ନୂଆଦିଲ୍ଲୀ,୧୮/୧ : ବାପା ଆଗରେ ଚାଲିଗଲା ପୁଅର ଜୀବନ । ବାପା ସବୁ ଦେଖି ନାଚାର ରହିଲା । ଏହା କୌଣସି ସିନେମାର କାହାଣୀ ନୁହେଁ । ଏଭଳି ଏକ ଘଟଣା ନଜରକୁ ଆସିଛି ନୋଏଡାର ସେକ୍ଟର ୧୫୦ରେ । ଜନୈକ ୨୭ ବର୍ଷୀୟ ସଫ୍ଟୱେୟର୍ ଇଞ୍ଜିନିୟରଙ୍କର ଦୁଃଖଦ ମୃତ୍ୟୁ ଘଟିଛି । ମୃତ ଯୁବକଙ୍କ ବାପା ରାଜକୁମାର ମେହେଟ୍ଟା କୋହଭରା କଣ୍ଠରେ ଏହା କହିଛନ୍ତି । ସେ କହିଛନ୍ତି ମୋ ପୁଅ ମୋ ଆଖି ସାମ୍ନାରେ ଆଖି ବୁଜିଛି । ମାତ୍ର ମୁଁ କିଛି କରିପାରିଲିନି ।
ଘଟଣାଟି ଏଭଳି କିଛି ଥିଲା, ରାଜକୁମାର ମେହେଟ୍ଟାଙ୍କ ପୁଅ ଯୁବରାଜ ଗୁରୁଗ୍ରାମର ଏକ କମ୍ପାନୀରେ କାମ କରୁଥିଲେ। ଶୁକ୍ରବାର ରାତିରେ ସେ ତାଙ୍କ ଅଫିସରୁ ଗ୍ରେଟର ନୋଏଡା ଘରକୁ ଫେରୁଥିଲେ। ଘନ କୁହୁଡ଼ି କାରଟି ଭାରସାମ୍ୟ ହରାଇ ନୋଏଡାର ସେକ୍ଟର ୧୫୦ ଏଟିଏସ ଲେ-ଗ୍ରାଡିୟୋଜ ନିକଟରେ ଥିବା ଟି-ପଏଣ୍ଟରେ ପହଞ୍ଚିଥିଲା । ପରେ କାରଟି କାନ୍ଥ ଭାଙ୍ଗି ଏକ ନିର୍ମାଣଧିନ ମଲ୍ ପରିସରରେ ଯାଇ ପଡ଼ିଯାଇଥିଲା, ଯାହା ପାଣିରେ ଭର୍ତ୍ତି ଥିଲା। ଗାଡ଼ିଟି ପାଣିରେ ପଡ଼ିବା ପରେ, ଯୁବରାଜ ବାହାରକୁ ଆସିବାକୁ ଚେଷ୍ଟା କରିଥିଲେ । କିନ୍ତୁ ସେ ବିଫଳ ହୋଇଥିଲେ। ଶେଷରେ ସେ ବୁଡ଼ିଗଲେ। ଗାଡ଼ିଟି ପାଣିରେ ପଡ଼ିବା ପରେ, ଯୁବରାଜ ତାଙ୍କ ବାପାଙ୍କୁ ଫୋନ୍ କରି ଘଟଣା ବିଷୟରେ ଜଣାଇଥିଲେ। ତାଙ୍କ ବାପା ଘଟଣାସ୍ଥଳରେ ପହଞ୍ଚିଥିଲେ, କିନ୍ତୁ ତାଙ୍କ ପୁଅକୁ ବଞ୍ଚାଇପାରିନଥିଲେ । ଯୁବରାଜଙ୍କ ବାପା ପ୍ରଶାସନ ଉପରେ ଅବହେଳା ଅଭିଯୋଗ କରିଛନ୍ତି।
ରାଜକୁମାର ମେହେଟା କହିଛନ୍ତି, ଶୁକ୍ରବାର ସନ୍ଧ୍ୟାରେ ସେ ଯୁବରାଜଙ୍କଠାରୁ ଏକ ଫୋନ୍ ଏବଂ ମେସେଜ୍ ପାଇଲେ, ଯେଉଁଥିରେ ତାଙ୍କୁ ଜଣାଯାଇଥିଲା ଯେ, ତାଙ୍କ କାର ଏକ ଖୋଲା ଡ୍ରେନରେ ପଡ଼ି ଯାଇଛି । ସେ ତୁରନ୍ତ ଘଟଣାସ୍ଥଳକୁ ଯାଇ ପୁଲିସ ଏବଂ ଅଗ୍ନିଶମ ବାହିନୀକୁ ଫୋନ୍ କରିଥିଲେ। ପୁଲିସ ଟିମ୍ ୧୫ମିନିଟ୍ ମଧ୍ୟରେ ପହଞ୍ଚିଥିଲେ, କିନ୍ତୁ ଯୁବରାଜଙ୍କୁ ବଞ୍ଚାଇବା ପାଇଁ ସେମାନଙ୍କ ପାଖରେ ପର୍ଯ୍ୟାପ୍ତ ସମ୍ବଳ ନ ଥିଲା । ଯୁବରାଜ ରାତି ୧୨ଟାରୁ ରାତି ୨ଟା ପର୍ଯ୍ୟନ୍ତ କାର୍ ଛାତ ଉପରେ ଫସି ରହିଥିଲେ। ଯୁବରାଜ ଭାରସାମ୍ୟ ରକ୍ଷା କରିବା ପାଇଁ କାରର ଛାତ ଉପରେ ଶୋଇ ପଡ଼ିଲେ। ସେ ତାଙ୍କ ଫୋନର ଟର୍ଚ୍ଚଲାଇଟ୍ ବ୍ୟବହାର କରି କେଉଁଠାରେ ଫସିଛନ୍ତି ତାହା ସୂଚାଉଥିଲେ। ଶେଷରେ, ଜଣେ ଫ୍ଲିପକାର୍ଟ ଡେଲିଭରି ଏଜେଣ୍ଟ ମୋହିନ୍ଦର ତାଙ୍କୁ ଉଦ୍ଧାର କରିବାକୁ ଭିତରକୁ ଗଲେ, କିନ୍ତୁ ସେତେବେଳକୁ ଯୁବରାଜଙ୍କର ମୃତ୍ୟୁ ହୋଇସାରିଥିଲା। ଯୁବରାଜଙ୍କ ବାପା କହିଛନ୍ତି, "ମୁଁ ତାଙ୍କୁ ବଞ୍ଚାଇବା ପାଇଁ ଯଥା ସମ୍ଭବ ଚେଷ୍ଟା କରିଥିଲି। କେହି ଜଣେ ଆସି ତାଙ୍କୁ ଉଦ୍ଧାର କରିବେ ବୋଲି ଆଶା କରି ମୁଁ ସବୁଠି ଦୌଡ଼ି ଥିଲି, କିନ୍ତୁ କୌଣସି ଲାଭ ନ ଥିଲା। ତାଙ୍କ ଶେଷ ମୁହୂର୍ତ୍ତରେ, ସେ ବାରମ୍ବାର କହୁଥିଲେ, 'ବାପା, ମୋତେ ବଞ୍ଚାଅ।'"
