଟ ଉପରେ ଆଲୋଚନା ହୋଇଥିଲା । ତେଣୁ ଖୁବ୍ଶୀଘ୍ର ଏହି କାର ପାର୍କିଂ କାର୍ଯ୍ୟକ୍ଷମ କରିବାକୁ ନିଷ୍ପତ୍ତି ହୋଇଥିଲା ।
ସ୍ମାର୍ଟସିଟି ଲିମିଟେଡ ପକ୍ଷରୁ ଏହି ବହୁତଳ କାର ପାର୍କିଂ ନିର୍ମାଣ ହୋଇଛି । ୭ ମହଲା ବିଶିଷ୍ଠ ଏହି କାର ପାର୍କିଂରେ ଏକାଥରେ ୪୫୦ ଗାଡ଼ି ପାର୍କିଂ କରିବା ସୁବିଧା ରହିଛି । ସେହିପରି ପାର୍କିଂରେ ଇ-ଚାର୍ଜିଂ ଷ୍ଟେସନ କରାଯାଇଛି । କିଛିଦିନ ପୂର୍ବେ ସହିଦନଗର ବହୁତଳ କାର ପାର୍କିଂ ଲୋକାର୍ପିତ ହୋଇଛି ।