ନୂଆଦିଲ୍ଲୀ, ୪।୯: ପଞ୍ଜାବ, ହିମାଚଳ ପ୍ରଦେଶ, ଉତ୍ତରାଖଣ୍ଡ ଏବଂ ଜମ୍ମୁ-କାଶ୍ମୀରରେ ବନ୍ୟା ସ୍ଥିତି । ଏନେଇ ଗମ୍ଭୀର ଚିନ୍ତା ପ୍ରକାଶ କରିଛନ୍ତି ସୁପ୍ରିମକୋର୍ଟ । ମୁଖ୍ୟ ବିଚାରପତି ବି.ଆର. ଗଭାଇ କହିଛନ୍ତି ଯେ, ବର୍ଷା ଓ ବନ୍ୟା ପଛର କାରଣ ବିଷୟରେ ରାଜ୍ୟଗୁଡ଼ିକଠାରୁ ଉତ୍ତର ମାଗିଛୁ । ସିଜେଆଇ କହିଛନ୍ତି ଏଥିରୁ ଜଣାପଡ଼ୁଛି ଯେ, ରାଜ୍ୟଗୁଡ଼ିକରେ ବଡ଼ ଧରଣର ବେଆଇନ ଗଛ କଟା ହୋଇଛି । ଗଣମାଧ୍ୟମ ରିପୋର୍ଟ ଅନୁସାରେ, ହିମାଚଳରେ ବନ୍ୟା ସମୟରେ ବହୁ ସଂଖ୍ୟକ କାଠ ଭାସୁଥିବାର ଦେଖାଯାଇଥିଲା । କୋର୍ଟ କହିଛନ୍ତି ଯେ, ଏହା ଏକ ଗମ୍ଭୀର ପ୍ରସଙ୍ଗ ଏବଂ ରାଜ୍ୟଗୁଡ଼ିକୁ ୩ ସପ୍ତାହ ମଧ୍ୟରେ ଜବାବ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି ।
ଏହା ପ୍ରାକୃତିକ ବିପର୍ଯ୍ୟୟର ମାମଲା ନୁହେଁ: ସିଜେଆଇ
ସିଜେଆଇ ସଲିସିଟର ଜେନେରାଲଙ୍କୁ କହିଥିଲେ ଯେ, କେନ୍ଦ୍ର ମଧ୍ୟ ଏହି ମାମଲା ଉପରେ ଧ୍ୟାନ ଦେବା ଉଚିତ୍ । କୋର୍ଟ ସ୍ପଷ୍ଟ କରିଛନ୍ତି ଯେ, ଏହା କେବଳ ପ୍ରାକୃତିକ ବିପର୍ଯ୍ୟୟର ମାମଲା ନୁହେଁ, ବରଂ ମାନବକୃତ କାରଣ । କହିରଖୁ କି, କିଛି ଦିନ ଧରି ଲଗାତାର ପ୍ରବଳ ବର୍ଷା ଯୋଗୁଁ, ପଞ୍ଜାବ, ହିମାଚଳ ପ୍ରଦେଶ, ଜମ୍ମୁ ଏବଂ କାଶ୍ମୀର ଏବଂ ଉତ୍ତରାଖଣ୍ଡ ଆଦି ବନ୍ୟା ପରିସ୍ଥିତିର ସମ୍ମୁଖୀନ ହେଉଛି । ପଞ୍ଜାବ ରାଜ୍ୟରେ ପ୍ରବଳ ବର୍ଷା ଯୋଗୁଁ ୩୭ରୁ ଅଧିକ ଲୋକଙ୍କର ମୃତ୍ୟୁ ହୋଇଥିବା ବେଳେ ୧୬୦୦ ଗାଁ ବନ୍ୟା ଦ୍ୱାରା ପ୍ରଭାବିତ ହୋଇଛି । ପୋଲିସ ପ୍ରଶାସନ ଏବଂ ସେନା ଲୋକଙ୍କ ପାଇଁ ରିଲିଫ୍ କାର୍ଯ୍ୟରେ ନିୟୋଜିତ ଅଛନ୍ତି ।
ଚାଷୀଙ୍କ ଉପରେ ବନ୍ୟାର ପ୍ରଭାବ:
ଭୟଙ୍କର ବନ୍ୟାରେ ପଞ୍ଜାବର ଚାଷୀ ପ୍ରଭାବିତ ହୋଇଛନ୍ତି । ବନ୍ୟା ପାଣି ଯୋଗୁଁ ଲକ୍ଷ ଲକ୍ଷ ଏକର ଚାଷ ଜମି ନଷ୍ଟ ହୋଇଯାଇଛି । ରାଜ୍ୟ ସରକାର କେନ୍ଦ୍ର ସରକାରଙ୍କୁ ଏକ ଚିଠି ଲେଖି ଅଟକି ରହିଥିବା ପାଣ୍ଠି ଦେବାକୁ ଦାବି କରିଛନ୍ତି । ସେ କହିଛନ୍ତି ଯେ, ଚାଷୀଙ୍କ ଅବସ୍ଥା ଦେଖି ସେ ଚାଷୀମାନଙ୍କୁ ପ୍ରତି ଏକର ୫୦ ହଜାର ଟଙ୍କା କ୍ଷତିପୂରଣ ଦେବାକୁ ଚାହାଁନ୍ତି ।
ଦେଶର ୨୧ଟି ନଦୀରେ ବନ୍ୟା ସ୍ଥିତି:
କେନ୍ଦ୍ରୀୟ ଜଳ ଆୟୋଗ (CWC) ବୁଧବାର କହିଛି ଯେ, ଦେଶର ୨୧ଟି ନଦୀର ଅବସ୍ଥା ସଙ୍କଟଜନକ ଥିବାବେଳେ ୩୩ଟି ନଦୀ ସ୍ୱାଭାବିକ ସ୍ତର ଉପରେ ପ୍ରବାହିତ ହେଉଛି । ବନ୍ୟା ଦ୍ୱାରା ଗୁରୁତର ଭାବରେ ପ୍ରଭାବିତ ୨୧ ନଦୀ ମଧ୍ୟରେ ବିହାରର ୯ଟି, ଉତ୍ତର ପ୍ରଦେଶର ୮ଟି ଏବଂ ଦିଲ୍ଲୀ, ଜମ୍ମୁ-କାଶ୍ମୀର, ପଶ୍ଚିମବଙ୍ଗ ଏବଂ ଝାଡ଼ଖଣ୍ଡର ଗୋଟିଏ ଲେଖାଏଁ ରହିଛି । ୩୩ ନଦୀର ଜଳସ୍ତର ସ୍ୱାଭାବିକଠାରୁ ଅଧିକ ରହିଛି ଯେଉଁମାନଙ୍କ ମଧ୍ୟରେ ଉତ୍ତର ପ୍ରଦେଶର ୯ଟି, ବିହାରର ୭ଟି, ଆସାମରେ ୭ଟି, ଉତ୍ତରାଖଣ୍ଡର ୨ଟି, ଓଡ଼ିଶାର ୨ଟି, ତେଲେଙ୍ଗାନାର ୨ଟି ଏବଂ ଆନ୍ଧ୍ର ପ୍ରଦେଶ, ମହାରାଷ୍ଟ୍ର, ରାଜସ୍ଥାନ ଏବଂ ପଶ୍ଚିମବଙ୍ଗର ୧ଟି ଲେଖାଏଁ ନଦୀ ରହିଛି । ଉତ୍ତର ପାହାଡ଼ି ରାଜ୍ୟଗୁଡ଼ିକରେ ହାଇ ଆଲର୍ଟ ଜାରି କରାଯାଇଛି ।
